ភ្នំពេញៈ ក្រសួងអប់រំ យុវជន និងកីឡា ដោយមានការគាំទ្រពីប្រទេសនានាដែលមានអង្គការជាដៃគូអភិវឌ្ឍន៍នៅថ្ងៃទី ២៨ ខែកញ្ញា បានប្រកាសចែកសម្ភារសិក្សាតាមផ្ទះចំនួន ៧៦០ ១៨០ កញ្ចប់ ដល់សិស្សថ្នាក់ទី១ ទី២ នៃសាលាបឋមសិក្សារដ្ឋចំនួន ៧ ៣០៤ សាលានៅទូទាំង ២៥ រាជធានី-ខេត្ត ដែលអាក់ខានមិនបានរៀនសូត្រ។
បើតាមសេចក្ដីប្រកាសព័ត៌មានការប្រកាសចែកសម្ភារសិក្សាតាមផ្ទះដល់កុមារគឺក្រសួងអប់រំទទួលបានការគាំទ្រពីប្រទេស និងដៃគូមួយចំនួនក្នុងនោះមានសហភាពអឺរ៉ុប ទីភ្នាក់ងារសហប្រតិបត្តិការអភិវឌ្ឍន៍ស៊ុយអែត (SIDA) ភាពជាដៃគូសកលសម្រាប់ការអប់រំ (GPE) មូលនិធិសហប្រជាជាតិ ដើម្បីកុមារ និង USAID ជាដើម។
សេចក្ដីប្រកាសព័ត៌មានឱ្យដឹងថា ការចែកសម្ភារនេះនឹងចាប់ផ្តើមនៅសប្តាហ៍នេះដែលនឹងបានទៅដល់ដៃកុមារគ្រប់រូបដែលសិក្សានៅថ្នាក់ទី១ និងទី២ នៃសាលាបឋមសិក្សារដ្ឋទាំង ៧ ៣០៤ កន្លែងនៅទូទាំង ២៥ រាជធានី-ខេត្ត។ លើសពីនេះក៏មានការរៀបចំឯកសារបន្ថែមទៀតសម្រាប់គាំទ្រសិស្សានុសិស្សនិយាយភាសាដើមភាគតិចចំនួន ៥ ០០០ នាក់នៅខេត្តភាគឦសានកម្ពុជា ដើម្បីជួយឱ្យពួកគេសិក្សាដោយប្រើប្រាស់ភាសាផ្ទាល់ខ្លួនបានផងដែរ។
ខណៈសាលារៀនជាច្រើនបានចាប់ផ្តើមបើកដំណើរការឡើងវិញ។ កញ្ចប់សម្ភារអប់រំទាំងនេះរួមមានសៀវភៅពុម្ពសម្រាប់កុមារតាមវ័យ និងឯកសារស្វ័យសិក្សា ដើម្បីពង្រឹងអំណាន សំណេរ ការប្រកប និងគណិតវិទ្យា ដែលសុទ្ធតែជួយបំពេញបន្ថែមលើកម្មវិធីសិក្សាថ្នាក់ទី១ និងទី២ របស់ក្រសួងអប់រំ យុវជន និងកីឡា។
កញ្ចប់សម្ភារទាំងនេះក៏មានបញ្ចូលព័ត៌មានអំពីវិធីសាស្ត្រដែលមាតាបិតាអាចប្រើប្រាស់ ដើម្បីជួយគាំទ្រដល់ការអប់រំកូនៗ និងបន្តការពារពួកគេពីជំងឺកូវីដ ១៩ ដោយមានបញ្ចូលសាប៊ូ ១ ដុំ និងវេចខ្ចប់ដាក់ក្នុងកាបូបមេត្រីបរិស្ថាន សម្រាប់យកមកប្រើប្រាស់ឡើងវិញបានផងដែរ។
សេចក្ដីប្រកាសបញ្ជាក់ថា កញ្ចប់សម្ភារសិក្សាតាមផ្ទះថ្មីទាំងនេះត្រូវបានរៀបចំឡើង ដើម្បីគាំទ្រកុមាររៀនផ្ទាល់ក្នុងថ្នាក់រៀនផង និងនៅឯផ្ទះផងដោយឯកសារទាំងនេះត្រូវបានសម្រិតសម្រាំងឱ្យងាយសិក្សា និងមានប្រសិទ្ធភាពនៅគ្រប់ស្ថានភាពទាំងអស់។ ចំពោះកុមារដែលសាលារៀនរបស់ពួកគេនៅតែបន្តបិទទ្វារ ដោយសារកត្តាហានិភ័យបង្កឡើងដោយជំងឺកូវីដ ១៩ គឺកញ្ចប់សម្ភារអប់រំទាំងនេះជាធនធានដ៏មានតម្លៃដើម្បីធានាថាកុមារទាំងនោះនៅតែអាចបន្តការសិក្សាបាន។
លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា ថ្លែងតាមរយៈសេចក្ដីប្រកាសនេះថា នេះគឺជាពេលវេលាដ៏សែនលំបាកសម្រាប់ការអប់រំនៅទូទាំងពិភពលោករួមទាំងនៅកម្ពុជាផងដែរ។
លោកបានថ្លែងអរគុណដល់ប្រទេស និងអង្គការដៃគូចំពោះការឧបត្ថម្ភសម្ភារសិក្សាដល់សិស្សថ្នាក់ទី១ ទី២ ដែលនឹងទទួលបានការសិក្សាត្រៀម និងអាចចាប់ផ្តើមបានយ៉ាងល្អនៅពេលដែលថ្នាក់រៀនបើកដំណើរការពេញលេញឡើងវិញ។
