រដ្ឋបាលខេត្តឧត្តរមានជ័យបានធ្វើការណែនាំបន្ថែមនូវវិធានការ ដើម្បីបង្ការ និងទប់ស្កាត់ការឆ្លងរាលដាលនៃជំងឺកូវីដ ១៩ ក្នុងអំឡុងពិធីបុណ្យកាន់បិណ្ឌ និងភ្ជុំបិណ្ឌក្នុងភូមិសាស្ត្រខេត្តនេះ ដើម្បីទប់ស្កាត់ការឆ្លងរាលដាល សំដៅរួមធានាការពារបានអាយុជីវិតប្រជាពលរដ្ឋ សុខភាពសាធារណៈ និងសណ្តាប់ធ្នាប់សាធារណៈ ព្រមទាំងកាត់បន្ថយឱ្យបានជាអតិបរមានូវផលប៉ះពាល់នៃការឆ្លងរាលដាលនៃជំងឺនេះផងដែរ។
លោក ប៉ែន កុសល្យ អភិបាលខេត្តឧត្តរមានជ័យបានឱ្យដឹងថា ក្នុងនាមគណៈបញ្ជាការឯកភាពរដ្ឋបាលខេត្តឧត្តរមានជ័យ លោកបានសម្រេចដាក់ចេញនូវវិធានការណែនាំអនុវត្តបន្ទាន់ទៅដល់មន្ទីរធម្មការ និងសាសនា និងសមត្ថកិច្ចពាក់ព័ន្ធត្រូវសម្របសម្រួល និងសហការជាបន្ទាន់ជាមួយសាលាគណខេត្ត ទាំងពីរគណៈសាលាអនុគណគ្រប់ក្រុង-ស្រុក ណែនាំដល់គ្រប់វត្តអារាម និងបូជនីយដ្ឋានសាសនានានាឱ្យផ្អាកការរៀបចំពិធី និងកិច្ចសាសនានានាដែលមានលក្ខណៈប្រមូលផ្តុំមនុស្ស ចាប់ពីបិណ្ឌ ៤ រហូតដល់ថ្ងៃភ្ជុំបិណ្ឌ។
លោកថា៖ «ព្រះសង្ឃតាមបណ្តាវត្តអារាមអាចទទួលយកចង្ហាន់ និងទេយ្យទានដែលទាយក ទាយិកា និងពុទ្ធបរិស័ទយកមកវេរប្រគេនបាន តែដាច់ខាតត្រូវរៀបចំយន្តការអនុវត្តជា ចាំបាច់មួយចំនួន គឺគ្រប់ព្រះសង្ឃ ដូនជី តាជី និងពុទ្ធបរិស័ទទាំងអស់ត្រូវពាក់ម៉ាស់គ្រប់ៗគ្នានៅពេលចូលទីវត្តអារាម និងបូជនីដ្ឋានសាសនាជាចាំបាច់»។
លោក ប៉ែន កុសល្យ បានបន្ថែមថា ចាំបាច់ត្រូវរៀបចំឱ្យមានកន្លែងលាងសម្អាតដៃ, ទឹកអាល់កុល ឬជែលលាងដៃ និងមានការវាស់កម្តៅនៅច្រកចេញចូល និងរក្សាការលាងសម្អាតដៃឱ្យបានញឹកញាប់ និងត្រូវរៀបចំឱ្យមានគម្លាតសុវត្ថិភាពបុគ្គល គ្រប់ពេលដែលទាយក ទាយិកា និងពុទ្ធបរិស័ទចូលក្នុងទីវត្តអារាម ព្រះវិហារ សាលាឆាន់ និងក្ដី។ល។
អភិបាលខេត្តរូបនេះបានបន្ថែមថា ត្រូវបន្តអប់រំ ផ្សព្វផ្សាយ និងណែនាំជូនដល់ប្រជាពលរដ្ឋក្នុងមូលដ្ឋានអំពីវិធានការបង្ការ ការពារ និងទប់ស្កាត់ការឆ្លងរីករាលដាលនៃជំងឺកូវីដ ១៩ សំដៅធានាអនុវត្តបាននូវការរស់នៅតាមបែបគន្លងថ្មីជាមួយកូវីដ ១៩ ដោយចាំបាច់ត្រូវអនុវត្តវិធានការ ៣ការពារ និង ៣កុំ ព្រមជាមួយនឹងវិធានការសុខាភិបាលចាំបាច់ផ្សេងៗទៀត សំដៅបង្ការ និងទប់ស្កាត់ការឆ្លងរាលដាលនៃជំងឺកូវីដ ១៩ ឱ្យបានខ្ជាប់ខ្លួន និងគ្រប់ៗគ្នា។
លោក ប៉ែន កុសល្យ បានឱ្យដឹងថា៖ «ខ្ញុំសង្ឃឹមជឿជាក់យ៉ាងមុតមាំថា លោកអភិបាលក្រុង-ស្រុក ដែលជាប្រធានគណៈបញ្ជាការឯកភាពរដ្ឋបាល ក្រុង-ស្រុក ប្រធានមន្ទីរអង្គភាពពាក់ព័ន្ធ មេបញ្ជាការកងកម្លាំងទាំង ៣ ប្រភេទរបស់ខេត្ត និងបងប្អូនប្រជាពលរដ្ឋនឹងបន្តចូលរួមសហការណ៍អនុវត្តដើម្បីប្រយុទ្ធ និងទប់ស្កាត់ការឆ្លងរាលដាលនៃជំងឺកូវីដ ១៩»៕