កោះកុងៈ អភិបាលខេត្ដកោះកុងលោកស្រី មិថុនា ភូថង សម្រេចដកហូតដីជាង ៧៦ ហិកតា ស្ថិតនៅភូមិអណ្តូងទឹក ឃុំអណ្តូងទឹក ស្រុកបទុមសាគរដែលពលរដ្ឋធ្លាប់ចូលទៅកាន់កាប់មកទុកជាសម្បត្តិឯកជនរបស់រដ្ឋវិញ និងបានមោឃភាពរាល់បណ្ណសម្គាល់សិទ្ធិដីធ្លី និងឯកសារផ្សេងៗពាក់ព័ន្ធនឹងដីនៅតំបន់នោះ។
យោងតាមសេចក្តីសម្រេចរបស់លោកស្រី មិថុនា ភូថង ចុះថ្ងៃទី ២១ កញ្ញាបានសម្រេចដកហូតផ្ទៃដីចំនួន ២ និយាមការ ដែលមានទំហំ ២៨៣ ៩១៥ ម៉ែត្រការ៉េ និងផ្ទៃដីទំហំ ៤៧៧ ៥៤៩ ម៉ែត្រការ៉េ ស្ថិតនៅភូមិអណ្តូងទឹក ឃុំអណ្តូងទឹក ស្រុកបទុមសាគរ ខេត្តកោះកុង ជាសម្បត្តិឯកជនរបស់រដ្ឋកាន់កាប់ដោយរដ្ឋបាលខេត្តកោះកុង។
លោក សុខ សុទ្ធី អភិបាលរង និងជាអ្នកនាំពាក្យរដ្ឋបាលខេត្ដកោះកុងប្រាប់ភ្នំពេញប៉ុស្ដិ៍ពីថ្ងៃទី ២២ កញ្ញាថា ការដកហូតដីនេះគឺដើម្បីរក្សាទុកជាដីព្រៃរបស់រដ្ឋ និងស្ដារព្រៃឡើងវិញ។
លោកបានបញ្ជាក់ថា៖ «កាលពីមុនមកប្រជាពលរដ្ឋបានអះអាងថាបានកាន់កាប់ដីនេះ ប៉ុន្ដែក្រោយពីមានអនុក្រឹត្យស្ដីអំពីតំបន់ការពារទៅពលរដ្ឋក៏បានឈប់កាន់កាប់ទៅ»។
លោកបន្តថា៖ «ហើយក្រោយពីការកាត់ឆ្វៀល ពលរដ្ឋក៏យកមកកាន់កាប់ដីនេះសាឡើងវិញ ប៉ុន្ដែរដ្ឋបាលខេត្ដមិនទាន់បានកំណត់យ៉ាងដូចម្ដេចទេ គាត់ត្រូវយកមកវិញ។ អ៊ីចឹងហើយបានជាកន្លែងនោះជាដីដើមស្មាច់បម្រុងល្អ រដ្ឋបាលខេត្ដគិតថា ទុកជា ដីបម្រុងរបស់រដ្ឋហើយស្ដារព្រៃឈើសាឡើងវិញ»។
លោក សុខ សុទ្ធី បានអះអាងថា ដីដែលដកហូតមកជាសម្បត្ដិរបស់រដ្ឋវិញនេះគឺមិនបានធ្វើអនុប្រយោគសម្បទានឱ្យក្រុមហ៊ុនណាមួយទេ។
បើតាមសេចក្ដីសម្រេចរបស់លោកស្រីអភិបាលខេត្ដ ការដកហូតដីនេះគឺយោងតាមការចាំបាច់របស់រដ្ឋបាលខេត្តកោះកុង។
