The Phnom Penh Post Search

Search form

Logo of Phnom Penh Post newspaper Phnom Penh Post - ADB ផ្ដល់​កម្ចី $៨២ ​លាន កែលម្អ​ផ្លូវជាតិ​​ក្នុង​ខេត្ត​ ២ ដើម្បី​ជំរុញ​​ការអភិវឌ្ឍ​សេដ្ឋកិច្ច




ADB ផ្ដល់​កម្ចី $៨២ ​លាន កែលម្អ​ផ្លូវជាតិ​​ក្នុង​ខេត្ត​ ២ ដើម្បី​ជំរុញ​​ការអភិវឌ្ឍ​សេដ្ឋកិច្ច

Content image - Phnom Penh Post
ទិដ្ឋភាព​នៃ​ការធ្វើដំណើរ​លើផ្លូវ​ជាតិ ស្ថិតនៅក្នុង​ខេត្តព្រៃវែង​។ រូបថត PMWT Page

ADB ផ្ដល់​កម្ចី $៨២ ​លាន កែលម្អ​ផ្លូវជាតិ​​ក្នុង​ខេត្ត​ ២ ដើម្បី​ជំរុញ​​ការអភិវឌ្ឍ​សេដ្ឋកិច្ច

ភ្នំពេញៈ ធនាគារ​អភិវឌ្ឍន៍​អាស៊ី (ADB) បានអនុម័ត​ប្រាក់កម្ចី​ចំនួន ៨២ ​លាន​ដុល្លារ​ ដើម្បី​កែលម្អ​ផ្លូវជាតិ​ និង​ផ្លូវ​ខេត្ត​ប្រវែង ៤៨ ​គីឡូម៉ែត្រ​ក្នុង​ខេត្តព្រៃវែង និង​ខេត្តកណ្តាល​ ដើម្បី​ជំរុញ​ការអភិវឌ្ឍ​សេដ្ឋកិច្ច​តាម​ច្រករបៀង​សេដ្ឋកិច្ច​មហា​អនុតំបន់​មេគង្គ​។

ជំនួយ​ថ្មី​នេះ​គឺជា​ដំណាក់កាល​ទី​២ នៃ​គម្រោង​ធ្វើឱ្យ​ប្រសើរ​ឡើង​នូវ​បណ្តាញ​ផ្លូវថ្នល់​ ដែល​មាន​គោលបំណង​ពង្រឹង​ការតភ្ជាប់​កម្ពុជា​ជាមួយ​វៀតណាម និង​គាំទ្រ​ការអភិវឌ្ឍ​គ្រឿង​សម្របសម្រួល​ការឆ្លងដែន​នៅក្នុង​ខេត្ត​ទាំង​ ២​។

ADB បញ្ជាក់​ក្នុង​សេចក្តី​ប្រកាស​ព័ត៌មាន​កាលពី​ថ្ងៃទី​ ២៩ ខែកញ្ញា​ថា ការធ្វើឱ្យ​ប្រសើរ​ថ្មី​នេះ​នឹង​ប្រើប្រាស់​ការរចនា​ដែល​ធន់​នឹង​គ្រោះមហន្តរាយ​និង​អាកាសធាតុ និង​ជួយ​ឱ្យ​ក្រសួង​សាធារណការ និង​ដឹកជញ្ជូន​គ្រប់គ្រង​ផ្លូវ​បានល្អ​ប្រសើរ ដោយ​កាត់បន្ថយ​ការផ្ទុក​លើស​ចំណុះ​យានយន្ត​​ ដែល​ជា​រឿយៗ​ធ្វើឱ្យ​ខូច​ផ្លូវ និង​នាំឱ្យមាន​ការជួសជុល​មុនពេល​កំណត់​។

