.jpg)
ទិដ្ឋភាពទឹកលិចនិងការជម្លៀសពលរដ្ឋនៅស្រុកសិរីសោភ័ណ ខេត្តបន្ទាយមានជ័យ កាលពីថ្ងៃទី ២៦ កញ្ញា។ រូបថត ហ្វេសប៊ុក
បន្ទាយមានជ័យៈ ថ្វីបើកម្ពស់ទឹកនៅតាមអូរជាប់ព្រំដែនកម្ពុជា-ថៃ ក្នុងខេត្តបន្ទាយមានជ័យបានស្រកចុះវិញបណ្ដើរៗក្ដី ប៉ុន្តែក្រុងសិរីសោភ័ណ និងស្រុកមង្គលបុរី ទឹកបានបន្តជន់ឡើង និងលិចលង់កាន់តែខ្លាំងធ្វើឲ្យចំនួនគ្រួសាររងគ្រោះដែលត្រូវបានជម្លៀសទៅកាន់ទីទួលសុវត្ថិភាពកើនឡើងដល់ជាង ១ ១០ ០គ្រួសារ។ នេះបើតាមលោក ឈុន ប៊ុនថា នាយកទីចាត់ការអន្តរវិស័យនៃរដ្ឋបាលខេត្តបន្ទាយមានជ័យ។
លោក ប៊ិនថា បានប្រាប់ ភ្នំពេញ ប៉ុស្តិ៍ ពីថ្ងៃទី ២៩ កញ្ញាថា ពេលនេះទឹកនៅតាមដងអូរជាប់ព្រំដែនកម្ពុជា-ថៃ បានស្រកចុះ ជាបណ្ដើរៗហើយពិសេសអូរព្រំដែនកម្ពុជា-ថៃ ក្នុងស្រុកម៉ាឡៃទឹកបានស្រកចុះដល់២,៨ម៉ែត្រហើយបើគិតត្រឹមព្រឹកថ្ងៃទី ២៩ កញ្ញា ខណៈកម្ពស់ទឹកនៅអូរព្រំដែនក្នុងក្រុងប៉ោយប៉ែត្របានស្រកអស់ ០,១៧ ម៉ែត្របើធៀបនឹងថ្ងៃទី ២៨ ខែ កញ្ញា ឆ្នាំ ២០២១។
លោកបានបញ្ជាក់ថា៖ «ការស្រកចុះនូវកម្ពស់ទឹកនៅតាមអូរព្រំដែនក្នុងភូមិសាស្ត្រក្រុងស្រុកទាំងនេះ បានធ្វើឲ្យមានការជន់លិចយ៉ាងគំហុកនៅក្នុងក្រុងសិរីសោភ័ណ និងស្រុកមង្គលបុរី និងធ្វើឲ្យចំនួនពលរដ្ឋដែលរងផលប៉ះពាល់ដោយគ្រោះទឹកជំនន់នេះ កើនឡើងរហូតដល់ ១៨ ៧១៥ គ្រួសារ ក្នុងនោះពលរដ្ឋចំនួន ១ ១៥០ គ្រួសារ បានជម្លៀសទៅកាន់ទួលសុវត្ថិភាព»។
បើតាមលោក ប៊ុនថា ក្នុងចំណោមពលរដ្ឋ ១ ១៥០ គ្រួសារ ដែលត្រូវបានជម្លៀសទៅទីទួលសុវត្ថិភាពគឺភាគច្រើនជាពលរដ្ឋដែលរស់នៅជាប់មាត់ស្ទឹង ព្រែក និងដងអូរនានា ក្នុងក្រុងសិរីសោភ័ណ ស្រុកមង្គលបុរី ក្រុងប៉ោយប៉ែត និងស្រុកភ្នំស្រុក។
