.jpg)
ក្រុមគ្រូពេទ្យរៀបចំបញ្ជូនសពអ្នកជំងឺស្លាប់ដោយសារជំងឺកូវីដ ១៩ ទៅបូជានាពេលកន្លងមក។ រូបថត រដ្ឋបាលខេត្តព្រះវិហារ
ភ្នំពេញៈ មនុស្សជិត ១ ០០០ នាក់ ត្រូវបានរកឃើញមានវិជ្ជមានកូវីដ ១៩ និងមានអ្នកជាសះស្បើយជាង ៦០០ នាក់ ខណៈមានអ្នកស្លាប់ថ្មីដោយសារវីរុសកូវីដ ១៩ ចំនួន ១៧នាក់បន្ថែមទៀត។ នេះបើយោងតាមសេចក្តីប្រកាសរបស់ក្រសួងសុខាភិបាលនៅថ្ងៃទី ៣០ ខែ កញ្ញា ឆ្នាំ ២០២១ នេះ។
ក្រសួងបានឱ្យដឹងថា មនុស្សចំនួន ៩៧៨ នាក់ទៀត ត្រូវបានរកឃើញអ្នកឆ្លងវីរុសកូវីដ ១៩ នេះ និងមានអ្នកជាសះស្បើយចំនួន ៦០៥ នាក់។ ការរកឃើញឆ្លងថ្មីនេះ មានករណីឆ្លងសហគមន៍រហូតដល់ ៨៩៧ នាក់ និងមានអ្នកដំណើរពីបរទេសចំនួន ៨១ នាក់។
គិតត្រឹមព្រឹកថ្ងៃទី ៣០ ខែ កញ្ញា ឆ្នាំ ២០២១ កម្ពុជាមានអ្នកឆ្លងវីរុសកូវីដ ១៩ សរុបរហូតដល់ ១១២ ៦៥១ នាក់ អ្នកជាសះស្បើយសរុបចំនួន ១០២ ៨២៧ នាក់ និងអ្នកស្លាប់បានកើនឡើងដល់ ២ ៣១៩ នាក់៕