លោក Mohammad Nazrul Islam អ្នកជំនាញ​ផ្នែក​ដឹកជញ្ជូន​របស់​ធនាគារ​អភិវឌ្ឍន៍អាស៊ី​ថ្លែង​ក្នុង​សេចក្តី​ប្រកាស​ព័ត៌មាន​នេះ​ថា ការដឹកជញ្ជូន​តាមផ្លូវ​គោក​គឺជា​មធ្យោបាយ​ចម្បង​នៃ​ចរាចរណ៍​ទំនិញ និង​មនុស្ស​នៅក្នុង​ប្រទេស​កម្ពុជា​ និង​រវាង​ប្រទេស​មហា​អនុតំបន់​ទន្លេមេគង្គ​។ គម្រោង​នេះ​នឹង​ពង្រីក​លទ្ធភាព​ទទួលបាន​ការអប់រំ​សេវា​សុខភាព​ក៏ដូចជា​សេវាកម្ម​សាធារណៈ​ដទៃទៀត​ក្នុង​ចំណោម​សហគមន៍​មូលដ្ឋាន​ជាពិសេស​ពលរដ្ឋ​ក្រីក្រ​នៅតាម​ជនបទ​។

លោក​ថ្លែងថា​៖ «​វា​ក៏​នឹង​ជួយ​តភ្ជាប់​កាន់តែ​ប្រសើរ​ទៅនឹង​ទីផ្សារ និង​ឱកាស​សេដ្ឋកិច្ច​តាមរយៈ​បណ្តាញ​ផ្លូវថ្នល់​ប្រកបដោយ​ប្រសិទ្ធភាព​សុវត្ថិភាព​ និង​ភាពធន់​នឹង​អាកាសធាតុ​ដែល​តភ្ជាប់​កម្ពុជា​ជាមួយ​វៀតណាម​តាម​ច្រករបៀង​សេដ្ឋកិច្ច​ខាងត្បូង​នៃ​មហា​អនុតំបន់​មេគង្គ​»​។

សេចក្តី​ប្រកាស​ព័ត៌មាន​បញ្ជាក់ថា ដើម្បី​ដោះស្រាយ​បញ្ហា​ប្រឈម​ទាំងនេះ រាជរដ្ឋាភិបាល​បាន​បង្កើត​ផែនការ​ជាតិ​មួយ​ ដើម្បី​កសាង​ហេដ្ឋារចនាសម្ព័ន្ធ​ដែល​មាន​គុណភាព​ខ្ពស់ និរន្តរភាព និង​ភាពធន់​នឹង​អាកាសធាតុ​ដែល​អាចបំពេញ​តម្រូវការ​ប្រជាពលរដ្ឋ និង​កំណើន​ការងារ​អំឡុង​ឆ្នាំ​ ២០៣០​។ ផ្លូវ​កសាង​ក្នុង​គម្រោង​ថ្មី​នេះ​ត្រូវបាន​បញ្ចូល​ក្នុង​បញ្ជី​គម្រោង​ផែនការ​ជាតិ​នេះ​។

ដំណាក់កាល​ទី១ នៃ​គម្រោង​ដែល​ត្រូវ​បានអនុម័ត​ដោយ ADB ក្នុង​ឆ្នាំ​ ២០១៧ គ្របដណ្តប់​លើផ្លូវ​ជាតិ​ចំនួន ១៤៧ គីឡូម៉ែត្រ​ក្នុង​ខេត្តព្រៃវែង សៀមរាប និង​ស្វាយរៀង​តាម​ច្រករបៀង​សេដ្ឋកិច្ច​ខាងត្បូង​នៃ​មហា​អនុតំបន់​មេគង្គ​។

សេចក្តី​ប្រកាស​ព័ត៌មាន​ដដែល​បញ្ជាក់ថា​ក្នុង​ដំណាក់កាល​ទី​២ ការកែលម្អ​ផ្លូវជាតិ​នឹង​បង្ហាញ​ពី​ការចំណាយ​ប្រកបដោយ​ប្រសិទ្ធភាព និរន្តរភាព និង​បច្ចេកទេស​ជីវសាស្ត្រ​ដែល​មិន​ប៉ះពាល់​ដល់​បរិស្ថាន​រួមទាំង​ការការពារ​ទំនប់ និង​ជម្រាល​។ ការធ្វើឱ្យ​ប្រសើរឡើង​នូវ​ផ្លូវ​ខេត្ត​នឹង​ប្រើ​អង្គ​ធាតុដី​រាវ​ដែល​មិន​ប៉ះពាល់​ដល់​បរិស្ថាន​ដើម្បី​ជួយ​ពង្រីក​ការប្រើប្រាស់​វត្ថុធាតុដើម​ដែលមាន​នៅក្នុង​ស្រុក​។