លោកថ្លែងថា៖ «បច្ចុប្បន្ននេះយើងកំពុងចាប់ផ្តើមបើកដំណើរការសាលារៀនឡើងវិញ ប៉ុន្តែយើងត្រូវតែធ្វើការងារនេះយ៉ាងប្រុងប្រយ័ត្នដោយប្រើប្រាស់យុទ្ធសាស្ត្របញ្ចូលគ្នារវាងការសិក្សាផ្ទាល់ក្នុងសាលារៀនជាមួយនឹងការសិក្សានៅតាមផ្ទះ»។
លោកស្រី Carmen Moreno ឯកអគ្គរដ្ឋទូតសហភាពអឺរ៉ុបប្រចាំប្រទេសកម្ពុជា បានថ្លែងថាសាលារៀននឹងបើកដំណើរការឡើងវិញ ប៉ុន្តែសិស្សទាំងនេះមិនអាចត្រឡប់ទៅអាយុ ៦ ឬ ៧ ឆ្នាំម្តងទៀតបានឡើយ។ អាយុកម្រិតនេះផ្តល់ឱកាសល្អបំផុតសម្រាប់ឱ្យកុមាររៀនអាន ប្រកបអក្សរ និងរាប់លេខបានយ៉ាងល្អ។
លោកស្រីថ្លែងថា៖ «យើងមិនអាចមិនអើពើ និងទុកកុមារទាំងនេះឱ្យបន្តខកខានការសិក្សារបស់ពួកគេឡើយ។ ពួកគេមានសិទ្ធិទទួលបានការអប់រំទោះជាស្ថិតក្នុងបរិបទដ៏សែនលំបាកនៃការរាតត្បាតជាសកលនៃជំងឺកូវីដ ១៩ ក៏ដោយ»។
លោកស្រីបន្តថា៖ «យើងដឹងថាការសិក្សាដោយប្រើឯកសារជាក្រដាសសម្រាប់កុមារនៅក្រុមអាយុនេះ មានប្រសិទ្ធភាពជាងការសិក្សាតាមប្រព័ន្ធអនឡាញ។ ដូចនេះហើយទើបយើងរីករាយជាខ្លាំងក្នុងការសហការជាមួយរាជរដ្ឋាភិបាលកម្ពុជា និងដៃគូ CDPF ទាំងអស់របស់យើង ដើម្បីផ្តល់នូវកញ្ចប់សម្ភារសម្រាប់សិក្សានៅតាមផ្ទះទាំងនេះ»។
លោក Magnus Saemundsson លេខាទី១ នៃស្ថានទូតស៊ុយអែតបានបង្ហាញថា ភ័ស្តុតាងដែលរកឃើញតាមរយៈការស្រាវជ្រាវជុំវិញពិភពលោកបង្ហាញថា ការអប់រំនាំមកនូវការផ្លាស់ប្តូរយូរអង្វែងសម្រាប់ជីវិតរបស់កុមារ។ ការអប់រំមិនត្រឹមតែប្រសើរសម្រាប់បុគ្គលម្នាក់ៗប៉ុណ្ណោះទេ ការអប់រំគឺប្រសើរសម្រាប់ប្រជាជាតិទាំងមូលទៀតផង។ ការវិនិយោគលើការអប់រំមិនត្រឹមតែជារឿងត្រឹមត្រូវដែលត្រូវធ្វើប៉ុណ្ណោះទេ តែជាការវិនិយោគសេដ្ឋកិច្ចដ៏វៃឆ្លាត។
លោកថ្លែងថា៖ «ការបិទសាលាទាំងអស់នៅកម្ពុជា ដើម្បីការពារការឆ្លងរាលដាលវីរុសរាតត្បាតជាសកលបានបង្កការខាតបង់ដល់វិស័យអប់រំយ៉ាងមហិមា ហើយមិនខុសគ្នាទេបញ្ហានេះកំពុងតែកើតឡើងក្នុងប្រទេសជាច្រើននៅក្នុងពិភពលោកផងដែរ»។
លោកស្រី Hanh Nguyen ប្រធានបេសកកម្មស្តីទីរបស់ USAID កម្ពុជាថ្លែងថា USAID គឺជាអ្នកគាំទ្រប្រកបដោយមោទនភាពជាយូរមកហើយសម្រាប់ពលរដ្ឋកម្ពុជា។ ការសហការរបស់ USAID ជាមួយនឹងដៃគូចម្រុះដែលកំពុងមានវត្តមាននៅទីនេះរាប់បញ្ចូលទាំងគ្រូ និងសិស្សានុសិស្សដែលជាអ្នកពោរពេញដោយការប្តេជ្ញាចិត្តនៅកម្ពុជា គឺជាសក្ខីកម្មដែលបង្ហាញពីការគាំទ្រនេះ។ «USAIDជឿថា ក្រុមការងារដែលពោរពេញដោយការប្តេជ្ញាចិត្តហើយដែលបានខិតខំចែករំលែកជំនាញ និងបទពិសោធបច្ចេកទេសរបស់ខ្លួនអាចនាំឱ្យមានលទ្ធផលជាក់លាក់ និងប្រសិទ្ធភាពយូរអង្វែង»។
កញ្ចប់សម្ភារសិក្សាដែលកំពុងត្រូវបានចែកចាយនេះ ត្រូវបានរៀបចំឡើងដោយអ្នកអប់រំនៅកម្ពុជា អ្នកជំនាញរបស់ក្រសួង អ្នកនិពន្ធជាតិ និងអ្នករចនាក្រាហ្វិក។ សម្ភារទាំងនេះគឺជាធនធានដ៏មានតម្លៃសម្រាប់បម្រើផលប្រយោជន៍សាលារៀន៕