កណ្តាលៈ បុរសម្នាក់ត្រូវបានតុលាការបង្គាប់ឱ្យឃុំខ្លួនក្នុងពន្ធនាគារខេត្តកណ្តាល ករណីវាយម្តាយបង្កើតស្លាប់ កាលពីថ្ងៃទី ២៥ កញ្ញា នៅភូមិព្រែកតាតែន ឃុំព្រះប្រសប់ ស្រុកខ្សាច់កណ្តាល។
លោក សូ សារិន អ្នកនាំពាក្យផ្នែកចៅក្រមនៃតុលាការខេត្តកណ្តាលប្រាប់ នៅថ្ងៃទី ២៨ កញ្ញា ថា ជនត្រូវចោទឈ្មោះ ស្រេង លាងហ៊ី ភេទប្រុស អាយុ ៣០ ឆ្នាំត្រូវបានចៅក្រមស៊ើបសួរសម្រេចចេញដីកាឃុំនៅពន្ធនាគារខេត្តកណ្តាលនៅថ្ងៃទី ២៧ កញ្ញា។
លោកថា៖ «ជនម្នាក់នេះត្រូវបានតំណាងអយ្យការចោទបទហិង្សាដោយចេតនាបណ្តាលឱ្យជនរងគ្រោះស្លាប់។ បទចោទនេះតាមមាត្រា ២២៤ នៃក្រមព្រហ្មទណ្ឌ»។ ពាក់ព័ន្ធបទចោទតាមមាត្រា ២២៤ នេះកម្រិតផ្តន្ទាទោសពី ៧ ឆ្នាំទៅ ១៥ ឆ្នាំ។
លោក អ៊ុន យ៉ុង អធិការរងនគរបាលទទួលផែនព្រហ្មទណ្ឌនៃអធិការដ្ឋាននគរបាលស្រុកខ្សាច់កណ្តាល ឱ្យដឹងនៅថ្ងៃទី ២៨ កញ្ញាថា ស្ត្រីរងគ្រោះឈ្មោះ ងួន សុខគី ជាម្តាយបង្កើតរបស់ជនត្រូវចោទឈ្មោះ ស្រេង លាងហ៊ី។
លោកថ្លែងថា៖ «ជនម្នាក់នេះគាត់ឆ្លើយថា គាត់ប្រើប្រាស់គ្រឿងញៀនប៉ុន្មានខែមុនបង្កហេតុ។ យើងពិនិត្យទឹកនោម អត់ឃើញសារធាតុញៀនទេ។ តែមនុស្សនេះទំនងបែកថ្នាំ ដោយសារគ្មានលុយ ទិញ អ៊ីចឹងគាត់បាត់បង់ស្មារតី»។
លោកប្រាប់តាមសម្តីជនបង្កថា មួយរយៈមុនបង្កហេតុ ឈ្មោះ ស្រេង លាងហ៊ី ធ្លាប់ប្រើថ្នាំញៀនប្រភេទម៉ាទឹកកករហូតញៀនខ្លាំង មិនតែប៉ុណ្ណោះគាត់ញៀនស្រាទៀតផង។ លុះនៅថ្ងៃទី ២៥ កញ្ញា នៅម៉ោងជាង ១១ ថ្ងៃត្រង់ ឈ្មោះ ស្រេង លាងហ៊ី បានផឹកស្រាស្រវឹងស្រែកជេរស្ត្រីរងគ្រោះជាម្តាយ និងផ្ទះក្បែរខាង។
លោកបន្តថា ពេលនោះស្ត្រីរងគ្រោះបានប្រាប់កុំមាត់ឡូឡាជេរគេ ព្រោះខ្លួនស្រវឹងស្រាខ្លាំងហើយ។ តែជនសង្ស័យខឹងប្រើកណ្តាប់ដៃវាយម្តាយរបស់ខ្លួនត្រូវចំមុខ និងទ្រូងដួលលើដី ហើយងើបដើរទៅសម្រាន្ត តែក្រោយមកស្ត្រីរងគ្រោះមានអាការចុកទ្រូងបែកញើសស្អិតខ្លួន ហើយប្តីរបស់គាត់បានធ្វើចលនាសរសៃឱ្យ។
លោក អ៊ុន យ៉ុង បន្ថែមថា លុះព្រឹកឡើងថ្ងៃទី ២៦ កញ្ញា ប្តីរបស់ស្ត្រីរងគ្រោះទៅដាស់ ទើបដឹងថា ស្លាប់។ បន្ទាប់មកបានរាយការណ៍ទៅនគរបាលប៉ុស្តិ៍ឃុំព្រះប្រសប់ ហើយសមត្ថកិច្ចចុះដល់ផ្ទះកើតហេតុ។ ក្រោយសមត្ថកិច្ចជំនាញនិងគ្រូពេទ្យធ្វើកោសល្យវិច័យមកសន្ឋិដ្ឋានថា ស្ត្រីរងគ្រោះស្លាប់ដោយសាររងរបួសខ្លាំងលើផ្ទៃមុខ បណ្តាលឱ្យរឹងថ្គាមហូបអាហារមិនបាន និងចុះខ្សោយកម្លាំង ទើបបណ្តាលឱ្យគាំងបេះដូងស្លាប់៕