ភ្នំពេញៈ សម្តេចព្រះសង្ឃនាយករងទី ១ នៃគណៈសង្ឃនាយកនៃព្រះរាជាណាចក្រកម្ពុជា សម្តេចព្រះពោធិវ័ង្ស អំ លឹមហេង បានអំពាវនាវដល់ព្រះសង្ឃ និងពុទ្ធបរិស័ទទាំងអស់មានការយោគយល់ពីស្ថានភាពដ៏លំបាកនៃការរីករាលដាលវីរុសកូវីដ ១៩ ក្នុងពិធីបុណ្យកាន់បិណ្ឌ និងភ្ជុំបិណ្ឌ ហើយត្រូវបន្តរួមគ្នាប្រយុទ្ធប្រឆាំងនឹងការរីករាលដាលនៃជំងឺនេះ។
សម្តេចព្រះពោធិវ័ង្ស អំ លឹមហេង លើកឡើងក្នុងលិខិតនាថ្ងៃទី ២៦ ខែកញ្ញា ថា ក្នុងរយៈពេលប៉ុន្មានថ្ងៃនៃការចាប់ផ្តើមប្រារព្ធពិធីបុណ្យកាន់បិណ្ឌ និងភ្ជុំបិណ្ឌនេះមានការឆ្លងរាលដាលនៃជំងឺកូវីដ ១៩ ចូលក្នុងវត្តអារាម ជាពិសេសតាមបណ្តាវត្តមួយចំនួនក្នុងរាជធានី-ភ្នំពេញ។
ព្រះអង្គមានថេរដីកាថា៖ «គណៈសង្ឃនាយក សូមសម្តែងនូវការព្រួយបារម្ភជាខ្លាំង និងសូមគាំទ្រចំពោះចំណាត់ការរបស់រាជរដ្ឋាភិបាលប្រកបដោយគតិបណ្ឌិត និងគិតគូរពីបញ្ហាសុខភាពសាធារណៈរបស់រាជរដ្ឋាភិបាលកម្ពុជា ស្តីពីការផ្អាកការរៀបចំពិធីបុណ្យកាន់បិណ្ឌ និងភ្ជុំបិណ្ឌ ដើម្បីទប់ស្កាត់ការរីករាលដាលនៃជំងឺកូវីដ ១៩»។
ដើម្បីចូលរួមគាំទ្រដល់វិធានការរបស់រាជរដ្ឋាភិបាលកម្ពុជាក្នុងការប្រយុទ្ធប្រឆាំងការរីករាលដាលនៃជំងឺកូវីដ ១៩ គណៈសង្ឃនាយកនៃព្រះរាជាណាចក្រកម្ពុជាអំពាវនាវដល់ព្រះសង្ឃ និងពុទ្ធបរិស័ទទាំងអស់ដែលមិនបានចូលរួមប្រារព្ធពិធីបុណ្យកាន់បិណ្ឌ និងភ្ជុំបិណ្ឌឱ្យបានពេញលេញតាមទំនៀមទម្លាប់ប្រពៃណីជាតិពីបុរាណមក មេត្តាយោគយល់ពីស្ថានភាពដ៏លំបាកនេះ។
សម្តេចព្រះពោធិវ័ង្ស អំ លឹមហេង បញ្ជាក់ថា៖ «ចំពោះព្រះសង្ឃដែលមានវិជ្ជមានកូវីដ ១៩ ត្រូវសហការជាមួយអាជ្ញាធរមានសមត្ថកិច្ច ដើម្បីព្យាបាលតាមការចាត់ចែងរបស់មន្ត្រីសុខាភិបាល»។
ព្រះអង្គបន្ថែមថា៖ «ដោយឡែក ចំពោះព្រះសង្ឃតាមបណ្តាវត្តអារាមទាំងអស់ សូមគោរពវត្តប្រតិបត្តិ កិច្ចវត្ត ព្រឹក ល្ងាច ស្របតាមត្រៃសិក្ខា មាន សីល សមាធិ បញ្ញា និងអនាម័យ ជាប់ជាប្រចាំ។ ជាពិសេសអនុវត្តតាមវិធានការ ៣កុំ ៣ការពារ ឱ្យបានខ្ជាប់ខ្ជួន ចៀសវាងការឆ្លងរាលដាលបន្ថែមទៀត»។
ទន្ទឹមនឹងនេះ គណៈសង្ឃនាយកគាំទ្រនូវការដាក់ចេញវិធានការទាន់ពេលវេលាក្នុងការទប់ស្កាត់ ការឆ្លងរាលដាលទ្រង់ទ្រាយធំទូទាំងប្រទេសនៃជំងឺកូវីដ ១៩។ ជាពិសេសមេរោគបំប្លែងខ្លួនថ្មីប្រភេទដែលតា (Delta) ដែលមានកម្រិតនៃការឆ្លងរាលដាលឆាប់រហ័ស។