លោកបានបន្តថា ក្នុងរយៈពេល២ថ្ងៃនេះ មេឃស្រឡះល្អនៅពេលថ្ងៃនិងមានភ្លៀងធ្លាក់តិចតួចនៅពេលយប់នៅផ្នែកខ្លះនៃស្រុកភ្នំស្រុក ភាគខាងក្រោមនៃតំបន់ជួរភ្នំដងរែក។ ទោះជាបែបនេះក្ដី រហូតមកទល់ពេលនេះ មិនទាន់មានពលរដ្ឋណាម្នាក់ទទួលរងគ្រោះថ្នាក់ដោយសារគ្រោះទឹកជំនន់នេះនៅឡើយទេ។
លោកបានបន្ថែមថា៖ «ប៉ុន្តែផលប៉ះពាល់លើដំណាំកសិកម្ម របស់ប្រជាពលរដ្ឋ មានភាពស្រួចស្រាល់កាន់តែច្រើនឡើង ដែលគិតត្រឹមព្រឹកថ្ងៃទី ២៨ ខែ កញ្ញា ឆ្នាំ ២០២១ នេះ ទឹកបានជន់លិច និងប៉ះពាល់ដំណាំស្រូវរហូតដល់ចំនួន ២៥ ២២៣ ហិកតា និងដំណាំរួមផ្សំចំនួន៣០១ហិកតាព្រមទាំងបានជន់លិចផ្លូវលំជនបទសរុបជាង ១០០ គីឡូម៉ែត្រផងដែរ»។
ទន្ទឹមនឹងនេះដែរសមត្ថកិច្ចគ្រប់លំដាប់ថ្នាក់ទូទាំងខេត្តបន្ទាយមានជ័យ និងកម្លាំងអន្តរាគមន៍ពីថ្នាក់ជាតិតាមរយៈគណៈកម្មាធិការជាតិគ្រប់គ្រងគ្រោះមហន្តរាយ បើកយុទ្ធនាការរំដោះទឹកជំនន់ចេញពីក្រុងស្រុកទាំង ២ នេះ តាមរយៈការជីកកាយស្ដារប្រព័ន្ធអូរ និងប្រឡាយ បើកមុខទឹកដើម្បីឲ្យហូរចាក់ទៅក្នុងបឹងទន្លេសាប។
លោក រ័ត្ន ដាស៊ីណង់ អភិបាលស្រុកមង្គលបុរី បានប្រាប់ ភ្នំពេញ ប៉ុស្តិ៍ថា ពេលនេះស្ថានភាពទឹកជំនន់នៅស្រុកមង្គលបុរី មានសភាពកាន់តែខ្លាំងឡើង ដោយសារមានទឹកហូរធ្លាក់យ៉ាងគំហុកពីក្រុងប៉ោយប៉ែត ស្រុកម៉ាឡៃ និងផ្នែកខ្លះទៀតនៃស្រុកបវេល ខេត្តបាត់ដំបង។
លោកបានបញ្ជាក់ថា៖ «ដើម្បីកាត់បន្ថយការជន់លិចលំនៅឋាន អាជ្ញាធរយើងបានប្រើគ្រឿងចក្រ ជីកកាយស្ដារប្រព័ន្ធអូរនិងប្រឡាយបើកមុខទឹកចំនួន ៨ កន្លែង ដើម្បីឲ្យទឹកហូរស្រុងចុះទៅកាន់បឹងទន្លេសាប។ ប្រសិនបើគ្មានភ្លៀងធ្លាក់ និងទឹកជំនន់ធ្លាក់ពីប្រទេសថៃ ទៀតទេនោះ ក្នុងរយៈពេល ១ សប្ដាហ៍ខាងមុខនេះ ទឹកនឹងស្រកទៅរកសភាពដើមវិញ»។
