ភ្នំពេញៈ នគរបាលខណ្ឌដង្កោបានឃាត់ខ្លួនជនសង្ស័យចំនួន ៥ នាក់ពីថ្ងៃទី ២៦ កញ្ញា នៅបុរីពិភពថ្មីក្នុងសង្កាត់ព្រៃស ខណ្ឌដង្កោ រាជធានីភ្នំពេញ បន្ទាប់ពីសមត្ថកិច្ចទទួលព័ត៌មានពីជនរងគ្រោះម្នាក់ដែលថា ក្រុមនេះមានជាប់ពាក់ព័ន្ធនឹងករណីស្ទាក់វាយប្លន់យកម៉ូតូគាត់។
លោក ជឹម ស៊ីថា អធិការនគរបាលខណ្ឌដង្កោប្រាប់ភ្នំពេញប៉ុស្តិ៍ នៅថ្ងៃទី ២៧ កញ្ញាថា ក្រុមចោរប្លន់នេះសុទ្ធតែជាយុវជន ហើយក៏ជាក្រុមប្លន់ដ៏សកម្មដែលតែងធ្វើសកម្មភាពប្លន់តាមតំបន់ផ្សេងៗនៅជាយរាជធានីភ្នំពេញ ពិសេសក្នុងភូមិសាស្ត្រទឹកដីខណ្ឌដង្កោ។
លោកបន្តថា៖ «នៅថ្ងៃនេះ (ថ្ងៃទី ២៧ កញ្ញា) សមត្ថកិច្ចជំនាញខ្ញុំកំពុងបន្តនីតិវិធីសាកសួរ ដើម្បីធ្វើរបាយកាណ៍។ ក្រុមនេះតែងបង្កអសន្តិសុខដល់អ្នកដំណើរ»។
លោក ជាង ហុកសែ អធិការរងទទួលផែនការងារនគរបាលព្រហ្មទណ្ឌខណ្ឌដង្កោឱ្យដឹងនៅថ្ងៃទី ២៧ កញ្ញាដែរថា សមត្ថកិច្ចរបស់លោកបានឃាត់ខ្លួនក្រុមចោរប្លន់ចំនួន ៥ នាក់ នៅបុរីពិភពថ្មី សង្កាត់ព្រៃស ខណ្ឌដង្កោកាលពីថ្ងៃទី ២៦ កញ្ញា។ ការឃាត់ខ្លួនក្រុមចោរប្លន់ទាំងនេះ បន្ទាប់ពីសមត្ថកិច្ចរបស់លោកទទួលបានសេចក្តីរាយការណ៍ពីពលរដ្ឋរងគ្រោះម្នាក់ដែលផ្តល់ព័ត៌មានថាក្រុមនេះបានប្លន់ម៉ូតូគាត់ពីថ្ងៃទី ២៥ កញ្ញា ក្នុងបុរីពិភពថ្មីក្នុងសង្កាត់ព្រៃស។
យ៉ាងណាក្ដីលោក ជាង ហុកសែ មិនបានបង្ហាញឈ្មោះក្រុមជនទាំងនោះទេ ដោយគ្រាន់តែបញ្ជាក់ថា៖ «ពួកគេសកម្មក្នុងការវាយ និងកាប់ជនរងគ្រោះអ្នកដំណើរតាមផ្លូវ។ តែមិនទាន់ដល់សម្លាប់មនុស្សទេ»។
លោកបានបន្តថា ក្រុមជនសង្ស័យត្រូវបានសមត្ថកិច្ចរបស់លោកឃាត់ខ្លួននៅ ៣ ទីតាំងផ្សេងៗគ្នា ក្នុងនោះទីតាំងទី ១ ស្ថិតនៅសង្កាត់សាក់សំពៅក្នុងទឹកដីខណ្ឌដង្កោ។ ចំណែកនៅទីតាំង ២ ផ្សេងទៀតស្ថិតនៅភូមិឫស្សី និងភូមិថ្មីក្នុងសង្កាត់ស្ទឹងមានជ័យ ៣ ខណ្ឌមានជ័យ ជាទីដែលពួកគេនាំគ្នាជួលបន្ទប់ស្នាក់នៅ ដើម្បីចេញធ្វើសកម្មភាពប្លន់។
បើតាមលោក ហុកសែ ក្រុមចោរប្លន់ទាំងនេះបានសារភាពថា ពួកគេធ្លាប់ធ្វើសកម្មភាពប្លន់នៅសង្កាត់ព្រៃស ខណ្ឌដង្កោបានចំនួន ២ ដង។ ក្នុងនោះកាប់បណ្តាលឱ្យជនរងគ្រោះរបួសម្នាក់ ប្លន់យកម៉ូតូ។ ចំណែកប្លន់យកម៉ូតូ ១ លើកទៀត គឺនៅផ្លូវជាតិលេខ ៥១ (តភ្ជាប់ពីថ្នល់ទទឹងទៅផ្លូវជាតិលេខ ៥) តែមិនបណ្តាលឱ្យម្ចាស់ម៉ូតូគ្រោះថ្នាក់ដល់ជីវិតទេ។
លោកបានបញ្ជាក់ថា ក្រុមចោរប្លន់ទាំងនេះសមត្ថកិច្ចរបស់លោកនឹងបញ្ជូនខ្លួនក្រុមនេះទៅសាលាដំបូងរាជធានីភ្នំពេញបន្តទៀត នៅពេលបញ្ចប់ការសួរចម្លើយ ដើម្បីចាត់ការតាមផ្លូវច្បាប់៕