.jpg)
លោក ហ៊ុន សែន ចូលរួមកិច្ចប្រជុំសកលតាមវីដេអូស្តីពីជំងឺកូវីដ ១៩ នាថ្ងៃទី ២២ កញ្ញា។ រូប SPM
ភ្នំពេញៈ រដ្ឋាភិបាលកម្ពុជាស្វាគមន៍ការកំណត់គោលដៅចាក់វ៉ាក់សាំងឱ្យបានយ៉ាងតិច ៧០% នៃប្រជាជនលើពិភពលោក ដោយសារវ៉ាក់សាំងជាទំនិញដ៏សំខាន់ក្នុងការជួយសង្គ្រោះជីវិតមនុស្ស ខណៈកម្ពុជាបានក្លាយជាប្រទេសដែលមានអត្រាចាក់វ៉ាក់សាំងខ្ពស់រហូតដល់ប្រមាណជាង ៧៩% ធៀបនឹងប្រជាជនសរុប ១៦ លាននាក់។ នេះបើតាមលោកនាយករដ្ឋមន្ត្រី។
លោកនាយករដ្ឋមន្ត្រី ហ៊ុន សែន ថ្លែងបែបនេះក្នុងកិច្ចប្រជុំកំពូលសកលស្តីពីជំងឺកូវីដ ១៩ «ការបញ្ចប់ការរាតត្បាត និងការកសាងឡើងវិញឱ្យកាន់តែប្រសើរ» នាថ្ងៃទី ២២ ខែកញ្ញា ឆ្នាំ ២០២១។
លោកលើកឡើងថា ស្ថានភាពនៃជំងឺកូវីដ ១៩ ឈានមកដល់ត្រីមាសទី៣ នៃឆ្នាំ ២០២១ នេះ នៅតែបន្តប្រឈមនឹងភាពមិនប្រាកដប្រជាខ្ពស់ ដោយសារហានិភ័យពីរលកនៃការបំប្លែងខ្លួនថ្មីៗរបស់វីរុសកូរ៉ូណា ដែលមានសភាព កាន់តែកាចសាហាវ និងបន្តរំខានដល់សកម្មភាពសង្គមសេដ្ឋកិច្ចទូទៅ។ កម្ពុជាយល់ថា ប្រទេសទាំងអស់ត្រូវប្រឹងប្រែង និងរួមសាមគ្គីគ្នាជាធ្លុងមួយ ដើម្បីសម្រេចគោលដៅដ៏ចម្បងនេះ ដោយមិនប្រកាន់ពូជសាសន៍ និន្នាការនយោបាយ និងចៀសវាងឱ្យបាននូវការយកការប្រយុទ្ធនឹងជំងឺកូវីដ ១៩ ធ្វើជារបៀបវារៈនយោបាយ ឬបម្រើរបៀបវារៈនយោបាយរបស់ខ្លួន។
លោក ហ៊ុន សែន បានថ្លែងថា៖ «ដើម្បីសម្រេចបាននូវគោលដៅចាក់វ៉ាក់សាំងឱ្យបានយ៉ាងតិច ៧០% នៃប្រជាជនលើពិភពលោក កម្ពុជាសូមអំពាវនាវឱ្យមានការកំណត់វ៉ាក់សាំងកូវីដ ១៩ ទាំងអស់ ដែលត្រូវបានទទួលស្គាល់ដោយអង្គការសុខភាពពិភពលោក (WHO) ជាទំនិញយុទ្ធសាស្ត្រគន្លឹះសកល ដោយគ្មានការរើសអើងទៅលើប្រភេទ និងប្រភពនៃវ៉ាក់សាំង»។
