ភ្នំពេញៈ មជ្ឈមណ្ឌលបណ្តុះបណ្តាលឡានមី (Lanmei Training Center) ក្រោមកិច្ចសហប្រតិបត្តិការជាមួយកងទ័ពជើងអាកាសបានបើកឱ្យមានការហោះហើរជាលើកដំបូងរបស់ខ្លួន នៅមូលដ្ឋានកងទ័ពជើងអាកាសកម្ពុជា បន្ទាប់ពីបានបណ្តុះបណ្តាលដល់និស្សិតនាពេលកន្លងមកនេះ។
លោក គង់ មុនី នាយសេនាធិការ និងជាមេបញ្ជាការរងកងទ័ពជើងអាកាស ថ្លែងក្នុងពិធីបើកការហោះហើរ បង្ហាញ និងផ្សព្វផ្សាយ នាថ្ងៃទី ២៩ កញ្ញាថា ការហោះហើរជាលើកដំបូងនេះ ក្រោមកិច្ចសហការរវាង កងទ័ពជើងអកាស និងមជ្ឈមណ្ឌលឡានមី ដែលជាផែនការយុទ្ធសាស្ត្រក្នុងរយៈពេលវែង ក្នុងការបណ្តុះបណ្តាលធនធានមនុស្សកម្ពុជាក្នុងវិស័យហោះហើរ ក៏ដូចជាផ្នែកជួសជុលបច្ចេកទេស និងបញ្ជាយន្តហោះនៅក្នុងប្រទេសកម្ពុជា។
នេះ គឺជាការរួមចំណែកក្នុងការកសាងធនធានមនុស្ស ជាពិសេស ផ្នែកជំនាញអាកាសយានិក (Pilots) នៅក្នុងវិស័យអាកាសចរណ៍កម្ពុជា ឱ្យមានបរិមាណ និងគុណភាព ឱ្យដូចទៅនឹងបណ្តាប្រទេសនៅក្នុងតំបន់ និងនៅលើពិភពលោក ។
លោកថ្លែងថា៖ «កម្ពុជាកំពុងតែមានការអភិវឌ្ឍផ្នែកអាកាសចរណ៍ស៊ីវិល ដូចនៅក្នុងប្រទេសក្នុងតំបន់ និងនៅលើពិភពលោក ដែលតម្រូវការធនធានមនុស្សក្នុងស្រុកនៅក្នុងវិស័យនេះ ត្រូវតែមានជាចាំបាច់»។
លោក ចាន់ ជីសេង ប្រធានក្រុមប្រឹក្សាភិបាលនៃមជ្ឈមណ្ឌលបណ្តុះបណ្តាលឡានមី បានឱ្យដឹងដែរថា ការបើកមជ្ឈមណ្ឌលបណ្តុះណ្តាលធនធានមនុស្សផ្នែកជំនាញអាកាសយានិក ធ្វើឡើងដោយសារតែកម្ពុជាមានការខ្វះខាតធនធានមនុស្សផ្នែកជំនាញនេះ ជាជនជាតិខ្មែរ ខណៈវិស័យអាកាសចរណ៍ស៊ីវិលរបស់កម្ពុជា មានការរីកចម្រើន ។
លោកបន្តថា មជ្ឈមណ្ឌលនេះ គឺសម្រាប់បម្រើឱ្យនិស្សិតកម្ពុជា ដោយពួកគេមិនចាំបាច់ទៅរៀន នៅក្រៅប្រទេសនោះទេ គឺអាចរៀននៅក្នុងស្រុកបាន ដើម្បីបំពេញតម្រូវការផ្នែកវិស័យអាកាសចរណ៍របស់កម្ពុជា។ កន្លងមកនេះ កម្ពុជាមានការខ្វះខាតផ្នែកអាកាសយានិក វិស្វករ ពហុនិការ ដែលភាគច្រើនជាជនជាតិបរទេស ។
លោកថ្លែងថា៖ «សាលាដែលបង្កើតឡើងមកនេះ ដើម្បីបណ្តុះបណ្តាលធនធានមនុស្សជាជាជនខ្មែរ ឱ្យក្លាយជាអ្នកបើកបរខ្មែរ ជាអ្នកជួយខ្មែរ ពហុនិការរបស់យើងក៏ជាជនខ្មែរ ដើម្បីជំនួសជនបរទេសទៅថ្ងៃអនាគត និងបំពេញសេចក្តីត្រូវការរបស់ [អាកាសចរណ៍] នៅក្នុងស្រុក យើងប្រើកូនខ្មែរ»។
លោក ខាន់ វណ្ណា អគ្គនាយកបច្ចេកទេសនៃរដ្ឋលេខាធិការដ្ឋានអាកាសចរស៊ីវិលឱ្យដឹងដែរថា កិច្ចសហប្រតិបត្តិការ រវាងមជ្ឈមណ្ឌលបណ្តុះបណ្តាលឡានមី និងកងទ័ពជើងអាកាស នឹងមានកម្មវិធីជាក់លាក់ក្នុងការរៀបចំផែនការ យុទ្ធសាស្ត្រ សម្រាប់ហ្វឹកហ្វឺន និងបណ្តុះបណ្តាលធនធានមនុស្សនៅក្នុងប្រទេសកម្ពុជាឱ្យមានចំនួនធំធេងជាងបច្ចុប្បន្ន ដូចនៅបណ្តាប្រទេសផ្សេងៗទៀតដែលកំពុងអភិវឌ្ឍន៍ជឿនលឿននៅក្នុងសកលលោក។
លោកថ្លែងថា ចំពោះមុខគោលការណ៍កិច្ចសហប្រតិបត្តិការ រវាងមជ្ឈមណ្ឌលបណ្តុះបណ្តាលឡានមី និងកងទ័ពជើងអាកាស មិនត្រឹមតែបណ្តុះបណ្តាលអាកាសយានិកនោះទេ ប៉ុន្តែក៏នឹងឈានទៅរកការបណ្តុះបណ្តាលបន្ថែមទៀតនូវធនធានមនុស្សផ្នែកវិស្វករយន្តហោះ ដែលប្រទេសកម្ពុជានៅមានការខ្វះខាតជាច្រើន។ ជាក់ស្តែងការបម្រើសេវាពិនិត្យមើល និងថែទាំយន្តហោះមានវិស្វករបរទេសជាច្រើនដែលកំពុងបម្រើការងារឱ្យក្រុមហ៊ុនក្នុងស្រុក ដោយសារតែធនធានមនុស្សរបស់ប្រទេសកម្ពុជា នៅមានកម្រិត។
លោកថ្លែងថា៖ «ដូច្នះកិច្ចសហប្រតិបត្តិការនេះ ជាមូលដ្ឋានអាទិភាពដ៏រឹងមាំ ជំរុញឱ្យមានធនធានមនុស្សគ្រប់ជំនាញ ស្របតាមតម្រូវការទីផ្សារអាកាសចរណ៍ស៊ីវិល សម្រាប់បច្ចុប្បន្ន និងអនាគត»៕