.jpg)
កម្មករកាត់ដេរបំពេញការងារនៅរោងចក្រ១ក្នុងតំបន់សេដ្ឋកិច្ចពិសេស នៃរាជធានីភ្នំពេញ នាពេលកន្លងមក។ រូបថត ហុង មិនា
ភ្នំពេញៈ ក្រសួងការងារ និងបណ្តុះបណ្តាលវិជ្ជាជីវៈ កំណត់យកតួលេខ ១៩៤ ដុល្លារអាមេរិក ជាប្រាក់ឈ្នួលអប្បបរមា សម្រាប់កម្មករនិយោជិតផ្នែកវាយនភណ្ឌ កាត់ដេរ ផលិតស្បែកជើង និងផលិតផលធ្វើដំណើរ និងកាបូប សម្រាប់ឆ្នាំ២០២២។
សេចក្តីប្រកាសរបស់ក្រសួងការងារ បានឱ្យដឹងថា លោកនាយករដ្ឋមន្ត្រី ហ៊ុន សែន បានបន្ថែមទឹកប្រាក់ចំនួន ២ ដុល្លារ លើទឹកប្រាក់ចំនួន ១៩២ ដុល្លារ ដែលបានស្នើឡើងដោយក្រុមប្រឹក្សាជាតិប្រាក់ឈ្នួលអប្បបរមា សម្រាប់យកមកអនុវត្តនៅឆ្នាំ ២០២២ ខាងមុខ។
នៅព្រឹកថ្ងៃទី២៨ កញ្ញានេះ ក្រុមប្រឹក្សាប្រាក់ឈ្នួលអប្បបរមា បានចូលរួមក្នុងកិច្ចចរចាកំណត់ប្រាក់ឈ្នួល ដោយមានតំណាងមកពីក្រសួងការងារ និងបណ្តុះបណ្តាលវិជ្ជាជីវៈ តំណាងនិយោជិត និងតំណាងនិយោជក ដែលធ្វើឡើងនៅទីស្តីការក្រសួងការងារ។
កាលពីថ្ងៃទី២១ ខែកញ្ញា ក្រុមប្រឹក្សាជាតិប្រាក់ឈ្នួលអប្បបរមា បានបន្តការចរចាជាលក្ខណៈត្រីភាគីជាលើកទី៣ ដោយក្នុងនោះ តួលេខដែលភាគីបានកំណត់ គឺមានដូចជា សហជីពស្នើតួលេខ ២០៤ដុល្លារ។ ចំណែកភាគីនិយោជស្នើតួលេខ ១៨៨ដុល្លារ និងភាគីរាជរដ្ឋាភិបាលស្នើរក្សា១៩២ដុល្លារ ឱ្យនៅដដែល។
សូមជម្រាបថា ប្រាក់ឈ្នួលអប្បបរមា សម្រាប់វិស័យកាត់ដេរ និងផលិតស្បែកជើង ឆ្នាំ២០២១ គឺមានចំនួន ១៩២ ដុល្លារ៕
វីដេអូ៖
