បាត់ដំបងៈ ព្រះសង្ឃ តាអាចារ្យ និងដូនជី ជាង ៦០ អង្គ/នាក់ ក្នុងខេត្តបាត់ដំបងត្រូវបានរកឃើញឆ្លងកូវីដ ១៩ នៅតាមវត្តក្នុងក្រុងស្រុកចំនួន ៤ ដែលមានការផ្ទុះនូវវីរុសកូវីដ ១៩ ក្នុងវត្តអារាម។ នេះបើតាម លោក គុណ សម្បត្តិមុន្នីរ័ត្ន ប្រធានមន្ទីរធម្មការ និងសាសនាខេត្តនេះ។
លោកបានប្រាប់ ភ្នំពេញ ប៉ុស្តិ៍ នៅថ្ងៃទី ២៩ ខែកញ្ញាថា មន្ទីរធម្មការ និងសាសនាមិនមានផែនការធ្វើតេស្តព្រះសង្ឃ និងអ្នករស់នៅក្នុងវត្តទូទាំងខេត្តទេ ប៉ុន្តែធ្វើតែលើវត្តពាក់ព័ន្ធ ឬសង្ស័យមានឆ្លងកូវីដប៉ុណ្ណោះ។
លោក គុណ សម្បត្តិមុន្នីរ័ត្ន បញ្ជាក់ថា៖ «មកទល់ពេលនេះ មានព្រះសង្ឃ លោកតាអាចារ្យ និងដូនជីប្រមាណជាង ៦០ អង្គ/នាក់ មានតេស្តវិជ្ជមានកូវីដ ១៩ ដែលភាគច្រើនជាព្រះសង្ឃ»។
សម្រាប់ខេត្តបាត់ដំបង មានវត្តសរុបទាំងអស់ចំនួន ៣៨៥ វត្ត ដែលមានព្រះសង្ឃគង់សរុបចំនួន ៦ ៣៣២ អង្គ។
បើតាមប្រធានមន្ទីររូបនេះ វត្តចំនួន ៣១ ដែលមានព្រះសង្ឃសរុបជាង ១ ៤០០ អង្គ ក្នុងក្រុងបាត់ដំបងត្រូវបានមន្ត្រីសុខាភិបាលធ្វើតេស្តរកមេរោគកូវីដ ១៩ ជាបន្តបន្ទាប់ ដែលមកទល់ពេលនេះមានវត្តចំនួន ៦ ហើយដែលបានយកសំណាកពីព្រះសង្ឃ ដូនជី តាជី និងកូនសិស្សលោក ប៉ុន្តែបានរកឃើញអ្នកវិជ្ជមានតែ ៣ អង្គ/នាក់ប៉ុណ្ណោះ គឺកូននេន យាយជី និងតាអាចារ្យ ក្នុងវត្ត ២ ផ្សេងគ្នា។
លោកបានបន្តថា វត្តមួយចំនួនក៏បានរកឃើញព្រះសង្ឃឆ្លងជំងឺកូវីដ ១៩ ផងដែរ ក្នុងនោះវត្តខ្នាចរមាស ក្នុងស្រុកបវេល មានព្រះសង្ឃ ៥៨ អង្គ មានវិជ្ជមានកូវីដ ១៩។
លោក គុណ សម្បត្តិមុន្នីរ័ត្ន បានប្រាប់ថា៖ «មន្ត្រីនៃមន្ទីរសុខាភិបាលនឹងបន្តចុះយកសំណាកព្រះសង្ឃដែលគង់ក្នុងវត្តក្នុងក្រុងបាត់ដំបង និងតាមស្រុកផ្សេងៗក្នុងករណីដែលវត្តណាមួយនោះត្រូវបានរកឃើញថាមានព្រះសង្ឃ ឬអ្នកស្នាក់នៅក្នុងវត្តមានការពាក់ព័ន្ធ ឬសង្ស័យថាមានឆ្លងជំងឺកូវីដ ១៩ លើព្រះសង្ឃតែប៉ុណ្ណោះ»។
