ភ្នំពេញៈ រដ្ឋមន្ដ្រីក្រសួងអប់រំយុវជន និងកីឡាលោក ហង់ជួន ណារ៉ុន បញ្ជាក់ថា ការផ្ដល់ឱកាសឱ្យកុមារអាចទទួលបានការសិក្សានៅកម្រិតមត្តេយ្យសិក្សាពិតជាជួយពួកគេឱ្យទទួលបានការអប់រំ និងបញ្ចប់ការសិក្សាទាំងនៅកម្រិតបឋមសិក្សា និងឈានទៅបន្តការសិក្សានៅឧត្ដមសិក្សា។
លោក ហង់ជួន ណារ៉ុន បានបញ្ជាក់បែបនេះ តាមរយៈវេទិកាការដាក់ចេញគោលនយោបាយផ្អែកលើភ័ស្តុតាង ដើម្បីគាំទ្រការសិក្សារបស់កុមារ ការអភិវឌ្ឍកុមារតូច និងកិច្ចការពារកុមារ។ វេទិកានេះរៀបចំដោយអង្គការ Save the Children ប្រចាំប្រទេសកម្ពុជាជាមួយក្រសួងអប់រំតាមប្រព័ន្ធអនឡាញនៅថ្ងៃទី ២៧ កញ្ញានេះ។ វេទិកានេះមានអ្នកពាក់ព័ន្ធមកពីក្រសួងស្ថាប័នពាក់ព័ន្ធ អង្គការសង្គមស៊ីវិលជាតិ និងអន្តរជាតិ លោកគ្រូអ្នកគ្រូ សិស្សានុសិស្ស ចូលរួមប្រមាណ ២៧០ នាក់។
លោករដ្ឋមន្ដ្រីថ្លែងថា ក្នុងរយៈពេលជិត ៨ ឆ្នាំកន្លងមកនេះក្រសួងអប់រំបានដាក់ចេញនូវកម្មវិធីកំណែទម្រង់ជាបន្តបន្ទាប់ ដើម្បីពង្រឹងគុណភាព និងប្រសិទ្ធភាពសេវាអប់រំ ជាពិសេសការបណ្ដុះធនធានមនុស្សប្រកបដោយគុណភាព និងជំនាញច្បាស់លាស់ក្នុងការចូលរួមចំណែកអភិវឌ្ឍសង្គមសេដ្ឋកិច្ចក្នុងបរិបទថ្មីពោលគឺសេដ្ឋកិច្ចបែបឌីជីថល។
លោកថ្លែងថា៖ «ក្រសួងអប់រំក៏បានទទួលស្គាល់ថាការផ្ដោតទៅលើកុមារតូចជាពិសេសការផ្ដល់ឱកាសឱ្យកុមារទទួលបាននូវការថែទាំតាមប្រព័ន្ធឆ្នាំដំបូងក៏ដូចជាការផ្ដល់ឱកាសឱ្យកុមារ អាចទទួលបាននូវការសិក្សានៅកម្រិតមត្តេយ្យសិក្សាពិតជាជួយដល់កុមារនៅក្នុងការទទួលបានការអប់រំទាំងនៅកម្រិតបឋមសិក្សាអាចរៀនចប់នៅបឋមសិក្សាហើយឈានទៅរកឧត្ដមសិក្សាទៀត ដូច្នេះហើយបានជាក្រសួងអប់រំបានផ្ដោតការយកចិត្ដទុកដាក់ក្នុងការពង្រឹងគុណភាពសាលាមត្ដេយ្យសិក្សា ជាពិសេសគឺសាលាសហគមន៍ដើម្បីផ្ដល់ឱ្យកាសឱ្យកុមារដែលមកពីតំបន់ក្រីក្របានទទួលនូវការអប់រំប្រកបដោយគុណភាព និងអាចរៀនចប់កម្រិតបឋមសិក្សាប្រកបដោយជោគជ័យ»។
លោក ហង់ជួន ណារ៉ុន បានឱ្យដឹងថា លទ្ធផលទាំងអស់នេះជាលទ្ធផលនៃការសហការរួមគ្នារវាងក្រសួងអប់រំ និងដៃគូអភិវឌ្ឍន៍ផ្សេងៗជាពិសេសគឺអង្គការ Save the Children ដោយពី ១ ឆ្នាំទៅ ១ ឆ្នាំលទ្ធផលនៃការសិក្សារបស់សិស្សក៏កាន់តែបានល្អប្រសើរឡើង។
