.jpg)
បង្កួយស្លាប ឬបង្កួយហោះដែលមាននៅកម្ពុជា។ រូបថត ក្រសួងបរិស្ថាន
ភ្នំពេញៈ ក្រសួងបរិស្ថាននៅថ្ងៃទី ២២ ខែកញ្ញា បានបង្ហាញវត្តមានបង្កួយហោះ ឬបង្កួយស្លាប ៣ ប្រភេទ ក្នុងចំណោមឧរង្គសត្វ ១៨០ ប្រភេទ ដែលត្រូវបានរកឃើញនៅកម្ពុជា។
របាយការណ៍ជាតិស្តីពីស្ថានភាពជីវចម្រុះនៅកម្ពុជាបង្ហាញថា ក្នុងឆ្នាំ ២០១៦ ឧរង្គសត្វនៅកម្ពុជាមាន ១៧៣ ប្រភេទ ហើយបច្ចុប្បន្នចំនួននេះបានកើនឡើងដល់ ១៨០ ប្រភេទ។ ក្នុងចំណោមឧរង្គសត្វទាំង ១៨០ ប្រភេទនេះ មានបង្កួយហោះចំនួន ៣ ប្រភេទ គឺ Draco indochinensis Smith 1928,Draco maculatus Grey 1845 និង Draco taeniopteru Günther 1861។ នេះបើតាមការបង្ហាញលើហ្វេសប៊ុករបស់ក្រសួងបរិស្ថាននៅថ្ងៃទី ២២ ខែកញ្ញា។
បើតាមក្រសួងបរិស្ថាន Draco indochinensis Smith - 1928 គឺជាប្រភេទបង្កួយហោះដែលមានទីជម្រកជាព្រៃស្រោង និងព្រៃពាក់កណ្តាលស្រោង។ បង្កួយនេះមានខ្នងពណ៌ត្នោតប្រផេះ និងមានស្នាមអុជៗស្បែកគល់ក មានពណ៌ខ្មៅហើយវាអាចហក់ទម្លាក់ខ្លួនពីទីខ្ពស់ទៅទីទាបៗដូចប្រភេទតុកកែហោះដែរ។ វាមានវត្តមានតែនៅកម្ពុជា និងវៀតណាមប៉ុណ្ណោះ។
ហ្វេសប៊ុកក្រសួងបរិស្ថានសរសេរថា៖ «នៅកម្ពុជាបង្កួយនេះត្រូវបានកត់ត្រាដំបូងនៅឧទ្យានជាតិព្រះមុនីវង្ស “បូកគោ” ក្នុងឆ្នាំ ១៩២៨ និងកត់ត្រាឡើងវិញនៅឧទ្យានជាតិវ៉ើនសៃ និងដែនជម្រកសត្វព្រៃកែវសីមាក្នុងឆ្នាំ ២០០៣»។
លោក សុខ វិជ្ជា អ្នកស្រាវជ្រាវជីវចម្រុះនៅកម្ពុជាថ្លែងនៅថ្ងៃទី ២៣ ខែកញ្ញាថា សត្វបង្កួយស្លាប ឬបង្កួយហោះមានដើមកំណើតតែក្នុងប្រទេសកម្ពុជា និងវៀតណាមខាងត្បូង តែប៉ុណ្ណោះ ដែលគេអាចរកឃើញពួកវានៅក្នុងតំបន់ព្រៃធំៗ ឬព្រៃក្រាស់ក្នុងរយៈកម្ពស់ចាប់ពី ៥០០ ម៉ែត្រឡើងទៅ ហើយចូលចិត្តរស់នៅតាមដើមឈើជាងនៅលើដី។
លោកថ្លែងថា៖ «សត្វបង្កួយស្លាបនៅទូទាំងពិភពលោកមានប្រហែលជាង ៤០ ប្រភេទ ដែលភាគច្រើនមានដងខ្លួនខ្លីជាង ៨ ស.ម ហើយភាគច្រើនមានវត្តមាននៅក្នុងព្រៃនៃទ្វីបអាស៊ីអាគ្នេយ៍យើង និងឥណ្ឌាខាងកើត» ។
