ភ្នំពេញៈ រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ បានជម្រាបទៅកាន់ម្ចាស់ស្ថានីយទូរទស្សន៍គ្រប់ប្រភេទហាមចាក់ផ្សាយខ្សែភាពយន្ត «Methagu» ក្នុងកម្មវិធីផ្សាយរបស់ខ្លួនក្រោយមានសំណូមពរពីប្រទេសស្រីលង្កាដោយបញ្ជាក់ថា ខ្សែភាពយន្តនេះមានឆ្លុះបញ្ចាំងអំពីជីវិតអតីតអង្គការភេរវកម្ម Liberation Tigers of Tamil Eelam (ETTE) ដែលជាអង្គការមួយក្នុងចំណោមអង្គការភេរវកម្មដ៏ឃោរឃៅនៅក្នុងសកលលោក។
យោងតាមលិខិតរបស់ លោក ខៀវ កាញារីទ្ធ ចុះកាលពីថ្ងៃទី ២៣ ខែកញ្ញានេះ បានជម្រាបទៅលោក លោកស្រី ម្ចាស់ស្ថានីយទូរទស្សន៍ ទូរទស្សន៍ខ្សែកាប និងម្ចាស់ទូរទស្សន៍គ្រប់ប្រភេទបានឱ្យដឹងថាការហាមចាក់ផ្សាយខ្សែភាពយន្ត «Methagu» ដោយក្រសួងការបរទេស និងសហប្រតិបត្តិការអន្តរជាតិកម្ពុជា បានទទួលសំណូមពរពីប្រទេសស្រីលង្កាស្នើសុំឱ្យកម្ពុជាជួយទប់ស្កាត់ការចាក់ផ្សាយខ្សែភាពយន្តនេះ។
លោករដ្ឋមន្ដ្រីបញ្ជាក់តាមលិខិតថា៖ «ខ្សែភាពយន្ត «Methagu» ឆ្លុះបញ្ចាំងអំពីជីវិតរបស់អតីតអង្គការភេរវកម្ម Liberation Tigers of Tamil Eelam (ETTE) ដឹកនាំដោយ VelupillaiPrabhakaran និងផលិតដោយអង្គការ Tamil Eelam Film Society ដែលត្រូវបានគេកំណត់ថា ETTE គឺជាអង្គការមួយក្នុងចំណោមអង្គការភេរវកម្មដ៏ឃោរឃៅនៅក្នុងសកលលោក»។
បើតាមលិខិតរបស់លោករដ្ឋមន្ដ្រីបានឱ្យដឹងថា បច្ចុប្បន្ន ខ្សែភាពយន្ត «Methagu» ត្រូវបានផ្សព្វផ្សាយតាមបណ្ដាញសង្គមរួមមាន Internet sites និង the BS Value App។
លោក មាស សុភ័ណ្ឌ អ្នកនាំពាក្យក្រសួងព័ត៌មាន បញ្ជាក់ប្រាប់ ភ្នំពេញ ប៉ុស្ដិ៍ នៅថ្ងៃទី ២៩ កញ្ញានេះថាមូលហេតុដែលក្រសួងព័ត៌មាន ជម្រាបជូន លោកលោកស្រីម្ចាស់ស្ថានីយទូរទស្សន៍គ្រប់ប្រភេទហាមចាក់ផ្សាយខ្សែភាពយន្ត «Methagu» ក្នុងកម្មវិធីផ្សាយរបស់ខ្លួននេះ តាមសំណើរបស់ក្រសួងការបរទេស និងសហប្រតិបត្ដិការអន្តរជាតិកម្ពុជាដោយមានការស្នើពីប្រទេសស្រីលង្កា។
លោកថ្លែងថា៖ «ដូចមានបញ្ជាក់នៅក្នុងលិខិតរបស់ក្រសួងហើយ គឺខ្សែភាពយន្ត «Methagu» នេះ ជាការផលិតរបស់អង្គការភេរវកម្ម និងពាក់ព័ន្ធទៅនឹងក្រុមភេរវកម្ម។ ក្រសួងព័ត៌មានលើកយកមូលហេតុមកនេះ គឺតាមសំណើរបស់ក្រសួងការបរទេស បញ្ជាក់តាមរយៈលិខិតដែលប្រទេសស្រីលង្កាស្នើមកប្រទេសកម្ពុជា»។
លោក មាស សុភ័ណ្ឌ បញ្ជាក់ថា នៅមុនការជូនដំណឹងរបស់ក្រសួងព័ត៌មាននេះ ប្រព័ន្ធផ្សព្វផ្សាយ និងបណ្ដាស្ថានីយទូរទស្សន៍នៅកម្ពុជាមិនទាន់មានការចេញផ្សាយខ្សែភាពយន្តនេះនៅឡើយទេ។ ដូច្នេះ ទើបក្រសួងជូនព័ត៌មាននេះជាសាធារណៈ ក្នុងករណីស្ថានីយទូរទស្សន៍ ឬបណ្ដាញផ្សព្វផ្សាយណា ទទួលខ្សែភាពយន្តនេះឱ្យចូលរួមសហការកុំធ្វើការផ្សព្វផ្សាយ៕