ភ្នំពេញៈ ក្រសួងសាធារណការនិងដឹកជញ្ជូនបានឲ្យដឹងថាការលក់ស្លាកលេខពិសេស និងលេខពិសេសផ្ទាល់ខ្លួនសម្រាប់រថយន្តសរុបបានជាង ១៨ ម៉ឺនស្លាក លេខគិតចាប់ពីឆ្នាំ ២០១៧ មក ដោយក្នុងនោះទទួលបានថវិកាសរុបប្រមាណជាង ៦១ លានដុល្លារ។
ការប្រកាសយ៉ាងដូច្នេះបានធ្វើឡើងនៅក្នុងកម្មវិធីផ្សាយផ្ទាល់របស់ក្រសួងសាធារណការនិងដឹកជញ្ជូនដែលមានឈ្មោះថា «MPWT LIVE SHOW» នៅព្រឹកថ្ងៃទី ៣០ ខែ កញ្ញា ឆ្នាំ ២០២១ នេះ ដែលផ្តល់ឱកាសឲ្យសាធារណជន អាចសួរសំណួរដោយផ្ទាល់តាមរយៈការ ខមមិន។
លោកស្រី កុយ សុដានី រដ្ឋលេខាធិការក្រសួងសាធារណការ និងដឹកជញ្ជូន និងជាប្រធានគណៈកម្មាធិការអន្តរក្រសួងគ្រប់គ្រងការលក់ស្លាកលេខពិសេស ដែលវាគ្មិនកិត្តិយស បានលើកឡើងថា ចាប់តាំងពីក្រសួងអនុញ្ញាតឲ្យប្រើប្រាស់លេខពិសេស កាលពីឆ្នាំ ២០១៧ មក ស្លាកលេខពិសេសដែលលក់បានគឺមានចំនួន ១៧ ៩០៣៤ ស្លាកលេខ ដោយទទួលបានចំណុលប្រមាណ ៤៦ ៥៧៨ ១៥៨ ដុល្លារ ។
លោកស្រីបន្តថា ចំពោះស្លាកលេខពិសេសផ្ទាល់ខ្លួនដែលក្រសួងបានប្រកាសឲ្យប្រើប្រាស់ចាប់តាំងពីដើមឆ្នាំ ២០២០ គឺលក់បានចំនួន ៧ ៥៧៨ ស្លាកលេខ ដោយទទួលបានចំណូលប្រមាណ ១៤ ៩៧៨ ១៥១ ដុល្លារ។
យ៉ាងណា លោកស្រីបញ្ជាក់ថា៖ «ការលក់ស្លាកលេខពិសេសនេះដែរ សម្រាប់រយៈពេល ៩ ខែដើមឆ្នាំ ២០២១ នេះ មានការធ្លាក់ចុះប្រមាណ ៤,៨ ភាគរយ បើប្រៀបធៀបនឹង រយៈពេលដូចគ្នា ក្នុងឆ្នាំ ២០២០ ដោយសារតែមានបញ្ហាកាផ្ទុះឡើងនៃជំងឺកូវីដ ១៩»។