សេចក្ដីសម្រេចបញ្ជាក់ថា ត្រូវទុកជាមោឃៈនូវរាល់បណ្ណសម្គាល់សិទ្ធិកាន់កាប់ប្រើប្រាស់ដីធ្លី បណ្ណសម្គាល់សិទ្ធិកាន់កាប់អចលនទ្រព្យ និងឯកសារផ្សេងៗទៀតដែលបញ្ជាក់ពីសិទ្ធិកាន់កាប់ដីមិនស្របច្បាប់ មានទីតាំងស្ថិតនៅភូមិអណ្តូងទឹកឃុំអណ្តូងទឹក ស្រុកបទុមសាគរ ខេត្តកោះកុង ក្នុងទីតាំងដីដែលមាននិយាមកាដូចដែលរដ្ឋបាលខេត្ដបានកំណត់ក្នុងសេចក្ដីសម្រេចនេះ។
សេចក្ដីសម្រេចបញ្ជាក់ទៀតថា «រដ្ឋបាលស្រុកបទុមសាគរ រដ្ឋបាលឃុំអណ្តូងទឹក ត្រូវសហការជាមួយមន្ទីរអង្គភាពជំនាញជុំវិញខេត្ត ដើម្បីដាំ និងថែទាំដើមស្មាច់ក្នុងទីតាំងដីដែលត្រូវបានដកហូតទុកជាសម្បត្តិឯកជនរបស់រដ្ឋកាន់កាប់ដោយរដ្ឋបាលខេត្តកោះកុងនេះឡើងវិញឱ្យបានល្អប្រសើរ»។
លោក ថោង ច័ន្ទដារ៉ា អ្នកសម្របសម្រួលផ្នែកសិទ្ធិមនុស្សនៃសមាគមអាដហុកប្រចាំខេត្តកោះកុងបានស្នើឱ្យរដ្ឋបាលខេត្ដពិនិត្យឱ្យបានច្បាស់លាស់ចំពោះការដកហូតដីនៅតំបន់នេះ ដើម្បីកុំឱ្យជាន់លើដីដែលពលរដ្ឋជាម្ចាស់កម្មសិទ្ធិ ខណៈពេលនេះនៅក្នុងភូមិអណ្ដូងទឹកមានពលរដ្ឋរស់នៅប្រមាណ ៣០ គ្រួសារ។
លោកបានបន្តថា៖ «ពលរដ្ឋខ្លះគាត់នៅតំបន់នោះយូរឆ្នាំហើយក៏មានពលរដ្ឋមួយចំនួនគាត់ចូលទៅទិញដីនៅតំបន់នោះដែរ ដូច្នេះរដ្ឋបាលខេត្ដធ្វើយ៉ាងណាឱ្យការដកហូតនេះកុំឱ្យមានការប៉ះពាល់ដល់ដីកម្មសិទ្ធិស្របច្បាប់របស់ប្រជាពលរដ្ឋ»។
លោក ច័ន្ទដារ៉ា បានឱ្យដឹងថា ដីនៅតំបន់ភូមិអណ្ដូងទឹកនេះជាដីឧទ្យានជាតិបទុមសាគរ ជាច្រើនឆ្នាំកន្លងមកហើយហើយក្រោយពីឃើញមានដីទំនេរនៅទីនោះ ពលរដ្ឋបានចូលទៅធ្វើស្រែ ដាំដំណាំ នៅតំប់នេះ។
លោកបានបញ្ជាក់ទៀតថា៖ «ការចេញសេចក្ដីសម្រេចដកហូតភ្លាមៗក៏វាអាចមានការប៉ះពាល់ដល់ពលរដ្ឋដែលពួកគាត់រស់នៅយូរហើយនៅក្នុងតំបន់នេះដែរ។ ដូច្នេះបើមានការប៉ះពាល់ដល់ប្រជាពលរដ្ឋរស់នៅជាក់ស្ដែងយូរឆ្នាំនៅក្នុងតំបន់នេះ រដ្ឋបាលខេត្ដគួរតែមានការដោះដូរតាមមធ្យោបាយសមស្របណាមួយដល់ពលរដ្ឋ ដើម្បីពួកគាត់អាចបន្តរស់នៅបាន»៕