.jpg)
ជនជាប់ចោទឈ្មោះ គុប ផា ដែលបានទាស់សម្តីជាមួយស្ត្រីរងគ្រោះ ហើយបានបង្កហេតុកាលពីថ្ងៃទី ២៧ ខែកុម្ភៈ ឆ្នាំ ២០១៩។ រូបថត គឹម សារុំ
ភ្នំពេញៈ តុលាការកំពូលនៅថ្ងៃទី ២៩ កញ្ញា បានប្រកាសសាលដីកា ដោយកែសំណងរដ្ឋប្បវេណី ពី ៤០០ លានរៀល ទៅ ៨០០ លានរៀលវិញ តាមការសម្រេចរបស់តុលាការខេត្តតាកែវ ដោយតម្រូវឱ្យជនជាប់ចោទសងសំណងទៅស្ត្រីរងគ្រោះពាក់ព័ន្ធនឹងបទចោទប៉ុនប៉ងឃាតកម្ម ប្រព្រឹត្តនៅភូមិព្រះម្លប់ ឃុំកណ្តឹង ស្រុកបាទី ខេត្តតាកែវ ក្រោយពីសំណុំរឿងនេះឡើងដល់សាលាឧទ្ធរណ៍ ហើយបានបន្ធូរបន្ថយសម្រាប់ជនជាប់ចោទ។
លោកចៅក្រម ជីវ កេង ប្រធានក្រុមប្រឹក្សាជំនុំជម្រះបានប្រកាសសាលដីកា ក្នុងបន្ទប់សវនាការថា សំណុំរឿងនេះមានជនជាប់ចោទឈ្មោះ គុប ផា អាយុ ៤៥ ឆ្នាំ។ រីឯនារីរងគ្រោះ ឈ្មោះ សាន្ត ចិន្តា អាយុ ២៥ ឆ្នាំ។
លោកថ្លែងថា៖ «ក្រុមប្រឹក្សាជំនុំជម្រះសម្រេចកែសំណងរដ្ឋប្បវេណីពី ៤០០ លានរៀល ទៅ ៨០០ លានរៀលវិញ។ សំណងនេះ គឺជនជាប់ចោទត្រូវសងទៅជនរងគ្រោះជាដើមបណ្តឹងរដ្ឋប្បវេណី»។
លោក មួង សុគន្ធ ជាមេធាវីការពារសិទ្ធិឱ្យស្ត្រីរងគ្រោះប្រាប់នៅថ្ងៃទី ២៩ កញ្ញា បន្ទាប់ពីចូលស្តាប់ការប្រកាសសាលដីកាថា លោកពេញចិត្តនឹងការសម្រេចរបស់តុលាការកំពូលដែលកែសំណងពី ៤០០ លានរៀល ទៅ ៨០០ លានរៀលវិញ។
លោកថ្លែងថា៖ «ចំពោះការទទួលបានសំណងរដ្ឋប្បវេណី គឺខ្ញុំជាមេធាវី នឹងដាក់ពាក្យសុំដីកាចូលជាស្ថាពរ។ បើតុលាការឆាប់ចេញដីកាមក អាចមិនលើសពី ១ ខែទៅ ២ ខែទេ»។
លោកមេធាវី មួង សុគន្ធ ប្រាប់ថា សំណុំរឿងនេះ នៅសាលាដំបូងខេត្តតាកែវ បានប្រកាសសាលក្រមផ្តន្ទាទោសជនជាប់ចោទដាក់ពន្ធនាគារ ១៤ ឆ្នាំ និងបង្គាប់ឱ្យជនជាប់ចោទឈ្មោះ គុប ផា សងសំណងរដ្ឋប្បវេណីចំនួន ៨០០ លានរៀលទៅស្ត្រីរងគ្រោះឈ្មោះ សាន្ត ចិន្តា។ ក្រោយពីទទួលរងទណ្ឌកម្មទោស និងសំណងរដ្ឋប្បវេណីមកជនជាប់ចោទមិនសុខចិត្ត ហើយបានប្តឹងជំទាស់ទៅសាលាឧទ្ធរណ៍រាជធានីភ្នំពេញ។
ពេលនោះសាលាឧទ្ធរណ៍បានបន្ថយទោសពីជាប់ពន្ធនាគារ ១៤ ឆ្នាំ មក ១០ ឆ្នាំវិញ។ ចំណែកសំណងរដ្ឋប្បវេណី ពី ៨០០ លានរៀល មកនៅ ៤០០ លានរៀលវិញ។ ប៉ុន្តែកូនក្តីរបស់លោកមិនសុខចិត្ត ក៏ប្តឹងសារទុក្ខមកតុលាការកំពូល ហើយត្រូវបានតុលាការកំពូលកែសំណងរដ្ឋប្បវេណីពី ៤០០ លានរៀលមកជា ៨០០ លានរៀលវិញ។
បើតាមលោកមេធាវីការពារសិទ្ធិឱ្យស្ត្រីរងគ្រោះអំពើរបស់ជនជាប់ចោទបានធ្វើទារុណកម្មស្ត្រីរងគ្រោះយ៉ាងសាហាវបំផុត ដោយជនជាប់ចោទបានជះទឹកអាស៊ីតលើមុខ និងខ្លួនប្រាណស្ត្រីរងគ្រោះ និងថែមទាំងប្រើកាំបិតប៉័ងតោកាប់ដាច់កដៃម្ខាង កាប់ក្បាល រួមទាំងធ្វើឱ្យជើងម្ខាងដាច់សរសៃជង្គង់ទៀត។
បើតាមអង្គហេតុរបស់តុលាការកំពូលបានបង្ហាញថា ជនជាប់ចោទឈ្មោះ គុប ផា បានទាស់សម្តីជាមួយស្ត្រីរងគ្រោះ ហើយបានបង្កហេតុកាលពីថ្ងៃទី ២៧ ខែកុម្ភៈ ឆ្នាំ ២០១៩ នៅភូមិព្រះម្លប់ ឃុំកណ្តឹង ស្រុកបាទី ខេត្តតាកែវ។ ក្រោយពីប្រព្រឹត្តជនជាប់ចោទត្រូវសមត្ថកិច្ចតាមចាប់បាននៅភូមិចំលងរមាំងលើ ឃុំអូរសំរិល ស្រុកសំឡូត ខេត្តបាត់ដំបង កាលពីថ្ងៃទី ៥ ខែកញ្ញា ឆ្នាំ ២០២០៕
