ព្រះសីហនុៈ នគរបាល បានបញ្ជូនជនជាតិចិន ប្រុស-ស្រីចំនួន ៦ នាក់ ទៅសាលាដំបូងខេត្តព្រះសីហនុ នៅថ្ងៃទី ២៩ ខែកញ្ញា ពាក់ព័ន្ធជួញដូរគ្រឿងញៀនជាង ៨៦០ ក្រាម។
លោក តាក់ សារិទ្ធ ទទួលផែនការងារនគរបាលប្រឆាំងគ្រឿងញៀនខេត្តព្រះសីហនុឱ្យដឹងនៅថ្ងៃទី ២៩ កញ្ញាថា៖ «ករណីជនសង្ស័យ គឺសមត្ថកិច្ចខ្ញុំបញ្ជូនពួកគេទៅតុលាការនៅថ្ងៃនេះ (ថ្ងៃទី ២៩ កញ្ញា)»។
លោក សារិទ្ធ បញ្ជាក់ថា ការបង្ក្រាបបទល្មើសជួញដូរគ្រឿងញៀននេះបានធ្វើឡើងជាបន្តបន្ទាប់ គឺនៅថ្ងៃទី ២៦ និងថ្ងៃទី ២៧ កញ្ញា ក្នុង ២ ទីតាំងផ្សេងគ្នា នៅសង្កាត់លេខ ២ និងសង្កាត់លេខ ៤ ក្រុង-ខេត្ដព្រះសីហនុ។
យោងតាមរបាយការណ៍ ផេកហ្វេសប៊ុករបស់ការិយាល័យផ្សព្វផ្សាយអប់រំស្នងការដ្ឋាននគរបាលខេត្តព្រះសីហនុ បានឱ្យដឹងថា វត្ថុតាងគ្រឿងញៀនដែលសមត្ថកិច្ចរឹបអូសបានពីជនសង្ស័យទាំង៦ នាក់នោះមាន ថ្នាំញៀនប្រភេទ កេតាមីន ទម្ងន់ ៣៩២,៩៦ ក្រាម ថ្នាំញៀនប្រភេទមេតំហ្វេតាមីន (ICE) ទម្ងន់ ៤៦៨,៦៥ ក្រាម ថ្នាំញៀនប្រភេទ WY ២៨៧ គ្រាប់ កញ្ឆាក្រៀមចំនួន ២ កញ្ចប់តូច ថ្នាំដបពណ៌មាសចំនួន២ដប ជញ្ជីងថ្លឹងថ្នាំញៀនចំនួន ១ រថយន្ត ២ គ្រឿងព្រមទាំងទូរស័ព្ទចំនួន១០គ្រឿងផងដែរ។
ជនសង្ស័យទាំង ៦ នាក់ ទី១- ឈ្មោះ YANG KUN ភេទប្រុស អាយុ ៣១ ឆ្នាំ, ទី២- ឈ្មោះ CHEN YONG ភេទប្រុសអាយុ ៣៥ ឆ្នាំ, ទី៣- ឈ្មោះ ZHOU HONG ភេទស្រី អាយុ ៣៤ ឆ្នាំ, ទី៤- ឈ្មោះ FANZHANG WEI ភេទប្រុស អាយុ ២៩ ឆ្នាំ,ទី៥- ឈ្មោះ HONG JIN HONG ភេទប្រុស អាយុ ៤៩ ឆ្នាំ និងឈ្មោះ CHAO FENG ភេទប្រុស អាយុ ៣២ ឆ្នាំ។
លោក ហួត វិចិត្រ អ្នកនាំពាក្យអយ្យការអមសាលាដំបូងខេត្តព្រះសីហនុនៅរសៀលថ្ងៃទី ២៩ កញ្ញានេះ មិនអាចទាក់ទងសុំការបញ្ជាក់តាមទូរស័ព្ទបានទេ៕