The Phnom Penh Post Search

Search form

Logo of Phnom Penh Post newspaper Phnom Penh Post - បន្ត​បិទ​តំបន់​ក្រហម​នៅ​សៀមរាប ខណៈ​​ស្វាយរៀង​បើក​ឱ្យ​លក់ដូរ​នៅ​ផ្សារ​វាលយន្ត




បន្ត​បិទ​តំបន់​ក្រហម​នៅ​សៀមរាប ខណៈ​​ស្វាយរៀង​បើក​ឱ្យ​លក់ដូរ​នៅ​ផ្សារ​វាលយន្ត

Content image - Phnom Penh Post
ផ្សារ​វាលយន្ត ដែលត្រូវបានដាក់ឱ្យដំណើរការឡើងវិញ។ រូបថត Covid-19 tracing sub-commission

បន្ត​បិទ​តំបន់​ក្រហម​នៅ​សៀមរាប ខណៈ​​ស្វាយរៀង​បើក​ឱ្យ​លក់ដូរ​នៅ​ផ្សារ​វាលយន្ត

សៀមរាបៈ ​អាជ្ញាធរខេត្ត​សៀមរាប​សម្រេច​បន្ត​បិទខ្ទប់ និង​កំណត់​ជា​ “​តំបន់​ក្រហម​” ​ក្នុង​​ភូមិ​កំពង់ និង​ភូមិ​ស្រម៉ ឃុំ​ជីក្រែង ស្រុក​ជីក្រែង​ ១ ​សប្តាហ៍​ទៀត ដើម្បី​ទប់ស្កាត់​កុំឱ្យ​ជំងឺ​កូវីដ​ ១៩ ​រាលដាល​ទៅ​តំបន់​ផ្សេងៗ​​ទៀត ខណៈ​ខេត្តស្វាយរៀង​បើក​ដំណើរការ​ផ្សារ​វាល​យន្ត​ឡើងវិញ​ចាប់ពី​ថ្ងៃ​ ២៦ ​កញ្ញា​ទៅ​។

លោក​ ទៀ សីហា អភិបាលខេត្ត​សៀមរាប​នៅ​ថ្ងៃទី​ ២៥ ​កញ្ញា បាន​ចេញ​លិខិត​បន្ត​បិទខ្ទប់ និង​កំណត់​ជា​ “​តំបន់​ក្រហម​” ក្នុង​ភូមិសាស្ត្រ​ភូមិ​កំពង់ និង​ភូមិ​ស្រម៉ ឃុំ​ជីក្រែង ស្រុក​ជីក្រែង ខេត្តសៀមរាប ដែល​ជា​តំបន់​មាន​ការឆ្លង​រាលដាល​នៃ​ជំងឺ​កូវីដ​ ១៩ ជា​បណ្តោះអាសន្ន​រយៈពេល ១ សប្តាហ៍​ទៀត​។

ការបន្ត​បិទ​នេះ​ធ្វើឡើង​រហូតដល់​ថ្ងៃទី​ ២ ខែតុលា ឆ្នាំ​ ២០២១​ ​ដើម្បី​ធានា​ប្រសិទ្ធភាព​នៃ​ការគ្រប់គ្រង​ការឆ្លង​រាលដាល​នៃ​ជំងឺ​កូវីដ​ ១៩ ​ក្នុង​ភូមិសាស្ត្រ​នេះ​​មិនឱ្យ​ឆ្លង​រាលដាល​ទៅ​តំបន់​ផ្សេងៗ​រហូតដល់​មាន​ការចេញ​សេចក្តីសម្រេច​ថ្មី​។

កាលពី​ថ្ងៃ​ ១៩ កញ្ញា ឆ្នាំនេះ​​អាជ្ញាធរខេត្ត​នេះ​ធ្លាប់បាន​​បិទខ្ទប់ និង​កំណត់​ភូមិសាស្ត្រ​ភូមិ​កំពង់ និង​ភូមិ​ស្រម៉ ឃុំ​ជីក្រែង​ស្រុក​ជីក្រែង​នេះ​ជា​ “​តំបន់​ក្រហម​”​ រយៈពេល​ ១ ​សប្ដាហ៍​មកហើយ ដើម្បី​ទប់ស្កាត់​ការឆ្លង​រាលដាល​នៃ​ជំងឺ​កូវីដ​ ១៩ ក៏ប៉ុន្តែ​​ដោយសារ​ស្ថានភាព​កូវីដ​មិនទាន់​ប្រសើរ ខេត្ត​ក៏​សម្រេច​អនុវត្ត​បន្ត​រហូតដល់​មាន​បទប្បញ្ញត្តិ​ថ្មី​មក​ជំនួស​។

បើតាម​លោក ទៀ សីហា បទប្បញ្ញត្តិ​ទាំងឡាយ​ណា​របស់​រដ្ឋបាល​ខេត្តសៀមរាប​ដែលមាន​ខ្លឹមសារ​ផ្ទុយ​នឹង​សេចក្តី​សម្រេច​ថ្មី​នេះ​ត្រូវ​ទុកជា​និរាករណ៍​។ ​លោក​បញ្ជាក់ថា​៖ «​បទប្បញ្ញត្តិ​ទាំងឡាយ​ណា​ដែល​មិនបាន​ដាក់ចេញ​ ដើម្បី​ប្រយុទ្ធ​ និង​ទប់ស្កាត់​ការឆ្លង​រាលដាល​​នៃ​ជំងឺ​កូវីដ​ ១៩ ​មុនពេល​សេចក្តី​សម្រេច​នេះ​ចូល​ជា​ធរមាន​​ហើយ​ដែល​មិន​ផ្ទុយ​នឹង​សេចក្តីសម្រេច​នេះ​ត្រូវមាន​អានុភាព​អនុវត្ត​បន្ត​រហូតដល់​មាន​លិខិតបទដ្ឋាន​គតិយុត្ត​ថ្មី​មក​ជំនួស​» ។

ដោយឡែក រដ្ឋបាលខេត្ត​ស្វាយរៀង​បានសម្រេច​អនុញ្ញាត​ឱ្យ​បើក​ដំណើរការ​ឡើងវិញ​នូវ​ការធ្វើ​អាជីវកម្ម​តូប​លក់ដូរ​នៅ​ផ្សារ​វាលយន្ត​ស្ថិតនៅ​ភូមិ​វាលយន្ត សង្កាត់​ស្វាយរៀង ក្រុង​ស្វាយរៀង ចាប់ពី​ថ្ងៃទី​ ២៦ ខែកញ្ញា តទៅ​។ នេះ​បើតាម​លិខិត​របស់លោក​អភិបាលខេត្ត ម៉ែន វិបុល នៅ​ថ្ងៃទី​ ២៦ ខែកញ្ញា ។

តាមរយៈ​លិខិត​សម្រេច​អនុញ្ញាត​ឱ្យ​បើក​ដំណើរការ​ឡើងវិញ​នេះ លោក ម៉ែន វិបុល បានបញ្ជាក់​ប្រាប់​ទៅកាន់​អាជ្ញាធរ​មាន​សមត្ថកិច្ច​គ្រប់​លំដាប់ថ្នាក់​ត្រូវ​ផ្សព្វផ្សាយ និង​ណែនាំ​ដល់​អាជីវករ និង​អ្នកពាក់ព័ន្ធ​ឱ្យ​អនុវត្ត​ម៉ឺងម៉ាត់​តាម​វិធានការ​៣កុំ ៣ការពារ​របស់​រាជរដ្ឋាភិបាល​ផងដែរ​៕

អត្ថបទគួរចាប់អារម្មណ៍