ភ្នំពេញៈ ក្រុមប្រឹក្សាជាតិកម្ពុជាដើម្បីកុមារ (ក.ជ.ក) សហការជាមួយអង្គការភ្លែនអន្តរជាតិកម្ពុជា អង្គការសកម្មភាព ដើម្បីកុមារឆាលហ្វាន់កម្ពុជា អង្គភាពការពារកុមារ និងដៃគូ នៅថ្ងៃទី ២៩ កញ្ញានេះ បានសម្ពោធដាក់ឱ្យប្រើប្រាស់ជាផ្លូវការនូវ «ផែនការអនុវត្តគោលនយោបាយជាតិស្តីពីប្រព័ន្ធកិច្ចការពារកុមារ ឆ្នាំ ២០១៩-២០២៩» ដើម្បីជំរុញឱ្យក្រសួងស្ថាប័នពាក់ព័ន្ធថ្នាក់ជាតិ និងថ្នាក់ក្រោមជាតិអនុវត្តផែនការនេះប្រកបដោយប្រសិទ្ធភាព និងប្រសិទ្ធផល។
គោលនយោបាយជាតិនេះត្រូវបានចុះហត្ថលេខាដាក់ឱ្យប្រើប្រាស់ ដោយលោកនាយករដ្ឋមន្ត្រី ហ៊ុន សែន ជាប្រធានកិត្តិយសក្រុមប្រឹក្សាជាតិកម្ពុជា ដើម្បីកុមារកាលពីថ្ងៃទី ២៩ ខែឧសភា ឆ្នាំ ២០២០។ ផែនការអនុវត្តន៍គោលនយោបាយជាតិស្តីពីប្រព័ន្ធកិច្ចការពារកុមារឆ្នាំ ២០១៩-២០២៩ ក្នុងគោលបំណងជំរុញឱ្យក្រសួងស្ថាប័នពាក់ព័ន្ធថ្នាក់ជាតិ និងថ្នាក់ក្រោមជាតិអនុវត្តផែនការនេះប្រកបដោយប្រសិទ្ធភាព និងប្រសិទ្ធផល។ យោងតាមសេចក្តីប្រកាសព័ត៌មាននៅថ្ងៃទី ២៩ ខែកញ្ញា ស្ដីពីពិធីប្រកាសដាក់ឱ្យប្រើប្រាស់ជាផ្លូវការ ផែនការអនុវត្តគោលនយោបាយជាតិ។
លោក វង សូត រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា និងជាប្រធានក្រុមប្រឹក្សាជាតិកម្ពុជា ដើម្បីកុមារថ្លែងក្នុងពិធីនេះថា ពិធីប្រកាសជាផ្លូវការនាពេលនេះ រៀបចំឡើងក្នុងគោលបំណងផ្សព្វផ្សាយដល់ក្រសួងស្ថាប័ន និងអង្គការដៃគូពាក់ព័ន្ធក្នុងការពិនិត្យលទ្ធភាពទទួលយកនូវសកម្មភាពពាក់ព័ន្ធដែលមាននៅក្នុងផែនការអនុវត្ដគោលនយោបាយជាតិស្តីពីប្រព័ន្ធកិច្ចការពារកុមារឆ្នាំ ២០១៩-២០២៩ដើម្បីឱ្យមានសង្គតិភាពទៅនឹងផែនការប្រតិបត្តិរបស់ក្រសួងស្ថាប័ននីមួយៗ។
លោកថ្លែងថា៖ «ទោះបីមានការយកចិត្តទុកដាក់ពីរាជរដ្ឋាភិបាលដោយបានបង្កើតនូវយន្តការជាច្រើនក្នុងការគ្រប់គ្រង និងផ្តល់សេវាដល់មុខសញ្ញាកុមារទូទៅ និងកុមាររងគ្រោះយ៉ាងណាក៏ដោយ ក៏នៅមានកុមារមួយចំនួនកំពុងរស់នៅក្នុងស្ថានភាពលំបាករងគ្រោះដែលត្រូវការការគាំទ្រ និងអន្តរាគមន៍ជាចាំបាច់»។
«យើងត្រូវតែពង្រឹងយន្តការអនុវត្តប្រព័ន្ធកិច្ចការពារកុមារ និងកសាងសមត្ថភាពធនធានមនុស្ស និងហិរញ្ញវត្ថុសម្រាប់អនុវត្តផែនការសកម្មភាព ដើម្បីទប់ស្កាត់ និងឆ្លើយតបចំពោះអំពើហិង្សាលើកុមារឱ្យមានប្រសិទ្ធភាពស្របតាមស្ថានភាពជាក់ស្តែងនៅឡើយ»។
លោក វង សូត ថ្លែងថា បច្ចុប្បន្នការអន្តរាគមន៍ចំពោះកុមាររងគ្រោះនៅដាច់ដោយឡែកដោយមិនទាន់មានក្របខ័ណ្ឌការងារ និងប្រព័ន្ធគ្រប់គ្រងច្បាស់លាស់នៅឡើយ។
លោកថា៖ «ដូច្នេះគោលនយោបាយជាតិស្តីពីប្រព័ន្ធកិច្ចការពារកុមារនេះមានសារៈសំខាន់ខ្លាំងណាស់ក្នុងការជួយដោះស្រាយបញ្ហាកុមារឱ្យមានលក្ខណៈជាប្រព័ន្ធ»។