លោកក៏បានអំពាវនាវឱ្យកំណត់វ៉ាក់សាំងកូវីដ ១៩ ជាទំនិញសាធារណៈដែល មានតម្លៃសមរម្យ និងអនុញ្ញាតឱ្យគ្រប់ប្រទេសទាំងអស់អាចមានលទ្ធភាព ទទួលបាន និងប្រើប្រាស់បានតាមតម្រូវការ។ លើសពីនេះទៀត បើកចំហការផលិតវ៉ាក់សាំងកូវីដ ១៩ យ៉ាងទូលាយទៅតាមតំបន់ និងប្រទេសនានា ដែលមានលទ្ធភាព តាមរយៈការផ្តល់ហិរញ្ញប្បទាន និងការលើកទឹកចិត្តដល់ការវិនិយោគលើការផលិតវ៉ាក់សាំង។
លោកនាយករដ្ឋមន្ត្រីថ្លែងថា៖ «កម្ពុជាក៏អំពាវនាវដល់រដ្ឋាភិបាលទាំងអស់សូមកុំប្រមូលទិញវ៉ាក់សាំងទុកសម្រាប់តែប្រទេសរបស់ខ្លួន ឬរក្សាវ៉ាក់សាំងដែលខ្លួនផលិតបានទុកសម្រាប់ប្រើប្រាស់តែក្នុងប្រទេសផ្ទាល់ខ្លួន»។
ខណៈដែលការឆ្លងរាលដាលជាសកលនៃជំងឺកូវីដ ១៩ គឺជាវិបត្តិរួម កម្ពុជាយល់ស្របនឹងទស្សនៈដែលបានលើកឡើងថា មិនមានប្រទេសណាអាចបញ្ឈប់វិបត្តិនេះតែម្នាក់ឯងបាននោះទេ។ ទាំងអស់គ្នាត្រូវធ្វើការរួមគ្នា គាំទ្រគ្នាទៅវិញទៅមកហើយត្រូវចងចាំថា មិនមាននរណាម្នាក់អាចមានសុវត្ថិភាពនោះទេ ដរាបណាទាំងអស់គ្នាមិនទាន់មានសុវត្ថិភាព។ នេះបើតាមលោក ហ៊ុន សែន។
លោកបញ្ជាក់ថា៖ «យើងត្រូវរួមគ្នាធ្វើកិច្ចការនេះតាមសមត្ថភាព និងលទ្ធភាពរៀងខ្លួនក្នុងទឹកចិត្តស្មោះសរ ការទទួលខុសត្រូវខ្ពស់ សប្បុរសធម៌ និងមិនមានបង្កប់នូវរបៀបវារៈនយោបាយ។ ក្នុងស្មារតីនេះ កម្ពុជាសូមចូលរួមជាមួយនឹងសហគមន៍អន្តរជាតិក្នុងការប្តេជ្ញាផ្សារភ្ជាប់ខ្លួនជាមួយនឹងសេចក្តីព្រាងគោលដៅដែលជាលទ្ធផលដ៏សំខាន់នៃកិច្ចប្រជុំកំពូលសកលស្តីពីជំងឺកូវីដ ១៩ នេះ»។
លោកបន្ថែមថា ក្នុងនេះដែរ កម្ពុជាក៏បានស្នើសុំឱ្យចូលរួមទាំងអស់ប្រែក្លាយសេចក្តីព្រាងគោលដៅនេះទៅជាសកម្មភាពជាក់លាក់ និងប្រាកដនិយម។
លោកនាយករដ្ឋមន្ត្រីបន្តថា កម្ពុជាបានឆ្លើយតបទៅនឹងវិបត្តិនេះ ដោយភាពស្វាហាប់ជាមួយនឹងយុទ្ធសាស្ត្រគ្រប់ជ្រុងជ្រោយ។ ក្នុងការប្រយុទ្ធនឹងជំងឺកូវីដ ១៩ នេះដែរ រាជរដ្ឋាភិបាលក៏បានកំណត់យកការចាក់វ៉ាក់សាំង ជាវិធានការយុទ្ធសាស្ត្រគន្លឹះ គួបផ្សំជាមួយនឹងវិធានការ ៣ ទៀត រួមមាន ការខិតខំទប់ស្កាត់ និងរុករកការឆ្លងឱ្យបានទាន់ពេល ការពង្រឹងសមត្ថភាពព្យាបាល និងការប្រើប្រាស់ថ្នាំព្យាបាល ប្រកបដោយស័ក្តិសិទ្ធិភាព និងការអនុវត្តដោយហ្មត់ចត់នូវវិធានការផ្នែករដ្ឋបាល សុខាភិបាល និងច្បាប់ក៏ដូចជាការទាក់ទាញការចូលរួមយ៉ាងសកម្មពីសំណាក់ សាធារណជនគ្រប់មជ្ឈដ្ឋាន និងគ្រប់រូប។
