.jpg)
ក្រុមការងារអន្តរាគមន៍បង្ក្រាបបទល្មើសចរាចរណ៍សត្វ និងផលិតផល ឃាត់រថយន្ត ១ គ្រឿង ដឹកជើងមាន់ប្រមាណ ១៧ ១០០ គីឡូក្រាម កាលពីយប់ ថ្ងៃទី ២៣ ខែកញ្ញ។ រូបថត CCF
ភ្នំពេញៈ ក្រុមការងារអន្តរាគមន៍បង្ក្រាបបទល្មើសចរាចរណ៍សត្វ និងផលិតផលមានដើមកំណើតពីសត្វបានឃាត់រថយន្ត ១ គ្រឿង ដឹកជើងមាន់ប្រមាណ ១៧ ១០០ គីឡូក្រាម កាលពីយប់ ថ្ងៃទី ២៣ ខែកញ្ញា នាំចេញពីប្រទេសថៃដោយខុសច្បាប់។
លោក ហ៊ុន សារ៉ាត់ ប្រធានក្រុមការងារអន្តរាគមន៍បង្ក្រាបបទល្មើសចរាចរណ៍សត្វ និងផលិតផលមានដើមកំណើតពីសត្វ បានប្រាប់ ភ្នំពេញ ប៉ុស្តិ៍ នៅថ្ងៃទី ២៦ ខែកញ្ញាថា ក្រុមការងារអន្តរាគមន៍បានចុះស្ទាក់ចាប់រថយន្ត ១ គ្រឿង ម៉ាក HYUNDAI ប្រភេទដឹកទំនិញចំណុះ ២០ តោន នៅភូមិបន្ទាយស្រី ឃុំខ្នារសណ្ដាយ ស្រុកបន្ទាយស្រី ខេត្តសៀមរាប នៅពេលឈ្មួញបានព្យាយាមដឹកផលិតផលទាំងនេះពីប្រទេសថៃ តាមច្រកអូរស្មាច់ សង្កាត់អូរស្មាច់ ខេត្តឧត្តរមានជ័យ ឆ្ពោះទៅចែកចាយនៅរាជធានីភ្នំពេញ ដោយពុំមានលិខិតអនុញ្ញាតអ្វីទាំងអស់។
លោកបានថ្លែងថា៖ «ក្រុមការងារបានបញ្ជូនវត្ថុតាងទៅរក្សាទុកនៅទីតាំងចត្តាឡីស័កសត្វរបស់ឣគ្គនាយកដ្ឋានសុខភាពសត្វ និងផលិតកម្មសត្វ ដើម្បីរង់ចាំលទ្ធផលសំណាក។ មកដល់ពេលនេះ សំណាកវិភាគនៅមិនទាន់ទទួលបានលទ្ធផលនៅឡើយទេ តែបើពិនិត្យឃើញថា មានសារធាតុហាមឃាត់ណាមួយនោះ យើងនឹងដុតកម្ទេចចោលភ្លាមៗ»។
លោក សារ៉ាត់ ថ្លែងថា នៅថ្ងៃ ២៦ កញ្ញានេះ ក្រុមការងារអន្តរាគមន៍ក៏បានសហការជាមួយអាជ្ញាធរខេត្តកំពង់ចាម ស្ទាក់ចាប់រថយន្តដឹកផលិតផលសាច់ខុសច្បាប់ ១ ករណីទៀតផងដែរ។ ចំពោះបទល្មើសនេះ ក្រុមការងារអន្តរាគមន៍កំពុងបញ្ជូនរថយន្តមកអគ្គនាយកដ្ឋានរាជធានីភ្នំពេញ ដើម្បីចាត់ការតាមនីតិវិធីច្បាប់។
លោកថា៖ «យើងចាប់បានហើយ ឡាននេះ ដឹកចេញពីច្រកអូរស្មាច់ សង្កាត់អូរស្មាច់ ខេត្តឧត្តរមានជ័យដូចគ្នា ហើយឆ្លងកាត់ខេត្តកំពង់ចាម ហើយជំនាញយើងបានឃាត់ និងបញ្ជូនមកត្រួតពិនិត្យនៅភ្នំពេញ។ យើងមិនទាន់បើកទ្រុងឡាននោះមើលទេ ដូច្នេះក៏មិនទាន់ដឹងជាប្រភេទសាច់អ្វី ឬប៉ុន្មានគីឡូដែរ»។ លោកថា បើទោះជាបច្ចុប្បន្ននៅតែមានឈ្មួញលួចនាំផលិតផលសាច់ដោយខុសច្បាប់ពីប្រទេសថៃ និងឡាវ តាមច្រកព្រំដែន ដើម្បីមកចែកចាយក្នុងប្រទេស ប៉ុន្តែបទល្មើសទាំងនេះ គឺមានការថយពី ៦០ ភាគរយ មកនៅប្រមាណ ៣០ ភាគរយប៉ុណ្ណោះ៕