លោកស្រី ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភាព្រឹទ្ធសភា និងអធិការកិច្ចថ្លែងក្នុងពិធីនេះដែរថា៖ «ការលើកកម្ពស់សិទ្ធិកុមារ និងកិច្ចការពារកុមារជាការងាររបស់យើងទាំងអស់គ្នាដែលតម្រូវឱ្យយើងរួបរួមគ្នាបំពេញការងារជាពហុវិស័យប្រទាក់ក្រឡាគ្នា»។
លោកស្រីថ្លែងថា កិច្ចការពារកុមារក៏ត្រូវបានពិភពលោកកំពុងតែយកចិត្តទុកដាក់ និងរួមគ្នាដើម្បីបង្ការទប់ស្កាត់ និងឆ្លើយតបការរំលោភបំពានគ្រប់ទម្រង់ផងដែរ ហើយកម្ពុជា ជាប្រទេសដែលកំពុងបោះជំហានទៅមុខក្នុងការចូលរួមលើកិច្ចការងារនេះយ៉ាងសកម្មសំដៅធ្វើឱ្យកាន់តែប្រសើរឡើងនូវការលើកកម្ពស់កិច្ចការពារកុមារ ដើម្បីជាឧត្តមប្រយោជន៍របស់កុមារគ្រប់រូប។
តំណាងប្រចាំប្រទេសនៃអង្គការភ្លែនអន្តរជាតិកម្ពុជា អ្នកស្រី គ្វីន នេតវ៉ង លើកឡើងថា ផែនការអនុវត្តគោលនយោបាយជាតិស្តីពីប្រព័ន្ធកិច្ចការពារកុមារគឺជាសមទ្ធិផលដ៏អស្ចារ្យមួយទៀត ដើម្បីលើកកម្ពស់កិច្ចការពារកុមារនៅកម្ពុជា។
លោកស្រីថ្លែងថា៖ «នេះគឺជាការប្តេជ្ញាចិត្តជាក់លាក់របស់រាជរដ្ឋាភិបាលកម្ពុជាលើការពង្រឹងការអនុវត្តកិច្ចការពារកុមារជាប្រព័ន្ធនៅកម្ពុជា។ វិធីសាស្ត្រជាប្រព័ន្ធស្តីពីការអនុវត្តកិច្ចការពារកុមារទាមទារឱ្យយើងម្នាក់ៗធ្វើការរួមគ្នា និងធានាឱ្យបាននូវកិច្ចការពារកុមារ និងសំឡេងរបស់ពួកគេជាពិសេសក្មេងស្រីដែលជាបេះដូងនៃការងាររបស់យើង»។
លោកស្រីថា៖ «ខ្ញុំជឿជាក់ថាដៃគូអភិវឌ្ឍន៍ជាច្រើនទៀតបានត្រៀមខ្លួនគាំទ្ររាជរដ្ឋាភិបាលកម្ពុជា ដើម្បីធ្វើឱ្យផែនការសកម្មភាពជាតិរយៈពេល ១០ ឆ្នាំខាងមុខនេះទទួលបានជោគជ័យសម្រាប់កុមាររាប់លាននាក់ជាពិសេសកុមារីនៅកម្ពុជា»។
កុមារី រិន ណងគា តំណាងកុមារ និងយុវជនលើកឡើងតាមរយៈពិធីនេះដោយបានថ្លែងអំណរគុណចំពោះការគាំទ្រ និងការឆ្លើយតបរបស់រាជរដ្ឋាភិបាលជាពិសេសក្រសួងពាក់ព័ន្ធនានាចំពោះកិច្ចគាំពារកុមារ និងយុវជននេះ។
កុមារីរូបនេះថា៖ «នាងខ្ញុំតំណាងឱ្យកុមារពិតជាមានសេចក្ដីសោមនស្សដែលរាជរដ្ឋាភិបាលកម្ពុជាបានដាក់ចេញឱ្យប្រើប្រាស់នូវផែនការ អនុវត្តគោលនយោបាយជាតិស្តីពីប្រព័ន្ធកិច្ចការពារកុមារឆ្នាំ ២០១៩-២០២៩ ដែលទាំងនេះជាជំហានថ្មីមួយក្នុងការវិនិយោគជាមួយកុមារ។ នេះគឺជាអ្វីដែលបង្ហាញពីការយកចិត្ដទុកដាក់យ៉ាងមោះមុតរបស់រាជរដ្ឋាភិបាល និងស្ថាប័នពាក់ព័ន្ធគ្រប់វិស័យអំពីការការពារសុវត្ថិភាពកុមារ និងឧត្ដមប្រយោជន៍របស់កុមារកម្ពុជា។ ការផ្សព្វផ្សាយ និងបណ្ដុះបណ្ដាលអំពីផែនការអនុវត្តគោលនយោបាយជាតិនេះ អ្នកពាក់ព័ន្ធដែលជាអ្នកដើរតួនាទីក្នុងការអនុវត្ដគោលនយោបាយនេះ និងធានាថា បញ្ហាដែលកុមារបានជួបប្រទះត្រូវបានដាក់បញ្ចូល ដើម្បីដោះស្រាយបានទាន់ពេលវេលាជាពិសេសការរៀបចំយន្តការមួយដែលងាយស្រួលឆ្លើយតប និងអន្តរាគមន៍ទៅលើករណីនានាដែលកុមារបានជួបប្រទះ»៕