លោក វិជ្ជា បានបញ្ជាក់ថា នៅកម្ពុជាអាចមានបង្កួយស្លាបពី ២ ទៅ ៣ ប្រភេទឡើងគ្រាន់តែមិនទាន់មានការស្រាវជ្រាវឱ្យបានជាក់លាក់។
យ៉ាងណាក្ដី ក្រសួងបរិស្ថានបង្ហាញថា Draco maculatus Grey 1845 គឺជាប្រភេទបង្កួយហោះមួយប្រភេទទៀតដែលរស់នៅតាមតំបន់ព្រៃស្រោងព្រៃពាក់កណ្តាលស្រោង និងព្រៃរបោះ។ វាមានខ្នងពណ៌ប្រផេះមានស្បែកក និងចុងស្លាបពណ៌លឿង។ បច្ចុប្បន្ន បង្កួយនេះនៅពុំទាន់បានសិក្សាច្បាស់លាស់នៅឡើយ។
អ្នកស្រាវជ្រាវជឿជាក់ថា អាចមានប្រភេទថ្មីមួយចំនួនក្រោមឈ្មោះ Draco maculates នេះ ដែលអ្នកវិទ្យាសាស្ត្រកំពុងសិក្សាពីធនធានពន្ធ ដើម្បីបញ្ជាក់អត្តសញ្ញាណពិតប្រាកដ។ របាយបង្កួយនេះត្រូវបានរកឃើញនៅភាគខាងត្បូងប្រទេសចិន ភូមា ថៃ ឡាវ កម្ពុជា វៀតណាម និងម៉ាឡេស៊ី។
ក្រសួងបរិស្ថានបញ្ជាក់ថា «នៅប្រទេសកម្ពុជាបង្កួយនេះត្រូវបានគេរកឃើញនៅតំបន់ជួរភ្នំក្រវាញខាងលិច និងតាមកោះមួយចំនួនដូចជាកោះកាពិក្នុងខេត្តកោះកុងឆ្នាំ ២០០៧»។
ចំណែក ១ ប្រភេទទៀតគឺ Draco taeniopterusGünther 1861 គឺជាប្រភេទបង្កួយហោះ ដែលរស់នៅតាមតំបន់ព្រៃស្រោង និងព្រៃពាក់កណ្តាលស្រោង។ ជាទូទៅវាមានខ្នងពណ៌បៃតងត្នោត មានស្បែកក និងចុងស្លាបពណ៌ឈាមជ្រូក។
របាយនៃប្រភេទបង្កួយនេះត្រូវបានរកឃើញនៅភាគខាងត្បូងប្រទេសភូមា ថៃ កម្ពុជា ភាគខាងត្បូងប្រទេសវៀតណាម និងឧបទ្វីបម៉ាឡេស៊ី។ នៅប្រទេសកម្ពុជា បង្កួយនេះត្រូវបានរកឃើញតែនៅតំបន់ជួរភ្នំក្រវាញប៉ុណ្ណោះក្នុងឆ្នាំ ២០០៧។
ក្រសួងនេះបានបញ្ជាក់ថា បង្កួយហោះ ឬបង្កួយស្លាប ជាឧរង្គសត្វ ដែលមានស្បែកពិសេសនៅឆ្នឹងជំនីរ អាចត្រដាង ដើម្បីទប់សម្រាលខ្លួននៅពេលវាហក់ពីទីតាំង ១ ទៅទីតាំង ១ ទៀត។ បង្កួយហោះញី ឬឈ្មោល អាចបែងចែកបាននៅពេលពេញវ័យតាមរយៈការសង្កតមើលបួរក (ឈ្មោលមានបួរកវែងជាងញី) ពណ៌ខ្លួន (ឈ្មោលមានពណ៌ច្បាស់ជាងញី) និងប្រវែងខ្លួន (ភាគច្រើនឈ្មោលមានប្រវែងខ្លួនវែងជាងញី)។ បង្កួយប្រភេទនេះ ស៊ីសត្វល្អិតជាអាហារជាពិសេសស្រមោចខ្មៅ ចង្រិត និងកណ្តៀរជាអាហារ៕
វីដេអូ៖
