ភ្នំពេញៈ មន្ត្រីជាន់ខ្ពស់នៃក្រសួងសុខាភិបាលបានឱ្យដឹងថា កម្ពុជាមិនខ្វះវ៉ាក់សាំងកូវីដ ១៩ សម្រាប់ចាក់ជូនទៅដល់ប្រជាពលរដ្ឋរបស់ខ្លួនឡើយ ដោយរាជរដ្ឋាភិបាលកម្ពុជានឹងមិនទុកឱ្យប្រជាជនគ្មានវ៉ាក់សាំងចាក់នោះទេ ខណៈដែលកម្ពុជាបានបញ្ជាទិញវ៉ាក់សាំងមកជាបន្តបន្ទាប់ ដើម្បីចាក់ជូនដល់ពលរដ្ឋរបស់ខ្លួន។
លោកស្រី យក់ សម្បត្តិ រដ្ឋលេខាធិការក្រសួងសុខាភិបាលបានថ្លែងដូចនេះនាថ្ងៃទី ២៨ ខែកញ្ញា ក្នុងពេលចុះទទួលវ៉ាក់សាំងកូវីដ ១៩ ស៊ីណូវ៉ាក់ចំនួន ៣ លានដូសដែលរាជរដ្ឋាភិបាលកម្ពុជាបានបញ្ជាទិញពីសាធារណរដ្ឋប្រជាមានិតចិន ដើម្បីទុកសម្រាប់ចាក់ដូសជំរុញទៅដល់ប្រជាពលរដ្ឋទូទៅ ដែលនឹងចាប់ផ្តើមចាក់ពីថ្ងៃទី ១១ ខែតុលា ខាងមុខនេះ។
លោកស្រីប្រាប់ថា៖ «វ៉ាក់សាំងរបស់យើងមាននៅក្នុងឃ្លាំងសរុបពេលនេះមានចំនួន ៦ លានដូស ដែលវ៉ាក់សាំងនេះ យើងត្រៀមសម្រាប់ចាក់ដូសជំរុញទៅដល់ប្រជាពលរដ្ឋទូទៅ។ សរុបមក កម្ពុជាមិនខ្វះវ៉ាក់សាំងទេ ដោយសារយើងនឹងនៅទទួលបានជំនួយឥតសំណងរបស់មិត្តចិន ហើយនឹងបន្តទទួលជំនួយពីខាងមជ្ឈមណ្ឌលកូវ៉ាក់ និងពីប្រទេសទ្វេភាគីដែលគេជ្រោមជ្រែងបន្តជួយមកកម្ពុជា»។
រដ្ឋលេខាធិការរូបនេះបានបញ្ជាក់ថា៖ «ប្រសិនបើយើងនៅមានតម្រូវការក្នុងការចាក់វ៉ាក់សាំងទៀត រាជរដ្ឋាភិបាលកម្ពុជាមិនព្រងើយកន្តើយនោះទេ គឺលោកនឹងធ្វើការបញ្ជាទិញភ្លាមពីមិត្តចិនរបស់យើង»។
សម្រាប់កម្ពុជា គឺនៅតែបន្តទិញវ៉ាក់សាំងពីក្រុមហ៊ុនស៊ីណូវ៉ាក់ និងក្រុមហ៊ុនស៊ីណូហ្វាមដែលជាក្រុមហ៊ុនមួយសហការជាមួយកម្ពុជាតាមរយៈស្ថានទូតចិន ហើយប្រមុខរាជរដ្ឋាភិបាលកម្ពុជាបានធ្វើការយ៉ាងជិតស្និទ្ធជាមួយនឹងរាជរដ្ឋាភិបាលចិន។
ទន្ទឹមនឹងនេះដែរ លោកស្រី ឱ វណ្ណឌីន អ្នកនាំពាក្យក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេសបានប្រាប់ឱ្យដឹងផងដែរ ដោយលោកស្រីអំពាវនាវដល់ប្រជាពលរដ្ឋទាំងអស់ កុំមានការបារម្ភទាក់ទងនឹងការគ្មានវ៉ាក់សាំងចាក់។
លោកស្រីថ្លែងក្នុងពិធីបិទបញ្ចប់យុទ្ធនាការចាក់វ៉ាក់សាំងកូវីដ ១៩ ជុំទី១ ក្នុងខេត្តត្បូងឃ្មុំ នាថ្ងៃទី ២៨ ខែកញ្ញា ថា៖ «យើងមានវ៉ាក់សាំងគ្រប់គ្រាន់សម្រាប់ចាក់ជូនបងប្អូន ប៉ុន្តែសុំឱ្យគ្រប់ចំនួនខែដែលបានកំណត់សិន ចាំទៅចាក់ គឺចាក់ដូសទី២ រួច រយៈពេល ៤ ទៅ ៦ ខែក្រោយ ចាំទៅចាក់ដូសជំរុញ»។
គិតត្រឹមថ្ងៃទី ២៨ ខែកញ្ញា រាជធានីខេត្តចំនួន ១៨ បានបិទបញ្ចប់នូវយុទ្ធនាការចាក់វ៉ាក់សាំងកូវីដ ១៩ ហើយខេត្តផ្សេងទៀតនឹងត្រូវប្រកាសបិទបញ្ចប់នាពេលឆាប់ៗខាងមុខនេះ ជាបន្តបន្ទាប់ផងដែរ។
លោកស្រី ឱ វណ្ណឌីន បានលើកឡើងពីការបារម្ភទាក់ទងនឹងការហក់ឡើងនូវតួលេខនៃអ្នកឆ្លងវីរុសកូវីដ ១៩ ខណៈដែលការចាក់វ៉ាក់សាំងនៅទូទាំងប្រទេសបានច្រើនគួរជាទីមោទននេះ។ វាជាចំណុចមួយដែលពញ្ញាក់ទៅដល់ប្រជាពលរដ្ឋទាំងអស់ឱ្យដឹងថា សុំបន្តអនុវត្តនូវការការពារខ្លួនដោយកុំធ្វេសប្រហែសឱ្យសោះ ដោយសារវីរុសនេះមិនទាន់ទៅណាទេ សូមកុំភ្លេច ៣ការពារ ៣កុំ និងចាក់វ៉ាក់សាំង ទើបអាចទប់ទល់ជាមួយនឹងការវាយលុកពីវីរុសកូវីដ ១៩។
គិតត្រឹមថ្ងៃទី ២៧ ខែកញ្ញា កម្ពុជាបានចាក់វ៉ាក់សាំងកូវីដ ១៩ ទៅដល់ក្រុមមនុស្សអាយុពី ១៨ ឆ្នាំឡើង ជាង ៩,៨ លាននាក់ហើយ ឬស្មើនឹង ៩៨,៨៧% ធៀបជាមួយចំនួនប្រជាជនគោលដៅ ១០ លាននាក់។ ក្រុមមនុស្សអាយុពី ១២ ឆ្នាំ ទៅក្រោម ១៨ ឆ្នាំ មានចំនួនជាង ១,៧ លាននាក់ ឬស្មើនឹង ៨៩,២១% ធៀបជាមួយចំនួនប្រជាជនគោលដៅជិត ២ លាននាក់ និងសម្រាប់កុមារអាយុពី ៦ ឆ្នាំ ដល់ក្រោម ១២ ឆ្នាំចាក់បានចំនួនជាង ១,៥ លាននាក់ ឬស្មើនឹង ៨២,៤១% ធៀបជាមួយនឹងប្រជាជនគោលដៅជាង ១,៨ លាននាក់៕