.jpg)
ការផ្គុំរូបចម្លាក់ដែលរកឃើញនៅតំបន់អង្គរនៅខែនេះ។ រូបថត អាជ្ញាធរជាតិអប្សរា
សៀមរាបៈ ក្រុមការងារអាជ្ញាធរជាតិអប្សរាបានបន្តរកឃើញរូបចម្លាក់ព្រះសិរមេទេវតាព្រះភក្ត្រ ៤ នៅខ្លោងទ្វារតាកាវ និងបានយកទៅផ្គុំជាមួយចម្លាក់ស្មាទេវតា ដើម្បីផ្ទៀងផ្ទាត់ឃើញថា ត្រូវគ្នាជាមួយនឹងតួខ្លួនមេទេវតាដែលត្រូវបានរកឃើញកាលពីពេលមុន។
លោក ឡុង កុសល អ្នកនាំពាក្យអាជ្ញាធរជាតិអប្សរាប្រាប់ភ្នំពេញប៉ុស្តិ៍នៅថ្ងៃទី ២៧ ខែកញ្ញាថា កិច្ចការជួសជុលខ្លោងទ្វារតាកាវ ក្រុមការងារបានរកឃើញជាបន្តបន្ទាប់នូវចម្លាក់ព្រះសិរទេវតា និងព្រះសិរយក្ស ខណៈក្រុមការងារប៉ាន់ស្មានថាវាបាត់បង់ទៅតាមពេលវេលា ឬក៏ត្រូវបានគេលួចយកទៅអស់ហើយ ប៉ុន្តែបែរជារកឃើញបំណែកចម្លាក់ និងអាចផ្គុំវិញបាន។
លោកបានបន្តថា នៅក្នុងកិច្ចការជួសជុលនេះ ក្រុមការងារអាជ្ញាធរជាតិអប្សរាផ្នែកកំណាយបុរាណវិទ្យាបានរកឃើញវត្ថុបុរាណ ច្រើនមានដូចជា ចម្លាក់ព្រះសិរនៅក្រោមឫសឈើ ដែលធ្វើឱ្យក្រុមការងារមានក្តីសង្ឃឹមខ្ពស់ចំពោះអ្វីដែលត្រូវបានបាត់បង់ ប៉ុន្តែត្រូវបានរកឃើញជាបន្តបន្ទាប់។
លោកបានពន្យល់ថា អ្វីដែលអាជ្ញាធរជាតិអប្សរាបានរកឃើញជាបន្តបន្ទាប់នូវព្រះសិរមេទេតានៃចម្លាក់ទាញព្រ័ត្រដែលមានទាំងចម្លាក់ទេវតា និងអសុរៈ (មុខ ៤) រួមជាមួយនឹងចម្លាក់ផ្សេងទៀតធ្វើឱ្យក្រុមការងារជួសជុលមានក្តីសប្បាយរីករាយក្នុងការធ្វើកិច្ចការនេះហើយត្រូវកំណត់ និងផ្គុំសាឡើងវិញ រួចយកទៅរក្សាទុកនៅកន្លែងដែលមានសុវត្ថិភាព។
លោកបានបញ្ជាក់ថា៖ «វាជាលទ្ធផលផ្លែផ្ការបស់ជាតិយើងទាំងមូល។ ដំបូងយើងគិតថា វាបាត់បង់ដោយប្រការណាមួយបែរមកត្រូវរកឃើញហើយអាចផ្គុំវិញបាន វាអស្ចារ្យណាស់យើងពុំដែលមានក្តីសង្ឃឹម ប៉ុន្តែបែរជាមានក្តីសង្ឃឹមហើយស្ថិតក្នុងដៃរបស់យើងថែមទៀត»។
បើតាមលោក ឡុង កុសល រូបចម្លាក់នេះត្រូវបានសាងសង់ដោយព្រះបាទជ័យវរ្ម័នទី ៧ (ក្រុងអង្គរធំ) ក្នុងសតវត្សរ៍ទី ១២។ ចំពោះការជួសជុលខ្លោងទ្វារតាកាវនេះត្រូវបានចាប់ផ្តើមកាលពីដើមឆ្នាំ ២០២១ រហូតមកដល់បច្ចុប្បន្ននេះនៅពេលបញ្ចប់ ក្រុមការងារនឹងយកមកដាក់តាំងនៅទីកន្លែងដដែលវិញ។
អាជ្ញាធរជាតិអប្សរាបានផ្សព្វផ្សាយនៅថ្ងៃទី ២៧ ខែកញ្ញា ឆ្នាំ ២០២១ ថា រូបចម្លាក់ព្រះសិរមេទេវតាត្រូវបានក្រុមការងារជួសជុលខ្លោងទ្វារតាកាវប្រទះឃើញកប់ក្នុងដីនៅក្បែរខឿនជ្រុងឦសាននៃខ្លោងទ្វារតាកាវកាលពីពេលថ្មីៗនេះ។ រូបព្រះសិរមេទេវតាព្រះភក្ត្រ ៤ មានព្រះភក្ត្រ ២ ត្រឹមពាក់កណ្តាលច្រមុះចុះក្រោម។
អាជ្ញាធរជាតិអប្សរាបន្តថាចំពោះចម្លាក់ព្រះសិរទេវតាដែលបានរកឃើញនេះក្រុមការងារបានយកទៅផ្គុំសាកល្បងជាមួយនឹងចម្លាក់ស្មាទេវតា ដើម្បីផ្ទៀងផ្ទាត់ ហើយជាលទ្ធផលពិតជាត្រូវគ្នាជាមួយនឹងតួខ្លួនមេទេវតាប្រាកដមែន។
បន្ទាប់ពីផ្គុំរួចរាល់ហើយ ក្រុមការងារបានសហការជាមួយនឹងនគរបាលការពារបេតិកភណ្ឌក្នុងតំបន់អង្គរ ដើម្បីយកចម្លាក់ព្រះភក្ត្រនោះមករក្សាទុកនៅទីតាំងការដ្ឋានខ្លោងទ្វារតាកាវ ដើម្បីជួសជុលឡើងវិញ៕