កាលពីថ្ងៃទី ១៧ ខែ កញ្ញា ឆ្នាំ ២០២១ រាជរដ្ឋាភិបាលក៏បានសម្រេចដាក់ចេញនូវយុទ្ធនាការចាក់វ៉ាក់សាំងជូនកុមារអាយុពី ៦ ឆ្នាំ ដល់ក្រោម ១២ ឆ្នាំ និងចាក់ដូសជំរុញជូនប្រជាពលរដ្ឋទូទៅ ដែលមានអាយុចាប់ពី ១៨ ឆ្នាំឡើង។ លើមូលដ្ឋាននេះ កម្ពុជាសម្រេចបាននូវភាពស៊ាំសហគមន៍ជាបណ្តើរៗ ដោយអត្រាឆ្លង ឈឺ និងស្លាប់ក៏មានការធ្លាក់ចុះគួរឱ្យកត់សម្គាល់។
សម្រាប់ទិសដៅទៅមុខ លោក ហ៊ុន សែន ក៏បានថ្លែងដែរថា កម្ពុជានឹងបន្តអនុវត្តវិធានការបង្ការ ព្យាបាល និងចាក់វ៉ាក់សាំង ក៏ដូចជា រៀបចំក្របខ័ណ្ឌវាយតម្លៃហានិភ័យគ្រប់ជ្រុងជ្រោយ ដើម្បីបើកដំណើរការនូវសកម្មភាពសង្គមសេដ្ឋកិច្ចពេញលេញឡើងវិញជាជំហានៗក្នុងស្មារតីប្រយ័ត្នប្រយែងខ្ពស់។
បន្ថែមលើនេះ រដ្ឋាភិបាលកម្ពុជានឹងប្រឹងប្រែងជំរុញការវិនិយោគលើវិស័យសង្គមកិច្ច ពិសេសគឺការពង្រឹងប្រព័ន្ធគាំពារសង្គម និងប្រព័ន្ធសុខាភិបាល ដើម្បីត្រៀមលក្ខណសម្បត្តិឆ្លើយតបឱ្យបានទាន់ពេល និងប្រកបដោយប្រសិទ្ធភាពខ្ពស់ទៅនឹងជំងឺរាតត្បាតផ្សេងៗ ដែលអាចកើតមានឡើងជាយថាហេតុនាអនាគត។
ទាក់ទងនឹងយុទ្ធនាការ និងលទ្ធផលនៃការចាក់វ៉ាក់សាំងកូវីដ ១៩ ជូនប្រជាពលរដ្ឋកម្ពុជានេះផងដែរ លោក វិទិត មុនតាប៊ន (Vitit Muntarbhorn) អ្នករាយការណ៍ពិសេសរបស់អង្គការសហប្រជាជាតិ ទទួលបន្ទុកសិទ្ធិមនុស្សប្រចាំព្រះរាជាណាចក្រកម្ពុជាបានកោតសរសើរចំពោះរាជរដ្ឋាភិបាលកម្ពុជា ដែលបានចាត់វិធានការស្រោចវ៉ាក់សាំង ដល់ប្រជាជនកម្ពុជាក្នុងការទប់ស្កាត់ជំងឺកូវីដ ១៩ នេះ។
លោក វិទិត មុនតាប៊ន បានកោតសរសើរដូចនេះក្នុងជំនួបរវាងលោកនាយករដ្ឋមន្ត្រី ហ៊ុន សែន តាមរយៈប្រព័ន្ធវីដេអូកាលពីថ្ងៃទី ២២ កញ្ញា ឆ្នាំ ២០២១៕