លោកបានបញ្ជាក់ថា មន្ទីរធម្មការ និងសាសនាមិនមានវិធានការអ្វីផ្សេងក្រៅពីវិធានការរបស់សុខាភិបាលទេ ។
លោកថា៖ «យើងគ្រាន់តែផ្សព្វផ្សាយ និងត្រួតពិនិត្យលើពិធីកាន់បិណ្ឌ ភ្ជុំបិណ្ឌប៉ុណ្ណោះហើយប្រសិនបើមានការឆ្លងវីរុសកូវីដ ១៩ ឬមានការសង្ស័យគឺសុំគោលការណ៍ ដើម្បីចុះយកសំណាក»។
ប្រធានមន្ទីររូបនេះថា មន្ទីរមិនមានការបិទខ្ទប់វត្តអារាមទាំងអស់ទេ គឺបិទតែវត្តណាដែលមានការឆ្លងប៉ុណ្ណោះ។
ចំណែកលោក លីវ សុខុម អ្នកនាំពាក្យ និងជាប្រធានមន្ទីរព័ត៌មានខេត្តសៀមរាបបានឱ្យដឹងដែរថា ខេត្តនេះមិនមានការធ្វើតេស្តតាមវត្តទេ ខណៈមិនបានអនុញ្ញាតឱ្យមានការប្រារព្ធពិធីកាន់បិណ្ឌ និងភ្ជុំបិណ្ឌ។
លោកបានប្រាប់ថា៖ «យើងអនុវត្តតាមវិធានការរបស់ក្រសួងធម្មការដោយគ្រាន់តែយកចង្ហាន់ប្រគេនព្រះសង្ឃតែមួយភ្លែតៗប៉ុណ្ណោះ ប៉ុន្តែដូចជា មិនសូវមានមនុស្សទៅវត្តច្រើនទេ ហើយក្នុងពេលនេះដែរ មានភូមិជាច្រើនត្រូវបានដាក់ជាតំបន់ក្រហម ដែលមិនតម្រូវឱ្យមានការចេញពីលំនៅឋានដោយគ្មានការអនុញ្ញាតនោះទេ»។
សម្រាប់នៅខេត្តបន្ទាយមានជ័យវិញតាមរបាយការណ៍របស់មន្ទីរធម្មការ និងសាសនាខេត្តបានឱ្យដឹងថា ព្រះសង្ឃជាង ៥០ អង្គ ត្រូវបានរកឃើញមានវិជ្ជមានវីរុសកូវីដ ១៩ ហើយវត្តអារាមជាច្រើនត្រូវបានបិទខ្ទប់ផងដែរ។
លោក សេង សុមុនី អ្នកនាំពាក្យក្រសួងធម្មការ និងសាសនាមិនអាចទាក់ទងបានទេកាលពីថ្ងៃទី ២៩ ខែកញ្ញា។
គួរបញ្ជាក់ដែរថា លោកនាយករដ្ឋមន្ត្រី ហ៊ុន សែន បានសម្រេចផ្អាកពិធីកាន់បិណ្ឌ និងភ្ជុំបិណ្ឌចាប់ពីបិណ្ឌទី៤ រហូតដល់ថ្ងៃភ្ជុំបិណ្ឌ បន្ទាប់ពីមានការឆ្លងកូវីដ ១៩ នេះដល់ព្រះសង្ឃ តាជី ដូនជី និងកូនសេកលោកក្នុងពិធីបុណ្យកាន់បិណ្ឌក្នុងថ្ងៃទី១ និងទី២ នៅតាមបណ្តាវត្តអារាមក្នុងរាជធានីភ្នំពេញ។
មន្ត្រីសុខាភិបាលបានយកសំណាកព្រះសង្ឃ តាជី យាយជី និងអ្នកស្នាក់នៅក្នុងវត្តជាង ១៥០ វត្តនៅភ្នំពេញពីថ្ងៃទី ២៥ និង ២៦ កញ្ញា ហើយបានរកឃើញ ១៤១ អង្គ/នាក់ មានវិជ្ជមានវីរុសកូវីដ ១៩ ក្នុងនោះមានព្រះសង្ឃ ៩៧ អង្គ៕