.jpg)
សកម្មភាពប្រជាពលរដ្ឋយកម្ហូបអាហារទៅវត្តក្នុងអំឡុងបុណ្យភ្ជុំបិណ្ឌ។ ហេង ជីវ័ន
ភ្នំពេញៈ លោកនាយករដ្ឋមន្ត្រី ហ៊ុន សែន បានស្នើឱ្យស្ថាប័នពាក់ព័ន្ធពិចារណាក្នុងការផ្អាកនូវពិធីបុណ្យកាន់បិណ្ឌ និងភ្ជុំបិណ្ឌ ដើម្បីបង្ការការឆ្លងរាលដាលនូវជំងឺកូវីដ ១៩ កាន់តែច្រើនឡើងម្តងទៀត ដោយបារម្ភពីការផ្ទុះឡើងជាថ្មីម្តងទៀតនៃវីរុសកូវីដ ១៩ បន្ទាប់ពីពិធីបុណ្យកាន់បិណ្ឌ និងភ្ជុំបិណ្ឌដោយសារនៅតាមវត្តអារាមមួយចំនួនមានការឆ្លងវីរុសនេះក្នុងរយៈពេលចាប់ផ្តើមនៃពិធីបុណ្យនេះ ដែលវាជាហានិភ័យធ្ងន់ធ្ងរសម្រាប់ប្រទេសជាតិ ខណៈលោកបានស្នើឱ្យស្ថាប័នពាក់ព័ន្ធពិចារណាក្នុងការផ្អាកនូវពិធីបុណ្យប្រពៃណីមួយនេះ ដើម្បីបង្ការការឆ្លងរាលដាលនូវមេរោគនេះកាន់តែច្រើនឡើងម្តងទៀត។
លោក ហ៊ុន សែន បានថ្លែងតាមរយៈសារជាសំឡេងមួយនៅរសៀលថ្ងៃទី ២៣ ខែកញ្ញាថា ប្រសិនការឆ្លងនេះកើតឡើងត្រឹម ២០ ឬ ៥០% នៃវត្តទូទាំងប្រទេសនោះនឹងមានកន្លែងឆ្លងរហូតដល់ជាង ២ ០០០ វត្តហើយការឆ្លងនោះនឹងរាលដាលធ្ងន់ធ្ងរទៅតាមសហគមន៍ គ្មានចន្លោះនោះទេ។
លោកថ្លែងថា៖ «បញ្ហានេះ ខ្ញុំសុំសម្តេចព្រះសង្ឃរាជទាំង ២ គណៈសម្តេចព្រះសង្ឃនាយកសុំព្រះមេត្តាពិចារណាថា តើគួរគប្បីធ្វើយ៉ាងណានៅក្នុងកាលៈទេសៈដ៏លំបាកនេះ? ខ្ញុំព្រះករុណាខ្ញុំ សុំស្នើឱ្យគណៈសង្ឃនាយករួមនឹងក្រសួងធម្មការ និងសាសនា ធ្វើការពិនិត្យជាបន្ទាន់ ដោយគិតគូរលើវិធានការទាំងឡាយដែលរៀបចំដោយក្រសួងសុខាភិបាល»។
លោក ហ៊ុន សែន បានបន្ថែមថា៖ «ប្រសិនបើយើងបន្តអាចថាលទ្ធផលដែលយើងទទួលបានក្នុងពេលកន្លងទៅនេះនឹងមានការរីករាលដាលធ្ងន់ធ្ងរហួសពីការគិត ដែលយើងបានគិតនៅមុនពេលបុណ្យ ដោយសារជាតំបន់ឆ្លងដែលមនុស្សមកពីគ្រប់កន្លែងចូលទៅក្នុងវត្តអារាម»។
ដោយមានការបារម្ភ និងកង្វល់នៃការផ្ទុះការរាលដាលនៃវីរុសនេះ លោក ហ៊ុន សែន បានអំពាវនាវទៅដល់ក្រសួងសុខាភិបាលធ្វើការពិចារណាថា តើគួរផ្អាកនូវពិធីនេះបានដែរទេ? ឬក៏កាត់បន្ថយតាមរបៀបណាមួយដែលអាចធ្វើទៅបាន។
ជាមួយគ្នានេះដែរ លោកនាយករដ្ឋមន្ត្រីក៏បានស្នើឱ្យក្រសួងសុខាភិបាល ក្រសួងសេដ្ឋកិច្ច និងហិរញ្ញវត្ថុ ក្រសួងធម្មការ និងសាសនា រួមនឹងផ្នែកពាក់ព័ន្ធដទៃទៀតពិនិត្យ និងពិចារណាទាក់ទងនឹងបញ្ហានេះឱ្យបានហ្មត់ចត់ ដោយសារការប្រឹងប្រែងក្នុងការទប់ស្កាត់ឱ្យជំងឺឆ្លងនេះធ្លាក់ចុះ តែជំងឺនេះអាចកើនឡើងវិញក្នុងពិធីបុណ្យភ្ជុំបិណ្ឌនេះ។
លោក ហ៊ុន សែន បានបញ្ជាក់ផងដែរថា ក្នុងករណីនៅតាមវត្តអារាមមិនផ្អាកពិធីបុណ្យនេះទេ គឺសុំឱ្យមានមនុស្សតិចបំផុតចូលក្នុងវត្តអារាមដែលមានតែមនុស្ស ២ ឬ ៣ នាក់ប៉ុណ្ណោះ ដោយនាំយកម្ហូបអាហារ ឬចង្ហាន់ប្រគេនព្រះសង្ឃដោយមិនចាំបាច់មានពិធីវែងឆ្ងាយឡើយ។
បន្ទាប់ពីមានការស្នើឱ្យមានការពិចារណាក្នុងការផ្អាកពិធីកាន់បិណ្ឌ និងភ្ជុំបិណ្ឌពីសំណាក់លោកនាយករដ្ឋមន្ត្រី ហ៊ុន សែន មក ប្រធានមន្ទីរធម្មការ និងសាសនារាជធានីភ្នំពេញលោក ទេព គង្គា បានធ្វើការប្រកាសភ្លាមៗពីការផ្អាកការជួបជុំផ្សេងៗ និងការប្រមូលផ្ដុំថ្វាយបង្គំជាបណ្តោះអាសន្នសិន ចាប់ពីថ្ងៃទី ២៣ ខែកញ្ញា តទៅ រហូតមានការជូនដំណឹងជាថ្មី ដើម្បីទប់ស្កាត់ជំងឺកូវីដ ១៩។
លោកបានលើកឡើងដោយប្រាប់ឱ្យអ្នកគ្រប់គ្រងទីតាំងពិធីសាសនាទាំងអស់ក្នុងរាជធានីភ្នំពេញ ធ្វើការបង្កើនការប្រុងប្រយ័ត្នចំពោះជំងឺកូវីដ ១៩ នេះដោយអនុវត្តយ៉ាងម៉ឺងម៉ាត់នូវវិធានការទាំងឡាយរបស់រាជរដ្ឋាភិបាល និងក្រសួងសុខាភិបាល។
លោក ទេព គង្គា បានបញ្ជាក់ថា៖ «សូមបន្តផ្អាកការជួបជុំផ្សេងៗ និងការប្រមូលផ្ដុំថ្វាយបង្គំជាបណ្តោះអាសន្នសិនចាប់ពីពេលនេះតទៅរហូតមានការជូនដំណឹងជាថ្មី»៕
