ភ្នំពេញៈ ក្រសួងសុខាភិបាលបានឱ្យដឹងថា យុទ្ធនាការចាក់វ៉ាក់សាំងកូវីដ ១៩ សម្រាប់ក្រុមមនុស្សអាយុចាប់ពី ១៨ ឆ្នាំ ឡើងជិតឈានដល់គោលដៅ ដែលបានកំណត់ចំនួន ១០ លាននាក់ហើយ ខណៈដែលរាជធានី-ខេត្តចំនួន ២០ បានបិទបញ្ចប់យុទ្ធនាការចាក់វ៉ាក់សាំងកូវីដ ១៩ រួចរាល់។
យោងតាមរបាយការណ៍របស់គណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេសនៃក្រសួងសុខាភិបាលបានឱ្យដឹងថា គិតត្រឹមថ្ងៃទី ២៨ ខែកញ្ញា ឆ្នាំនេះមនុស្សអាយុ ១៨ ឆ្នាំឡើងចំនួន ៩ ៨៩៤ ០០៦ នាក់ ស្មើនឹង ៩៨,៩៤ ភាគរយនៃចំនួនគោលដៅ ១០ លាននាក់ បានចាក់វ៉ាក់សាំងកូវីដ ១៩ រួចហើយ។
របាយការណ៍ដដែលបានបន្តថា សម្រាប់លទ្ធផលចាក់វ៉ាក់សាំងកូវីដ ១៩ ធៀបនឹងចំនួនប្រជាពលរដ្ឋសរុបចំនួន ១៦ លាននាក់ កម្ពុជាចាក់បានរហូតដល់ជាង ១៣ លាននាក់ហើយ ឬស្មើនឹង ៨២,៩៦ ភាគរយដែលដំណើរការនៃការចាក់វ៉ាក់សាំងនេះ ត្រូវបានក្រសួងសុខាភិបាលរំពឹងថានឹងអាចឈានទៅដល់ផែនការកំណត់ក្នុងពេលឆាប់ៗខាងមុខនេះ។
លោកស្រី ឱ វណ្ណឌីន អ្នកនាំពាក្យក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេស បានលើកឡើងកាលពីថ្ងៃទី ២៨ ខែកញ្ញាថា វឌ្ឍនភាពនៃការចាក់វ៉ាក់សាំងក្នុងប្រទេសកម្ពុជាកំពុងខិតទៅរកគោលដៅហើយ ជាពិសេសក្រុមអាយុពី ១៨ ឆ្នាំឡើង។
លោកស្រីបានមានប្រសាសន៍ថា៖ «មកដល់ពេលនេះរាជធានីខេត្តចំនួន ២០ បានបិទបញ្ចប់ការចាក់វ៉ាក់សាំង ហើយនៅតែខេត្តចំនួន ៥ ទៀតប៉ុណ្ណោះ គឺខេត្តកំពត កំពង់ស្ពឺ កំពង់ឆ្នាំង បាត់ដំបង និងខេត្តបន្ទាយមានជ័យ។ យើងកំពុងជំរុញឱ្យខេត្តទាំង ៥ នេះធ្វើយ៉ាងណាឱ្យបានសម្រេចតាមគោលដៅកំណត់របស់យើង»។
លោកស្រី ឱ វណ្ណឌីន បានបន្ថែមថា ខេត្តទាំង ៥ នេះអាចនឹងសម្រេចបានគ្រប់គោលដៅ និងបិទបញ្ចប់នៅក្នុងខែតុលាខាងមុខនេះ។
អ្នកនាំពាក្យរូបនេះបានឱ្យដឹងដែរថាប្រជាពលរដ្ឋដែលបានចាក់វ៉ាក់សាំងនេះស្ទើរតែបានគ្រប់គ្នាអស់ហើយគឺនៅតែប្រជាពលរដ្ឋមួយចំនួនដែលនៅឆ្ងាយដាច់ស្រយាល និងមានកត្តាមួយចំនួនផ្សេងទៀត។
លោកស្រីបានបញ្ជាក់ថា៖ «គ្រាន់តែអ្នកដែលក្រុមគ្រូពេទ្យមិនអនុញ្ញាតឱ្យចាក់វ៉ាក់សាំងកូវីដ ១៩ នេះគឺមានជាង ៧ ម៉ឺននាក់ហើយក្នុងចំណោម ១០ លាននាក់ ដែលយើងគ្រោងទុកនេះ ដោយសារមានបញ្ហាសុខភាព និងចំនួនខ្លះបានឆ្លងវីរុសកូវីដ ១៩ ដែលមិនទាន់អាចចាក់បាន ហើយមួយវិញទៀតអ្នកដែលរស់នៅឆ្ងាយដែលពិបាកក្នុងការមកទទួលការចាក់វ៉ាក់សាំង ប៉ុន្តែយើងបានណែនាំទៅដល់គ្រូពេទ្យយើងរួចហើយត្រូវស្ពាយវ៉ាក់សាំងទៅចាក់ជូនគាត់ដល់មូលដ្ឋាន»។
ដោយឡែក ទាក់ទងនឹងការចាក់វ៉ាក់សាំងកូវីដ ១៩ ដូសជំរុញដែលនឹងចាប់ផ្តើមនៅថ្ងៃទី ១១ ខែតុលា លោកស្រី ឱ វណ្ណឌីន បានបញ្ជាក់ផងដែរថា សម្រាប់អ្នកដែលបានចាក់វ៉ាក់សាំងកូវីដ ១៩ ជាមួយនឹងក្រុមពេទ្យកងទ័ពរបស់ក្រសួងការពារជាតិត្រូវចាក់នៅតាមទីតាំងជាមួយនឹងក្រុមពេទ្យកងទ័ពដដែល។
លោកស្រីថា៖ «ក្រុមគ្រូពេទ្យកងទ័ពមានប្រព័ន្ធគ្រប់គ្រង និងមានកាតត្រឹមត្រូវ។ ដូចនេះសូមបងប្អូនដែលបានចាក់វ៉ាក់សាំងជាមួយនឹងក្រុមគ្រូពេទ្យកងទ័ពទៅចាក់ជាមួយនឹងគ្រូពេទ្យកងទ័ព។ យើងនឹងធ្វើការពិភាក្សាគ្នាលម្អិតទៀត (គ.វ.ក-១៩) នៅពេលខាងមុខឆាប់ៗនេះ»៕