ភ្នំពេញៈ ក្រសួងអប់រំ យុវជន និងកីឡា និងភាគីពាក់ព័ន្ធប្រកាសប្រារព្ធទិវាគ្រូបង្រៀន ៥ តុលា ឆ្នាំនេះ ក្រោមប្រធានបទ «គ្រូបង្រៀនរក្សាបានតួនាទីសំខាន់ក្នុងការអប់រំគ្រប់កាលៈទេសៈ» ខណៈក្រសួងអប់រំកំពុងបន្តធ្វើកំណែទម្រង់គុណវុឌ្ឍិគ្រូបង្រៀន និងចាត់ទុកសមត្ថភាពគ្រូបង្រៀនជារឿងសំខាន់លើការវាយតម្លៃលទ្ធផលសិក្សារបស់សិស្ស។
សេចក្តីប្រកាសព័ត៌មានរបស់ក្រសួងអប់រំនៅថ្ងៃទី ២៧ កញ្ញា បានឱ្យដឹងថា ការប្រារព្ធពិធីអបអរសាទរទិវាគ្រូបង្រៀន ៥ តុលាឆ្នាំនេះ នឹងធ្វើឡើងតាមរយៈប្រព័ន្ធ Zoom រយៈពេល ១ ថ្ងៃ និងមានផ្សាយផ្ទាល់ពីទិដ្ឋភាពនៃពិធីនេះ តាមរយៈហ្វេសប៊ុកផ្លូវការរបស់ក្រសួងអប់រំ យុវជន និងកីឡា (MoEYS Cambodia)។
សេចក្ដីប្រកាសព័ត៌មានបញ្ជាក់ថា៖ «ទិវាគ្រូបង្រៀន ៥ តុលា ត្រូវបានប្រារព្ធធ្វើឡើងក្នុងគោលបំណង ដើម្បីបំផុសនូវវប្បធម៌ និងប្រពៃណីនៃការរំឭកគុណូបការៈដ៏ថ្លៃថ្លាជូនចំពោះគ្រូបង្រៀននៅគ្រប់ភូមិសិក្សាទូទាំងប្រទេសដែលពួកគាត់បាននិងកំពុងបំពេញការងារជាអ្នកអប់រំ និងជាសិល្បករផ្ទេរចំណេះដឹងនិងជូនចំពោះគ្រូបង្រៀនដែលបានចូលនិវត្តន៍ ឬបានបាត់បង់ជីវិតទៅហើយក្ដី»។
បើតាមសេចក្ដីប្រកាសព័ត៌មានលោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡានឹងមានបាឋកថាស្ដីពី «ការធ្វើបរិវត្តកម្មឌីជីថលក្នុងវិស័យអប់រំ និងការអនុវត្តវិធីសាស្ត្របង្រៀនថ្មី» ក្នុងពិធីនេះ។
កម្មវិធីនេះក៏នឹងមានការប្រកាសពានរង្វាន់នាយកសាលាល្អ គ្រូបង្រៀនល្អ គ្រូបង្រៀនល្អភាសាខ្មែរ និងគណិតវិទ្យាថ្នាក់ទី ១ ទី ២ និងថ្នាក់ទី ៣ និងពានរង្វាន់សាលាស្អាតឆ្នាំសិក្សា ២០១៩-២០២០ រួមនឹងវេទិកាពិភាក្សាក្រោមប្រធានបទ «តថភាពសក្តានុពល និងឧត្តមានុវត្តនៃការអប់រំឌីជីថលនៅកម្ពុជា» ផងដែរ។
សេចក្ដីប្រកាសបញ្ជាក់ថា ទិវាគ្រូបង្រៀនឆ្នាំនេះក៏នឹងមានរៀបចំព្រឹត្តការណ៍ «សប្តាហ៍នៃយុទ្ធនាការអបអរសាទរទិវាគ្រូបង្រៀន ៥ តុលា» ដែលមានរយៈពេល ៦ ថ្ងៃគឺចាប់ពីថ្ងៃទី ២៩ ខែកញ្ញា ដល់ថ្ងៃទី ៤ តុលា ផងដែរ។
ព្រឹត្តិការណ៍ទាំងនោះ រួមមាន ទី១ វេទិកាពិភាក្សាស្តីពីការបង្រៀន និងរៀនមុខវិជ្ជាប្រវត្តិវិទ្យាផ្អែកលើវិធីសិក្សាតាមបែបបញ្ញត្តិ។ ទី២ ការប្រកួតជជែកដេញដោលក្រោមប្រធានបទ «ការបង្រៀន ដើម្បីបណ្តុះបំណិនសតវត្សរ៍ទី ២១» របស់ជយលាភីកម្មវិធីជជែកដេញដោលយុវជនថ្នាក់ជាតិទាំង ២ រដូវកាល ២០២០ និង ២០២១។ ទី៣ ការប្រកាសលទ្ធផលនៃការប្រកួតប្រជែងសំណេរអត្ថបទខ្លី និងការតែងកំណាព្យ។ ទី៤ ការប្រកាសលទ្ធផលនៃការចូលរួមបង្កើតផ្ទាំងគំនូរ ឬការរចនារូបភាពសិល្បៈគ្រប់ប្រភេទ និងទី៥ ការប្រកាសលទ្ធផលនៃការចូលរួមប្រកួតវីដេអូខ្លីស្ដីពីគុណគ្រូបង្រៀន។
