ភ្នំពេញៈ គណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេស (គ.វ.ក-១៩) នៃក្រសួងសុខាភិបាលបានប្រកាសដល់ពលរដ្ឋដែលមិនទាន់បានចាក់វ៉ាក់សាំងកូវីដ ១៩ ហើយបានឆ្លងជំងឺនេះត្រូវទៅចាក់វ៉ាក់សាំងដោយស្ម័គ្រចិត្ត ក្រោយពីបានព្យាបាលជាចាប់ពី ៤ ខែឡើងទៅ នៅតាមបណ្តាមន្ទីរពេទ្យថ្នាក់ជាតិ និងមន្ទីរពេទ្យបង្អែកមួយចំនួនក្នុងរាជធានី-ខេត្តដែលកំពុងបើកដំណើរការចាក់ដល់ពលរដ្ឋដែលនៅសេសសល់។
យោងតាមសេចក្តីជូនព័ត៌មានរបស់ក្រសួងសុខាភិបាលនៅថ្ងៃទី ២២ ខែកញ្ញា បានឱ្យដឹងថា ការប្រកាសឱ្យអ្នកដែលជាសះស្បើយពីជំងឺកូវីដ ១៩ ទៅចាក់វ៉ាក់សាំងនេះ ដោយយោងទៅតាមការណែនាំរបស់លោកនាយករដ្ឋមន្ត្រី ហ៊ុន សែន ព្រមទាំងយោងតាមអនុសាសន៍របស់អង្គការសុខភាពពិភពលោក (World Health Organization) ដែលបានណែនាំឱ្យពលរដ្ឋដែលបានព្យាបាលជាសះស្បើយពីជំងឺកូវីដ ១៩ អាចមកទទួលការចាក់វ៉ាក់សាំងបានដើម្បីបង្កើនភាពស៊ាំទប់ទល់នឹងវីរុសកូវីដ ១៩ នេះ។
ក្រសួងបានបញ្ជាក់ថា «សូមប្រជាពលរដ្ឋទាំងអស់ដែលមានអាយុចាប់ពី ៦ ឆ្នាំឡើង ដែលបានព្យាបាលជាសះស្បើយពីជំងឺកូវីដ ១៩ ចាប់ពី ៤ ខែឡើង ហើយមិនទាន់បានចាក់វ៉ាក់សាំងកូវីដ ១៩ សូមទៅចាក់វ៉ាក់សាំងដោយស្ម័គ្រចិត្ត»។
ប្រភពដដែលបានបន្តថា ចំពោះមន្ត្រីរាជការថ្នាក់ជាតិដែលបានព្យាបាលជាសះស្បើយចាប់ពី ៤ ខែឡើង ហើយមិនទាន់បានចាក់វ៉ាក់សាំងកូវីដ ១៩ ត្រូវទៅចាក់វ៉ាក់សាំងនៅមន្ទីរពេទ្យកាល់ម៉ែត មន្ទីរពេទ្យព្រះអង្គឌួង មន្ទីរពេទ្យកុមារជាតិ មន្ទីរពេទ្យមិត្តភាពខ្មែរ-សូវៀត និងមជ្ឈមណ្ឌលជាតិគាំពារមាតា និងទារក។
ចំពោះមន្ត្រីរាជការថ្នាក់ក្រោមជាតិ និងប្រជាពលរដ្ឋទូទៅដែលស្ថិតនៅក្រោមឱវាទរដ្ឋបាលរាជធានីខេត្ត ត្រូវចាក់វ៉ាក់សាំងកូវីដ ១៩ នៅតាមមន្ទីរពេទ្យបង្អែករាជធានី ខេត្ត និងនៅតាមបណ្តាទីតាំងចាក់វ៉ាក់សាំងកូវីដ ១៩ មួយចំនួនទៀតដែលរដ្ឋបាលរាជធានី ខេត្ត កំពុងតែបើកដំណើរការចាក់ដល់ប្រជាពលរដ្ឋដែលនៅសេសសល់។
ក្រសួងសុខាភិបាលបានស្នើឱ្យប្រធានអនុគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌរាជធានី ខេត្តទាំងអស់ត្រូវណែនាំបន្ថែមដល់ប្រធានមន្ទីរសុខាភិបាលរាជធានី ខេត្ត និងគ្រប់ទីតាំងចាក់វ៉ាក់សាំងកូវីដ ១៩ ទាំងអស់ឱ្យផ្ដល់ការចាក់វ៉ាក់សាំងនេះដល់ក្រុមគោលដៅទាំងនេះឱ្យមានភាពរលូន។
លោកស្រី ឱ វណ្ណឌីន អ្នកនាំពាក្យក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេសបានថ្លែងកាលពីថ្ងៃទី ២២ ខែកញ្ញាក្នុងពេលចុះបិទបញ្ចប់យុទ្ធនាការចាក់វ៉ាក់សាំងកូវីដ ១៩ ក្នុងភូមិសាស្ត្រខេត្តតាកែវថា ដើម្បីទប់ទល់នឹងការបំប្លែងថ្មីរបស់វីរុសកូវីដ ១៩ អ្នកដែលជាសះស្បើយពីជំងឺកូវីដ ១៩ ចាប់ពីរយៈពេល ៤ ខែទៅ ៦ ខែក្រោយ គឺអាចទទួលយកនូវការចាក់វ៉ាក់សាំងកូវីដ ១៩ នេះបាន។
លោកស្រីមានប្រសាសន៍ថា៖ «សូមអញ្ជើញមកចាក់ឱ្យបានរួសរាន់ជាទីបំផុតដើម្បីរួមចំណែកបង្កើននូវភាពស៊ាំរបស់ខ្លួនឱ្យកាន់តែខ្លាំងថែមទៀត ហើយការចាក់វ៉ាក់សាំងកូវីដ ១៩ សម្រាប់អ្នកដែលបានជាសះស្បើយហើយនេះគឺត្រូវចាក់ ២ ដូសដែរដែលមានគម្លាតគ្នាពីដូសទី ១ និងដូសទី ២ ចំនួន ២១ ថ្ងៃ»៕