ប្រភព​ដដែល​បញ្ជាក់ថា​គម្រោង​នេះ​ក៏មាន​គោលបំណង​ជួយ​ក្រសួង​សាធារណការ និង​ដឹកជញ្ជូន​កែលម្អ​ការគ្រប់គ្រង​ផ្លូវថ្នល់ និង​អភិវឌ្ឍ​របៀប​ថែទាំ​ផ្លូវ​ប្រកបដោយ​និរន្តរភាព​ដោយ​ប្រើប្រាស់​កិច្ចសន្យា​ថែទាំ​ផ្លូវថ្នល់​ដែលមាន​ប្រសិទ្ធភាព​។ វា​ក៏​នឹង​បង្កើន​ការយល់ដឹង​អំពី​សុវត្ថិភាព និង​សុខភាព​ផ្លូវថ្នល់​ក្នុង​សហគមន៍​ដែលមាន​ការអនុវត្ត​គម្រោង​នេះ​។

គម្រោង​ផ្លូវ​នេះ​អនុវត្តតាម​យុទ្ធសាស្ត្រ​ភាព​ជា​ដៃគូ​ប្រចាំ​ប្រទេស​របស់ ADB សម្រាប់​ប្រទេស​កម្ពុជា​ ដែល​មាន​គោលបំណង​ជួយ​ប្រទេស​ក្នុង​ការកែលម្អ​ការប្រកួតប្រជែង និង​ធ្វើ​ពិពិធកម្ម​សេដ្ឋកិច្ច​។ គម្រោង​នេះ​ក៏​ជាការ​អនុវត្ត​បន្ត​នៃ​កម្មវិធី​ផ្លូវ និង​ផ្លូវដែក​របស់ ADB នៅក្នុង​ប្រទេស​កម្ពុជា​ផងដែរ​។

បើតាម ADB សេដ្ឋកិច្ចកម្ពុជា​បាន​កើនឡើង ៧,៨ ​ភាគរយ​ក្នុង ១ ​ឆ្នាំ​ជា​មធ្យម​ចាប់ពី​ឆ្នាំ​ ១៩៩៨ ដល់ ២០១៩ ប៉ុន្តែ​បាន​ធ្លាក់ចុះ ៣,១ ​ភាគរយ​នៅ​ឆ្នាំ​ ២០២០ ដោយសារ​ជំងឺ​រាតត្បាត​កូវីដ​ ១៩​។ វិស័យ​ដឹកជញ្ជូន​របស់​ប្រទេស​កម្ពុជា​ប្រឈម​នឹង​បញ្ហា​ដូចជា​ការវិនិយោគ​លើ​ហេដ្ឋារចនាសម្ព័ន្ធ​មិន​គ្រប់គ្រាន់ និង​បញ្ហា​និរន្តរភាព​។ ផ្លូវ​ជនបទ និង​ផ្លូវ​ខេត្ត​ភាគច្រើន​របស់​កម្ពុជា​មិនទាន់​ឈូសឆាយ​ហើយ​សមត្ថភាព​ផ្លូវជាតិ​មានកំណត់​។

លោក ប៉ាល់ ចន្ទតារា រដ្ឋលេខាធិការ និង​ជា​អ្នកនាំពាក្យ​ក្រសួង​សាធារណការ និង​ដឹកជញ្ជូន​មិនអាច​ទាក់ទង​ ដើម្បី​សុំ​អត្ថាធិប្បាយ​បានទេ​កាលពី​ថ្ងៃទី​ ២៩ ខែកញ្ញា​៕

អត្ថបទគួរចាប់អារម្មណ៍