លោករដ្ឋមន្ដ្រីបានវាយតម្លៃខ្ពស់ចំពោះអង្គការ Save the Children ដែលបានផ្ដួចផ្ដើមគំនិតរៀបចំវេទិកាការដាក់ចេញគោលនយោបាយផ្អែកលើភ័ស្តុតាងនេះឡើង និងកិច្ចខិតខំប្រឹងប្រែងជួយដល់ប្រទេស កម្ពុជារាប់ចាប់តាំងពីសកម្មភាពជំនួយមនុស្សធម៌ដែលអង្គការបានអនុវត្តនៅកម្ពុជាតាំងពីឆ្នាំ ១៩៧៩ និងបានជួយដល់វិស័យអប់រំ។ តាំងពីឆ្នាំ ១៩៧៩ អង្គការ Save the Children បានជួយដល់កម្ពុជាស្តារឡើងវិញ និងដំណើរការសាលាគរុកោសល្យខេត្តកំពង់ចាម សៀមរាប និងភ្នំពេញក្នុងនោះមានការជួសជុលសាងសង់ហេដ្ឋារចនាសម្ព័ន្ធរូបវន្ត និងការកសាងសមត្ថភាពគ្រូឧទ្ទេស និងគរុសិស្ស។ ជួយរៀបចំអភិវឌ្ឍកម្រងសាលារៀននៅ ១០ ខេត្ត-ក្រុងមានភ្នំពេញ កំពង់ចាម កំពង់ឆ្នាំង សៀមរាប ពោធិ៍សាត់ បន្ទាយមានជ័យ ព្រះវិហារ កោះកុង ព្រៃវែង និងក្រចេះ។ សាងសង់សាលារៀនធ្វើពីបេតុងចំនួន ២៣៥ ខ្នង សាលារោងដោលចំនួន ១៨៦ ខ្នង អន្តេវាសិកដ្ឋានចំនួន ៥០ ខ្នង និងសាលាបណ្ដែតទឹកចំនួន ៧ ខ្នងរួមនឹងសកម្មភាពជួយក្នុងវិស័យអប់រំ ជាច្រើនទៀត។
លោកស្រី អេលីហ្សាប៊ែត ភៀស តំណាងអង្គការ Save the Children ប្រចាំប្រទេសកម្ពុជាថ្លែងក្នុងវេទិកានេះថា អង្គការ Save the Children ពិតជាមានកិត្ដិយសដែលបានសហការជិតស្និទ្ធជាមួយប្រទេសកម្ពុជា និងរីករាយចំពោះការដឹកនាំនឹងការប្ដេជ្ញាចិត្ដរបស់ថ្នាក់ដឹកនាំ និងអ្នកពាក់ព័ន្ធទាំងអស់ចំពោះកិច្ចសហការគ្នាកន្លងមកនេះ។
លោកស្រីថ្លែងថា៖ «យើងបានដឹងហើយថា ប្រទេសកម្ពុជាមានការអភិវឌ្ឍយ៉ាងលឿនប៉ុន្មានទសវត្សរ៍ចុងក្រោយនេះ ជាពិសេសនៅក្នុងវិស័យអប់រំគឺយើងឃើញមានការដឹកនាំយ៉ាងល្អប្រសើរក្នុងពេលនៃការរីករាលដាលជំងឺកូវីដ ១៩ នេះតាមរយៈការដាក់ចេញនូវកម្មវិធីសិក្សាពីចម្ងាយ»។
លោកស្រីថ្លែងថា ដោយបានសង្កេតឃើញ កិច្ចគាំពារកុមារនៅកម្ពុជាគឺមានគោលនយោបាយ កិច្ចគាំពារកុមារទៅនឹងអំពើហិង្សាគ្រប់ទម្រង់ និងការអប់រំជាវិជ្ជមានដោយមានការប្ដេជ្ញាចិត្ដជាមួយនឹងដៃគូសកលក្នុងការទប់ស្កាត់អំពើហិង្សាលើកុមារ។
លោកស្រីថ្លែងថា៖ «វេទិកាថ្ងៃនេះគឺដើម្បីចូលរួមចែករំលែកនូវភ័ស្ថុតាងជាបញ្ហាប្រឈមថាតើមានការជួបប្រទះយ៉ាងណាខ្លះលើកិច្ចការពារកុមារ និងការអប់រំកុមារ។ ភ័ស្ថុតាងបង្ហាញថាការប្រើប្រាស់នូវការអប់រំបែបវិជ្ជមានហើយនិងការតាមដានជាមួយក្រុមគ្រួសារគឺជាយុទ្ធសាស្ដ្រមានប្រសិទ្ធភាពក្នុងការអនុវត្ដការថែទាំ និងការកាត់បន្ថយអំពើហិង្សាលើកុមារ។ ក៏ប៉ុន្ដែមានតែការចូលរួមទាំងអស់គ្នាទេ ទើបយើងអាចសម្រេចទៅបាន»។ «គន្លឹះសំខាន់ៗការអនុវត្តប្រកបដោយជោគជ័យក្នុងការគាំទ្រកុមារឱ្យបានរៀនសូត្រ និងលូតលាស់នៅកម្រិតមត្តេយ្យសិក្សា និងបឋមសិក្សា ឬអ្វីដែលជាសារៈសំខាន់សម្រាប់កុមារតូចក្នុងការទទួលបានសេវាផ្សេងៗក្នុងវ័យកុមារ ដើម្បីត្រៀមខ្លួនរៀននៅសាលាបឋមសិក្សា»៕