ភ្នំពេញៈ ក្រសួងអប់រំបានប្រកាសដាក់ឱ្យដំណើរការកម្មវិធីស្វ័យសិក្សាតាមបែបអេឡិចត្រូនិក (MoEYS E-Learning Apps) ជាផ្លូវការ ក្រោយពីបានដំណើរការសាកល្បងអស់រយៈពេល ៥ ខែ ដើម្បីដោះស្រាយបញ្ហាខ្វះខាតឯកសារសិក្សារបស់សិស្ស និងកែលម្អការរៀន និងការបង្រៀន។
លោក ហង់ជួន ណារ៉ុន រដ្ឋមន្ត្រីក្រសួងអប់រំថ្លែងក្នុងសន្និសីទសារព័ត៌មាន ដើម្បីប្រកាសដាក់ឱ្យដំណើរការជាផ្លូវការនូវកម្មវិធីស្វ័យសិក្សានេះកាលពីថ្ងៃទី ២៣ ខែកញ្ញាថា ក្នុងរយៈពេល ៥ ខែកន្លងមកនេះ កម្មវិធីនេះបានផ្តល់ឱកាសដល់សិស្សបានធ្វើស្វ័យសិក្សា និងបានប្រើប្រាស់ឯកសារដែលមានក្នុងកម្មវិធីនេះ ដើម្បីអាចបន្តការសិក្សាបាន និងផ្តល់ឱកាសដល់គ្រូបង្រៀនក្នុងការយកឯកសារទាំងនោះមកបង្រៀនសិស្សផងដែរ។
លោកថ្លែងថា៖ «(កម្មវិធីនេះ) ក៏ជាផ្នែកមួយនៃការបង្កើតជាប្រព័ន្ធសិក្សាតាមបែបអេឡិចត្រូនិកដែលក្រសួងអប់រំ និងកីឡា បានដាក់ឱ្យប្រើប្រាស់ហើយចូលរួមចំណែកធ្វើឱ្យធនធានសិក្សាកាន់តែសម្បូរបែបឱ្យសិស្សមានឱកាសនៅក្នុងការប្រើប្រាស់ ដើម្បីយកទៅពង្រឹងនូវចំណេះដឹងក៏ដូចជាត្រៀមខ្លួនឱ្យបានរួចជាស្រេច ដើម្បីប្រឡងសញ្ញាបត្រ ក៏ដូចជាដើម្បីអាចឱ្យលោកគ្រូអ្នកគ្រូបានយកទៅប្រើប្រាស់ក្នុងការបង្កើននូវបំណិនវិជ្ជាជីវៈថែមទៀត»។
ក្រោយពីប្រកាសឱ្យផ្អាកដំណើរការសាលារៀនជាបណ្តោះអាសន្នកាលពីខែមីនា ឆ្នាំ ២០២០ ដើម្បីទប់ស្កាត់ការរីករាលដាលជំងឺកូវីដ ១៩ ក្រសួងអប់រំបានដាក់ចេញជាគោលនយោបាយក្នុងគោលដៅលើកកម្ពស់ការអប់រំតាមបែបឌីជីថល។
លោក ហង់ជួន ណារ៉ុន ថ្លែងថា កម្មវិធីនេះ គឺជាការចូលរួមចំណែកក្នុងការបង្កើតជាធនធាននិងប្រព័ន្ធឌីជីថលមួយ ដើម្បីជួយសិស្សឱ្យមានបំណិនខាងផ្នែកឌីជីថល និងចូលរួមដោះស្រាយបញ្ហាខ្វះខាតឯកសាររបស់សិស្សផងដែរ។
លោកថ្លែងថា៖ «យើងបានជ្រើសរើសលោកគ្រូ អ្នកគ្រូដែលល្បីៗ ដែលជាគ្រូល្អដើម្បីថតជាវីដេអូ ហើយដាក់ចូលទៅក្នុងកម្មវិធីទាំងអស់នេះ។ ដូច្នេះ កម្មវិធីដែលមានពីថ្នាក់ទី១ ដល់ថ្នាក់ទី១២ ក៏ដូចជាមានឯកសារដ៏សម្បូរបែបជាសៀវភៅគោលផ្សេងៗនឹងចូលរួមចំណែកបន្ថែមទៀត នៅក្នុងការពង្រឹងការសិក្សារបស់យើង»។