កាលពីថ្ងៃទី ២៦ ខែកញ្ញា អភិបាលរាជធានីភ្នំពេញលោក ឃួង ស្រេង បានបញ្ជាទៅគ្រប់អាជ្ញាធរខណ្ឌទាំងអស់ត្រូវធ្វើការបាញ់ថ្នាំសម្លាប់មេរោគកូវីដ-១៩ នៅតាមបណ្តាទីវត្តអារាមទាំងអស់ជាង ១៥០ វត្ត។ ការបាញ់ថ្នាំនេះត្រូវបានកងប្រតិបត្តិការរុករក និងសង្គ្រោះគ្រោះមហន្តរាយ ៧១១ កងពលតូចលេខ ៧០ ចុះបាញ់ថ្នាំសម្លាប់មេរោគតាមបណ្តាវត្តអារាមទាំងអស់នោះ។
យោងតាមកងពលតូចលេខ ៧០ បានឱ្យដឹងថា កងប្រតិបត្តិការរុករក និងសង្គ្រោះគ្រោះមហន្តរាយ ៧១១ បានសហការជាមួយអាជ្ញាធរខណ្ឌទាំង ១៤ ចុះបាញ់ថ្នាំសម្លាប់មេរោគការពារជំងឺកូវីដ ១៩ នៅតាមបណ្តាវត្តអារាមចំនួន ១៥៣ វត្ត ទូទាំងរាជធានីភ្នំពេញ។ កងប្រតិបត្តិការរុករក និងសង្គ្រោះគ្រោះមហន្តរាយ ៧១១ បានបែងចែកជា ៦ ក្រុម ដើម្បីបាញ់ថ្នាំសម្លាប់មេរោគជំងឺកូវីដ ១៩ នៅតាមបណ្តាវត្តអារាមទាំង ១៥៣ វត្តនេះផងដែរ។
ការបាញ់សម្លាប់មេរោគនេះ ធ្វើឡើងបន្ទាប់ពីមានការផ្ទុះឡើងនូវការឆ្លងវីរុសកូវីដ ១៩ ក្នុងវត្តអារាមនាពិធីបុណ្យកាន់បិណ្ឌថ្ងៃទី ១ និងទី ២ នៅតាមបណ្តាវត្តអារាមមួយចំនួនក្នុងរាជធានីភ្នំពេញ។
លោក ហែម ដារិទ្ធ អភិបាលខណ្ឌពោធិ៍សែនជ័យថ្លែងកាលពីថ្ងៃទី ២៦ កញ្ញា ក្នុងពេលចុះជួបក្រុមកងប្រតិបត្តិការរុករក និងសង្គ្រោះគ្រោះមហន្តរាយ-៧១១ ត្រៀមបាញ់ថ្នាំសម្លាប់មេរោគនៅវត្តពោធិ៍ចិនតុង ថា តំបន់មួយចំនួនក្នុងមូលដ្ឋានខណ្ឌរបស់លោកធ្លាប់ជាតំបន់ក្រហមដែលត្រូវមានការប្រុងប្រយ័ត្នខ្ពស់។
ក្នុងខណ្ឌពោធិ៍សែនជ័យមានវត្តអារាមចំនួន ១៤ ព្រះសង្ឃជិត ៨០០ អង្គ ដែលក្នុងចំណោមព្រះសង្ឃទាំងអស់នេះមានព្រះសង្ឃ និងអ្នកស្នាក់នៅក្នុងវត្តមានវិជ្ជមានកូវីដ ១៩ ចំនួន ៤ អង្គ/នាក់។
លោក ហែម ដារិទ្ធ បញ្ជាក់ថា៖ «ក្រោមការណែនាំរបស់ឯកឧត្តម ឃួង ស្រេង យើងបានអនុវត្តនូវវិធានការពារពីវីរុសកូវីដ ១៩ យ៉ាងតឹងរ៉ឹងបំផុត ហើយយើងទប់ស្កាត់បានទាន់ពេលវេលាផងដែរ»។
ប្រធានមន្ទីរធម្មការ និងសាសនារាជធានីភ្នំពេញលោក ទេព គង្គា ប្រាប់ ភ្នំពេញ ប៉ុស្តិ៍ កាលពីថ្ងៃទី ២៦ កញ្ញា ថា ព្រះសង្ឃ និងអ្នកស្នាក់នៅវត្តចំនួន ១៤១ អង្គ/នាក់ ត្រូវបានរកឃើញវិជ្ជមានវីរុសកូវីដ ១៩ ក្នុងនោះមានព្រះសង្ឃចំនួន ៩៧ អង្គ។
លោកនាយករដ្ឋមន្ត្រី ហ៊ុន សែន កាលពីយប់ថ្ងៃទី ២៣ កញ្ញា បានចេញសេចក្តីសម្រេចផ្អាកការរៀបចំពិធីបុណ្យកាន់បិណ្ឌ និងភ្ជុំបិណ្ឌ ចាប់ពីបិណ្ឌទី ៤ រហូតដល់ថ្ងៃភ្ជុំបិណ្ឌ ដើម្បីទប់ស្កាត់ការឆ្លងរាលដាលនៃជំងឺកូវីដ ១៩ ក្រោយពិនិត្យឃើញមានការជួបជុំ និងប្រមូលផ្តុំមនុស្សជាច្រើននៅតាមបណ្តាវត្តអារាម និងមានការឆ្លងរាលដាលនៃវីរុសនេះផងដែរ៕
វីដេអូ៖