ភ្នំពេញៈ លោក អ៊ិត សំហេង រដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈ បានតម្រូវឱ្យម្ចាស់ ឬនាយករោងចក្រ សហគ្រាស ត្រូវធ្វើតេស្តរកមេរោគកូវីដ១៩ ដល់កម្មករនិយោជិតរបស់ខ្លួន ក្រោយពេលឈប់សម្រាកក្នុងពិធីបុណ្យភ្ជុំបិណ្ឌ ហើយចំពោះកម្មករនិយោជិតណាដែលមិនព្រមចូលធ្វើតេស្ត នឹងត្រូវចាត់ទុកថាបានល្មើសធ្ងន់ចំពោះ វិធានខាងវិន័យសន្តិសុខ និងអនាម័យ ដែលនិយោជកអាចបញ្ឈប់ពីការងារបាន។
យោងតាមសេចក្តីណែនាំរបស់រដ្ឋមន្ត្រីក្រសួងការងារ និង បណ្តុះបណ្តាលវិជ្ជាជីវៈ នៅថ្ងៃទី២៨ ខែកញ្ញានេះ បានឱ្យដឹងថា ដើម្បីរក្សាបាននូវសកម្មភាពអាជីវកម្ម ផលិតកម្ម និងការផ្តល់សេវាកម្ម ក៏ដូចជា ចូលរួមចំណែកប្រយុទ្ធ និង ទប់ស្កាត់ការរីករាលដាលទ្រង់ទ្រាយធំនៃជំងឺកវីដ១៩ បណ្តាលមកពីមេរោគបម្លែងថ្មីប្រភេទដែលតា (Delta) នៅតាម រោងចក្រ សហគ្រាស ក្រោយពេលឈប់សម្រាកក្នុងពិធីបុណ្យភ្ជុំបិណ្ឌ ក្រសួងសុំណែនាំដល់ម្ចាស់ ឬ នាយករោងចក្រ សហគ្រាស ត្រូវត្រៀមតេស្តរហ័សសម្រាប់ធ្វើតេស្តដល់កម្មករនិយោជិតរបស់ខ្លួនក្រោយបុណ្យភ្ជុំរួច។
លោក សំហេង ថ្លែងថា៖ «ការធ្វើតេស្តរហ័សរកមេរោគកូវីដ១៩ នេះ គឺជាបន្ទុករបស់ម្ចាស់ ឬ នាយករោងចក្រ សហគ្រាស។ ទន្ទឹមនឹងនេះ កម្មករនិយោជិតទាំងអស់ ត្រូវជូនដំណឹងមកក្រសួង ក្នុងករណីនិយោជកមិនបានធ្វើតេស្ករហ័សរកមេរោគកវីដ១៩ ដល់កម្មករនិយោជិត ក្រោយពេលឈប់សម្រាកក្នុងពិធីបុណ្យភ្ជុំបិណ្ឌនេះ»។
លោកថា កម្មករនិយោជិតដែលបានឈប់សម្រាកក្នុងពិធីបុណ្យភ្ជុំបិណ្ឌនេះ ត្រូវអនុវត្តឱ្យបានខ្ជាប់ខ្ជួននូវវិធានការ ៣ការពារ និង៣កុំ ជាពិសេសពាក់ម៉ាស់ លាងដៃញឹកញាប់នឹងសាប៊ូ រក្សាគម្លាតសុវត្ថិភាពបុគ្គលក្នុងពេលធ្វើដំណើរដោយរថយន្តរួម និងត្រូវយកតាមខ្លួននូវទឹកអាល់កុល ឬអាល់កុលដែលលាងដៃ៕