ក្រសួងអប់រំបានអនុញ្ញាតឱ្យបើកដំណើរការសាលារៀនឡើងវិញជាដំណាក់កាលៗនៅតាមរាជធានី-ខេត្តទូទាំងប្រទេសកាលពីជាង ១ សប្តាហ៍មុន ដោយតម្រូវឱ្យគោរពតាមលក្ខខណ្ឌអនាម័យ បរិស្ថាន និងការអនុវត្តនូវវិធានរបស់ក្រសួងសុខាភិបាល និងអនុវត្តគោលការណ៍ប្រតិបត្តិស្តង់ដា (SOP) របស់ក្រសួងអប់រំ ដើម្បីទប់ស្កាត់ការឆ្លងរីករាលដាលជំងឺកូវីដ ១៩ ។
លោក ហង់ជួន ណារ៉ុន ថ្លែងថា ទោះបីជាមានការបើកឱ្យរៀនតាមបណ្តុំ និងការឈានទៅរកការបើកសាលារៀនទាំងអស់ឡើងវិញ តែការរៀបចំកម្មវិធីសិក្សាតាមបែបអេឡិចត្រូនិកនេះនឹងនៅតែបន្តយកទៅប្រើប្រាស់ ដើម្បីឱ្យគ្រូបង្រៀនអាចកែលម្អការរៀន និងការបង្រៀន និងដើម្បីអនុវត្តវិធីសាស្ត្រតាមបែបចម្រុះដែលជាកន្លងថ្មីមួយទៀតនៅក្នុងវិស័យអប់រំ។
លោករដ្ឋមន្ត្រីថ្លែងថា៖ «យើងបានវាយតម្លៃថា កម្ពុជាដើរឈានទៅមុខ ១០ ឆ្នាំ នៅក្នុងការអនុវត្តនូវបំណិនឌីជីថលនេះ ហើយជាទិសដៅរបសក្រសួងអប់រំ គឺដាក់ចេញថានឹងធ្វើបន្តការធ្វើវិនិយោគនូវការអប់រំតាមបែបឌីជីថល…»។
លោក ហ៊ុន ម៉ានី ប្រធានគណៈកម្មការអប់រំ យុវជន និងកីឡា កិច្ចការសាសនា វប្បធម៌ និងទេសចរណ៍នៃរដ្ឋសភា និងជាប្រធានសហភាពសហព័ន្ធយុវជនកម្ពុជា ថ្លែងក្នុងសន្និសីទកាសែតនេះថា ក្នុងរយៈពេល៥ខែកន្លងមកនេះ អ្នកដែលបានចុះឈ្មោះប្រើប្រាស់ Appsនេះ មានចំនួន ២៤ ម៉ឺននាក់មកពី ២៥ រាជធានី-ខេត្ត ចំនួនចូលទស្សនា (View) មាន ២ លានដង ហើយអត្រានៃការចូលទៅសិក្សានៅក្នុង Apps នេះ ជាមធ្យមក្នុង ១ ថ្ងៃ គឺមាន ៧ ០០០ ដង។
លោកថ្លែងថា៖ «ទោះទិដ្ឋភាពជាក់ស្តែងបច្ចុប្បន្នគឺអ្នកដែលចុះឈ្នោះ នៅក្នុង ២៤ ម៉ឺននាក់នេះ គឺនៅថ្នាក់ទី៩ និងថ្នាក់ទី១២ ក្តី តែយើងសង្ឃឹមថា ជាបន្តបន្ទាប់ Apps នេះ គឺនឹងក្លាយទៅជាវេទិកាជាមធ្យោបាយមួយដែលសិស្សានុស្សិសរបស់យើងអាចប្រើប្រាស់ជាប្រចាំថ្ងៃបន្ថែមទៅលើអ្វីដែលជាមេរៀនដែលគាត់ទទួលបានតាមវិធីសាស្ត្ររៀនដោយផ្ទាល់»។
លោក ហ៊ុន ម៉ានី បន្តថា៖ «អ៊ីចឹង ជារួម មិនមែនបានន័យថា Apps នេះ នឹងជំនួសអ្វីទាំងអស់នោះទេ តែ Apps នេះ វាគ្រាន់តែជាមធ្យោបាយមួយបន្ថែមទៀត ដើម្បីឱ្យប្អូនៗប្រើប្រាស់តាមការសម្រេចចិត្តរបស់ខ្លួនតិច មធ្យម ច្រើន ដើម្បីធានាជាមួយនឹងមេរៀនបន្ថែមៗទៀត»៕