កាលពីថ្ងៃទី ២៧ កញ្ញា ឆ្នាំនេះ លោក ហង់ជួន ណារ៉ុន ធ្លាប់បានថ្លែងឱ្យដឹងដែរថា ក្នុងរយៈពេលជិត ៨ ឆ្នាំកន្លងទៅនេះ ក្រសួងអប់រំបានដាក់ចេញនូវកម្មវិធីកំណែទម្រង់ជាបន្តបន្ទាប់ ដើម្បីពង្រឹងគុណភាព និងប្រសិទ្ធភាពសេវាអប់រំ ជាពិសេសការបណ្ដុះបណ្ដាលធនធានមនុស្សប្រកបដោយប្រសិទ្ធភាព និងជំនាញច្បាស់លាស់ ដើម្បីរួមចំណែកអភិវឌ្ឍសេដ្ឋកិច្ចក្នុងបរិបទថ្មីពោលគឺសេដ្ឋកិច្ចបែបឌីជីថល។
លោកថ្លែងថា៖ «ដោយចាប់ផ្តើម និងផ្អែកលើលទ្ធផលនៃការប្រឡងសញ្ញាបត្រមធ្យមសិក្សាទុតិយភូមិក្រសួងអប់រំ ក៏បានធ្វើការវិភាគ និងឆ្លុះបញ្ចាំងដ៏ស៊ីជម្រៅស្វែងរកបញ្ហា ដើម្បីកែលម្អឱ្យប្រព័ន្ធអប់រំកាន់តែប្រសើរឡើង។ ឈរលើលទ្ធផលនៃការប្រឡងនេះយើងបានឃើញនូវបញ្ហាក្នុងវិស័យអប់រំបាននិងកំពុងជួបប្រទះគឺការចាំបាច់ក្នុងការពង្រឹង និងបង្កើនគុណវុឌ្ឍិគ្រូក៏ដូចជា ការពង្រឹងការគ្រប់គ្រងតាមសាលារៀន»។
លោកបន្តថា សមត្ថភាពគ្រូបង្រៀនជារឿងសំខាន់ពិសេសលើមុខវិជ្ជាឯកទេសវិធីសាស្ត្របង្រៀន និងការវាយតម្លៃលទ្ធផលសិក្សារបស់សិស្សបានត្រឹមត្រូវ។ ដូច្នេះហើយក្រសួងបានរៀបចំកំណែទម្រង់ដោយផ្ដោតលើសសរស្ដម្ភចំនួន ៥ ក្នុងនោះទី១ គឺការធ្វើកំណែទម្រង់គ្រូបង្រៀនដោយមានការលើកទឹកចិត្ដគ្រូ ការបង្កើនប្រាក់បៀវត្សរ៍ ការលើកគុណវុឌ្ឍិគ្រូ ការកែលម្អកម្មវិធីបណ្ដុះបណ្ដាលគ្រូជាដើម។
លោកបញ្ជាក់ថា បន្ទាប់ពីការធ្វើកំណែទម្រង់នេះក្រសួងសង្កេតឃើញថា ការសិក្សារបស់សិស្សទទួលបានលទ្ធផលល្អប្រសើរ។
លោកស្រី អ៊ុក ឆាយ៉ាវី ប្រធានសមាគមគ្រូបង្រៀនកម្ពុជាឯករាជ្យ (CITA) បានឱ្យដឹងថា ទិវាគ្រូបង្រៀន ៥ តុលា ឆ្នាំនេះ ក្រុមលោកគ្រូអ្នកគ្រូនឹងមិនមានការជួបជុំដូចរាល់ឆ្នាំទេ ដោយសារតែអនុវត្ដវិធានការសុខាភិបាលទប់ស្កាត់ការឆ្លងរីករាលដាលជំងឺកូវីដ ១៩។ ប៉ុន្ដែនឹងមានការផ្សព្វផ្សាយញត្ដិ ដើម្បីទាមទារឱ្យមានការយកចិត្ដទុកដាក់បន្ថែមទៀតដល់គ្រូបង្រៀនជាពិសេសគ្រូបង្រៀនដែលចូលនិវត្ដន៍។
លោកស្រីថ្លែងថា៖ «សម្រាប់យើងគឺយើងចង់ឱ្យតែលោកគ្រូអ្នកគ្រូមានជីវភាពរស់នៅសមរម្យប៉ុណ្ណោះ។ ក្នុងទិវាគ្រូបង្រៀនសមាគមគ្រូបង្រៀនតែងតែទាមទារឱ្យដំឡើងប្រាក់បៀវត្សរ៍គោលគ្រូបង្រៀនឱ្យបានដល់ ២ លានរៀល ដើម្បីអាចឱ្យគ្រូបង្រៀននៅពេលចាស់ជរាទៅចូលនិវត្ដន៍អាចមានឱកាសរស់នៅបានសមរម្យ»៕