ភ្នំពេញៈ ក្រុមប្រឹក្សាជាតិប្រាក់ឈ្នួលអប្បបរមា បានបើកកិច្ចប្រជុំចរចាកំណត់ប្រាក់ឈ្នួលសម្រាប់វិស័យកាត់ដេរនិងផលិតស្បែកជើងនៅកម្ពុជា ឆ្នាំ២០២២ នៅថ្ងៃទី២៨ កញ្ញា ហើយប្រសិនបើក្នុងករណីគ្មានការឯកភាពគ្នាកំណត់ចំនួនប្រាក់ឈ្នួល ដែលភាគីពាក់ព័ន្ធបានលើកយកមកចរចានោះ នឹងមានការបោះឆ្នោត ដើម្បីសម្រេចលទ្ធផលណាមួយជាចុងក្រោយ។
ភាគីដែលចូលរួមក្នុងកិច្ចចរចាកំណត់ប្រាក់ឈ្នួលនៅពេលនេះ មានតំណាងមកពីក្រសួងការងារ និងបណ្តុះបណ្តាលវិជ្ជាជីវៈ តំណាងនិយោជិក និងតំណាងនិយោជក ដែលធ្វើឡើងនៅទីស្តីការក្រសួងការងារ។
កាលពីថ្ងៃទី២១ ខែកញ្ញា ក្រុមប្រឹក្សាជាតិប្រាក់ឈ្នួលអប្បបរមា បានបន្តការចរចាជាលក្ខណៈត្រីភាគីជាលើកទី៣ ដោយក្នុងនោះ តួលេខ ដែលភាគី នីមួយៗ បានកំណត់ គឺខាង សហជីពស្នើរតួលេខ ២០៤ដុល្លារ ចំណែកភាគីនិយោជកស្នើតួលេខ ១៨៨ដុល្លារ និងភាគីរាជរដ្ឋាភិបាលស្នើរក្សា ១៩២ដុល្លារ ឲ្យនៅដដែល។
ប្រាក់ឈ្នួលអប្បបរមា សម្រាប់វិស័យកាត់ដេរនិងផលិតស្បែកជើង ឆ្នាំ ២០២១ គឺមានចំនួន ១៩២ ដុល្លារ៕