ទីភ្នាក់ងារជំនួយអាមេរិក (USAID) ប្រចាំកម្ពុជា កាលពីថ្ងៃទី ២៣ ខែកញ្ញា បានប្រកាសពីហិរញ្ញប្បទានបន្ថែមក្នុងទំហំទឹកប្រាក់ចំនួន ៥ លានដុល្លារសហរដ្ឋអាមេរិក ដើម្បីធ្វើឱ្យប្រសើរឡើងនូវស្ថានភាពសុខភាពរបស់អ្នករស់រានមានជីវិតពីរបបខ្មែរក្រហម តាមរយៈគម្រោងដែលមានឈ្មោះថា ៖ «ការលើកកម្ពស់សិទ្ធិ និងការធ្វើឱ្យប្រសើរឡើងនូវស្ថានភាពសុខភាពរបស់អ្នករស់រានមានជីវិតពីរបបខ្មែរក្រហម» ដែលគម្រោងនេះ នឹងត្រូវគ្រប់គ្រងដោយមជ្ឈមណ្ឌលឯកសារកម្ពុជា។
ទីភ្នាក់ងារជំនួយអាមេរិក (USAID)ប្រចាំកម្ពុជា បានបញ្ជាក់ថា ហិរញ្ញប្បទានបន្ថែមនេះនឹងធ្វើឱ្យសកម្មភាព ប្រតិបត្តិការ មានតម្លៃសរុបចំនួន ៦,៥ លានដុល្លារសហរដ្ឋអាមេរិក។
ឯកអគ្គរដ្ឋទូតអាមេរិក លោក W. Patrick Murphy បានថ្លែងថា ស្ថានទូតអាមេរិកមានមោទនភាពក្នុងការគាំទ្រដល់គម្រោងនេះ។
លោកមានប្រសាសន៍ថា ៖ «រដ្ឋាភិបាលសហរដ្ឋអាមេរិកមានសេចក្តីប្តេជ្ញា យូរអង្វែងក្នុងការលើកកម្ពស់សន្តិភាព និងការផ្សះផ្សាជាតិ តាមរយៈការចងចាំអំពីប្រវត្តិសាស្ត្រខ្មែរក្រហម។ គម្រោងនេះនឹងផ្តល់ជូនអ្នករស់រានមានជីវិត ពីរបបខ្មែរក្រហមនូវការប្រើប្រាស់សេវាថែទាំសុខភាព និងចងក្រងនូវស្ថានភាពសុខភាព និងក្តីព្រួយបារម្ភពីស្ថានភាពសង្គមសេដ្ឋកិច្ច និងបទពិសោធន៍ពេលឆ្លងកាត់របបខ្មែរក្រហម»។
សេចក្តីប្រកាសរបស់ស្ថានទូតអាមេរិកបានលើកឡើងទៀតថា ការងារថ្មីមួយនេះ នឹងធ្វើការសិក្សាស្រាវជ្រាវផ្ទាល់អំពីស្ថានភាពសុខុមាលភាពរបស់អ្នករស់រានមានជីវិតពីរបបខ្មែរក្រហម និងបន្ទាប់មកធ្វើការប្រែក្លាយលទ្ធផលរកឃើញឱ្យទៅជាយុទ្ធនាការបង្កើនការយល់ដឹងរបស់សាធារណៈ។
គម្រោងនេះនឹងធ្វើប្រតិបត្តិការនានាដើម្បីធ្វើឱ្យប្រសើរឡើងនូវសុខភាព សុខុមាលភាព និងភាពសុខស្រួលរបស់អ្នករស់រានមានជីវិតពីរបបខ្មែរក្រហមនៅទូទាំងប្រទេស។
នាយកប្រតិបត្តិមជ្ឈមណ្ឌលឯកសារកម្ពុជា លោក ឆាំង យុ បានលើកឡើងផងដែរថា សោកនាដកម្ម និងភាពអយុត្តិធម៌ ដែលប្រជាជនកម្ពុជាទទួលរងនៅក្នុងរបបខ្មែរក្រហម មានទំហំមហាសាល ដែលគ្មានអ្វីអាចជំនួស ឬប៉ះប៉ូវជូនអ្នកទាំងអស់បានទេ។
លោកថា ទោះបីជាយ៉ាងណាក៏ដោយ កិច្ចខិតខំប្រឹងប្រែងមួយនេះ គឺជាជំហានឆ្ពោះទៅសម្រេចបានការថែទាំ និងគាំពារដល់អ្នករស់រានមានជីវិតពីរបបប្រល័យពូជសាសន៍ខ្មែរក្រហម។
លោក ឆាំង យុ បានមានប្រសាសន៍ថា ៖ «ហិរញ្ញប្បទានពិសេសនេះ រួមបញ្ចូលនូវអ្នកស្ម័គ្រចិត្ត ប្រកបដោយ ភាពមោះមុតចំនួន ៥០០ នាក់ ដែលបំពេញការងារនៅទូទាំងប្រទេស ក្នុងការជួយនាំអ្នករស់រានមានជីវិតពីរបបខ្មែរក្រហម នៅក្នុងភូមិឋានរបស់ខ្លួនទៅមន្ទីរសុខភាពក្នុងសហគមន៍»។
លោកបានបន្ថែមថា តាមរយៈការងារស្ម័គ្រចិត្តនេះ យុវជន-យុវនារីទទួលបានឱកាសបង្ហាញចេញនូវភាពជាអ្នកដឹកនាំរួមជាមួយនឹងការបំពេញការងារ ដោយមិនគិតពីប្រយោជន៍ផ្ទាល់ខ្លួនដើម្បីគាំពារដល់អ្នករស់រានមានជីវិត ពីរបបខ្មែរក្រហម ក៏ដូចជាចំពោះប្រជាជាតិកម្ពុជាផងដែរ។
ទន្ទឹមនឹងនេះអ្នករស់រានមានជីវិតពីរបបខ្មែរក្រហមទទួលបានឱកាសចែករំលែករឿងរ៉ាវឆ្លងកាត់ផ្ទាល់ខ្លួននៅក្នុងអំឡុងរបបខ្មែរក្រហមទៅកាន់ក្មេងជំនាន់ក្រោយ ដើម្បីធានាថា យើងនៅតែចងចាំពេលវេលាដ៏លំបាកយ៉ាងខ្លាំងមួយនោះ។
លោកថា ៖ «ជារួម គម្រោងនេះ នឹងរំលេចនូវចរិតមនុស្សធម៌របស់យើង និងពង្រឹងបន្ថែមនូវស្មារតី មិនងាយទ្រុឌទ្រោមរបស់ប្រជាជនកម្ពុជា»។
ទីភ្នាក់ងារជំនួយអាមេរិក (USAID) ប្រចាំកម្ពុជា បានបញ្ជាក់ថា ជាឧទាហរណ៍ខ្លះៗនៃផែនការសកម្មភាពថ្មីទាំងនេះ រួមមានការបង្កើត ជាអាហារូបករណ៍ក្នុងចំនួនកំណត់សម្រាប់សិស្សសិក្សាផ្នែកវេជ្ជសាស្ត្រ សុខភាព ផ្លូវចិត្ត សុខភាពសាធារណៈ និងសុខភាពបឋម។ សកម្មភាពនេះ ថែមទាំងផ្តើមផងដែរ នូវសកម្មភាពស្ម័គ្រចិត្ត ប្រតិបត្តិដោយមជ្ឈមណ្ឌលឯកសារកម្ពុជា ដែលគាំពារដល់អ្នករស់រានមានជីវិតពីរបបខ្មែរក្រហម៕