ភ្នំពេញៈ វ៉ាក់សាំងកូវីដ១៩ ប្រភេទស៊ីណូវ៉ាក់សាំង ចំនួន ៣ លានដូស ដែលជាការបញ្ជាទិញរបស់រាជរដ្ឋាភិបាលកម្ពុជា ពីសាធារណរដ្ឋប្រជាមានិតចិន បានដឹកមកដល់ហើយនាព្រឹកថ្ងៃទី ២៨ ខែកញ្ញានេះ សម្រាប់ផ្តល់ជូនទៅតាមគោលដៅដើម្បីចាក់ដូសជំរុញទៅដល់ពលរដ្ឋដែលត្រូវទទួលបាននូវវ៉ាក់សាំងនេះ។
លោកស្រី យក់ សម្បត្តិ រដ្ឋលេខាធិការក្រសួងសុខាភិបាល បានថ្លែងក្នុងពេលមកទទួលវ៉ាក់សាំងនេះថា វ៉ាក់សាំងនៅក្នុងឃ្លាំងពេលនេះគឺសរុបមានចំនួន ៦ លានដូសនៅក្នុងឃ្លាំង សម្រាប់ចាក់ដូសជំរុញដែលនឹងចាប់ផ្តើមធ្វើយុទ្ធនាការចាក់ ចាប់ពីថ្ងៃទី១១ ខែតុលា ខាងមុខនេះ។
លោកស្រីមានប្រសាសន៍ថា៖ «កម្ពុជាមិនមានការខ្វះខាតវ៉ាក់សាំងទេ ហើយយើងនឹងបន្តទទួលនូវវ៉ាក់សាំងដែលជាជំនួយឥតសំណងរបស់មិត្តចិន ខាងមជ្ឈមណ្ឌលកូវ៉ាក់ ហើយក៏ដូចជាខាងប្រទេសទ្វេភាគីដែលជ្រោមជ្រែងក្នុងការជួយ»។
គិតត្រឹមថ្ងៃទី២៧ ខែកញ្ញា អ្នកដែលមានអាយុចាប់ពី ១៨ ឆ្នាំឡើងចំនួន ៩៨,៨៧% ធៀបជាមួយចំនួនប្រជាជនគោលដៅ ១០ លាននាក់ បានចាក់វ៉ាក់សាំងរួចហើយ និងក្រុមមនុស្សអាយុពី ១២ឆ្នាំ ទៅក្រោម ១៨ឆ្នាំ មាន ៨៩,២១% ធៀបជាមួយចំនួនប្រជាជនគោលដៅជិត ២ លាននាក់ និងកុមារអាយុពី ៦ឆ្នាំ ដល់ក្រោម ១២ឆ្នាំមានចំនួន ៨២,៤១% ធៀបជាមួយនឹងប្រជាជនគោលដៅជាង ១,៨ លាននាក់បានទទួលការចាក់វ៉ាក់សាំង៕