ស្រដៀងគ្នានេះ លោក សុខ ឫទ្ធី អភិបាលរងស្រុកភ្នំស្រុក បានប្រាប់ ភ្នំពេញ ប៉ុស្តិ៍ថា ជំនន់ទឹកភ្លៀង និងទឹកដែលហូរធ្លាក់ពីតំបន់ជួរភ្នំដងរែក បានធ្វើឲ្យកម្ពស់ទឹកនៅអាងត្រពាំងថ្ម និងអាងស្ពានស្រែង ហក់ឡើងលើសពីកម្រិតប្រកាសអាសន្ន បង្កឲ្យជន់លិចនិងប៉ះពាល់យ៉ាងធ្ងន់ធ្ងរដល់ជីវភាពរស់នៅរបស់ពលរដ្ឋទូទាំងស្រុកភ្នំស្រុក ពិសេសពលរដ្ឋនៅភូមិឈូកអាង ឃុំពន្លៃ។
លោកបានបញ្ជាក់ថា៖ «គិតត្រឹមថ្ងៃទី ២៩ ខែ កញ្ញា ឆ្នាំ ២០២១ នេះ គ្រោះទឹកជំនន់បានបង្ខំឲ្យពលរដ្ឋ ៤៨ គ្រួសារជម្លៀសមកទីទួលសុវត្ថិភាព និងបានប៉ះពាល់ដំណាំស្រូវដំឡូងមី និងដំណាំរួមផ្សំ សរុបជាង ១ ម៉ឺនហិកតា»។
បើតាមលោក ឫទ្ធី នៅក្នុងខណៈនេះក្រុមការងាររដ្ឋបាលស្រុកភ្នំស្រុកកំពុងសហការជាមួយក្រុមមន្ត្រីជំនាញនៃមន្ទីរធនធានទឹក ជីកកាយប្រឡាយនិងអូរមួយចំនួន ដើម្បីរំដោះទឹកពីក្នុងភូមិឲ្យហូរចាក់ទៅបឹងទន្លេសាប ព្រោះកម្ពស់ទឹកនៅបឹងទន្លេសាបនៅទាបនៅឡើយ។
ដោយឡែកនៅឯខេត្តព្រះវិហារ ទឹកស្ទឹងសែនបានហូរចុះពីផ្នែកខាងលើមកចាល់លិចនៅភាគពាយព្យនៃក្រុងព្រះវិហារដែលជាតំបន់ក្រពះអាងនៃស្ទឹងសែន ប៉ុន្តែមិនបង្កផលប៉ះពាល់ដល់លំនៅឋានរបស់ពលរដ្ឋនោះទេ។នេះបើតាមលោក ចាប កុយ ប្រធានមន្ទីរធនធានទឹក និងឧតុនិយមខេត្តព្រះវិហារ។
លោកបានបញ្ជាក់ថា៖ «នៅក្រោយបុណ្យភ្ជុំខាងមុខនេះ ទឹកនឹងហូរស្រកពីក្រុងព្រះវិហារ ឆ្ពោះទៅខ្សែទឹកខាងក្រោម នៅក្នុងខេត្តសៀមរាប ហើយបន្ទាប់មកទឹកនឹងបន្តហូរចុះទៅខេត្តកំពង់ធំ។ ទោះយ៉ាងណា ឆ្នាំនេះ ជំនន់ទឹកស្ទឹងសែន ទំនងជាមិនធំនិងធ្ងន់ធ្ងរដូចឆ្នាំមុននោះទេ ព្រោះនៅពេលនេះផ្ទៃមេឃស្រឡះ និងមិនមានភ្លៀងធ្លាក់ខ្លាំងនោះទេ»។
យ៉ាងណាក្ដី លោក ចាប កុយ នៅតែអំពាវនាវឲ្យពលរដ្ឋដែលរស់នៅជាប់មាត់ស្ទឹងសែនត្រង់ខ្សែទឹកខាងក្រោមបង្កើនការប្រុងប្រយ័ត្ន និងត្រៀមលក្ខណៈជាមុន ដើម្បីបង្ការគ្រោះថ្នាក់ផ្សេងៗ៕
វីដេអូ៖
