វ៉ាក់សាំងបង្ការជំងឺកូវីដ ១៩ ប្រភេទស៊ីណូវ៉ាក់ចំនួន ៣ លានដូស ដែលជាការបញ្ជាទិញរបស់រាជរដ្ឋាភិបាលកម្ពុជាបានដឹកមកដល់ព្រលានយន្តហោះអន្តរជាតិភ្នំពេញហើយ នាព្រឹកថ្ងៃទី ២៤ ខែកញ្ញា ឆ្នាំ ២០២១ នេះ។
លោកស្រី យក់ សម្បត្តិ រដ្ឋលេខាធិការក្រសួងសុខាភិបាលបានថ្លែងថា នៅថ្ងៃនេះវ៉ាក់សាំងចំនួន ៣ លានដូស បានដឹកមកដល់តាមការគ្រោងទុក ហើយនៅថ្ងៃទី ២៨ ខែកញ្ញា ខាងមុខនេះ វ៉ាក់សាំងចំនួន ៣ លានដូសបន្ថែមទៀត នឹងដឹកមកដល់ទៀត ចំណែក ៣ លានដូសដែលជាការសន្យាការផ្តល់ជូនពីរដ្ឋមន្ត្រីការបរទេសចិន លោក វ៉ាង យី ក៏នឹងមកដល់ឆាប់ៗនេះដែរ។
លោកស្រីបានមានប្រសាសន៍ថា៖ «មកដល់ពេលនេះ កម្ពុជាបានទទួលវ៉ាក់សាំងកូវីដ ១៩ សរុបទាំងអស់ចំនួន ៣៥,៥ លានដូសហើយ។ វ៉ាក់សាំងដែលដឹកមកជាបន្តបន្ទាប់នេះ គឺសម្រាប់ចាក់ជូនដល់ក្រុមកុមារអាយុពី ៦ ឆ្នាំដល់ក្រោម ១២ ឆ្នាំ និងសម្រាប់ចាក់ដូសជំរុញផងដែរ»។
លោកស្រីបានបន្ថែមថា កម្ពុជាមានវ៉ាក់សាំងកូវីដ ១៩ គ្រប់ចំនួនសម្រាប់ចាក់ជូនទៅដល់ប្រជាពលរដ្ឋទាំងកុមារ និងមនុស្សចាស់ទៅតាមផែនការរបស់រាជរដ្ឋាភិបាលដែលបានកំណត់។
លោកស្រី យក់ សម្បត្តិ បានបញ្ជាក់ថា៖ «នៅចំពោះមុខនេះ សម្រាប់ប្រទេសកម្ពុជាគឺបានកំណត់ប្រើប្រាស់វ៉ាក់សាំងស៊ីណូវ៉ាក់ហើយ ដែលប្រមុខរាជរដ្ឋាភិបាលបានសម្រេច និងបានបញ្ជាទិញជាបន្តបន្ទាប់ផងដែរ»។
ជាមួយគ្នានេះដែរ លោកស្រីក៏បានលើកឡើងផងដែរថា ទោះបីជាប្រជាពលរដ្ឋជាច្រើនលាននាក់បានទទួលនូវការចាក់វ៉ាក់សាំងរួចហើយក៏ដោយ តែស្ថានភាពនៃការរីករាលដាលនៃជំងឺកូវីដ ១៩ ពិសេសវីរុសបំប្លែងថ្មីប្រភេទដែលតា (Delta) នៅតែបន្តធ្វើការវាយលុក ពិសេសនៅតាមខេត្តមួយចំនួននៅតាមបណ្តាព្រំដែន ដូចជាខេត្តសៀមរាប ដែលបានបិទខ្ទប់ជាច្រើនកន្លែងផងដែរ ដោយសារការឆ្លងរាលដាលនៃវីរុសនេះ៕