.jpg)
គំរូប្លង់សម្រាប់សង់អគាររូបរាងជាគ្រាប់មីននៅខេត្តសៀមរាប ។ រូបថត Heng Ratana page
ភ្នំពេញៈ មជ្ឈមណ្ឌលសកម្មភាពកំចាត់មីនកម្ពុជា (CMAC) កំពុងផ្គួចផ្ដើមរៀបចំកសាងសារមន្ទីរសកម្មភាពកំចាត់មីន ដែលមានអគាររូបរាងជាគ្រាប់មីនធំជាងគេបំផុតមួយនៅលើពិភពលោកក្នុងពេលឆាប់ៗខាងមុខនេះ ដើម្បីរក្សានូវឯកសារ និងភ័ស្ដុតាង ប្រវត្ដិសាស្ដ្រ អំពីសោកនាដកម្មនៃសង្គ្រាមនៅកម្ពុជានៅក្នុងសម័យទំនើបចុងក្រោយនេះ។ នេះបើតាមលោក ហេង រតនា អគ្គនាយកស៊ីម៉ាក់។
លោក ហេង រតនា បានប្រាប់ ភ្នំពេញ ប៉ុស្ដិ៍ នៅថ្ងៃទី ៣០ កញ្ញា ឆ្នាំនេះថា ស៊ីម៉ាក់ បានគិតគូរៀបចំការកសាងសារមន្ទីរសកម្មភាពកំចាត់មីននេះ តាំងពីអំឡុងឆ្នាំ ២០០៤-២០០៥ ដែលបានរៀបចំទីតាំងនៅ ឃុំត្រពាំងធំ ស្រុកសាទ បាគង ខេត្ដសៀមរាប លើផ្ទៃដីដែលបានត្រៀមទុកមានទំហំ ១២ ហិកតា។
លោកបានថ្លែងថា៖ «យើងបានសន្សំនូវសម្ភារ ដែលជាគ្រាប់មីន គ្រាប់យុទ្ធភណ្ឌមិនទាន់ផ្ទុះជាហូរហែហើយយើងក៏បានដាក់ឱ្យដំណើការនៅឆ្នាំ ២០១៧ ជាជំហានទី១ របស់យើង។ យើងមានទាំងអស់៣ជំហាន យើងធ្វើជំហានទី១ ជាជំហានបណ្ដោះអាសន្ន ដែលយើងមិនទាន់មានថវិកា ក្នុងការកសាងអគារដែលជាមហិច្ឆតារបស់យើងគឺចង់ធ្វើអគារដែលមានរូបរាងជាគ្រាប់មីន ធំជាងគេបំផុតមួយនៅលើពិភពលោក»។
លោកបញ្ជាក់ថា៖ «អគារដែលមានរូបរាងជាគ្រាប់មីនធំជាងគេបំផុតមួយនៅលើពិភពលោកគឺចង់និយាយថាបើនិយាយពីគ្រាប់មីនធំជាងគេ គឺមកកម្ពុជាមកឃើញហើយ។ ប៉ុន្ដែវាជាអគារទេ មិនមែនជាគ្រាប់មីនទេ។ យើងមានមុខសញ្ញាផ្ដល់ជំនួយក្នុងការសាងសង់អគារនេះរួចហើយៗ យើងសង្ឃឹមថានឹងចេញរូបរាងក្នុងពេលឆាប់ៗខាងមុខ»។
លោក ហេង រតនា បានឱ្យដឹងថា ស៊ីម៉ាក់ បានរៀបចំសារមន្ទីរនេះ និងដាក់ឱ្យប្រើប្រាស់តាំងពីឆ្នាំ ២០១៧ មក។ ដូច្នេះ ៤ ឆ្នាំមក បានទទួលបទពិសោធជាច្រើនននៃការវាយតម្លៃចំណង់ចំណូលចិត្ដរបស់អ្នកដែលចូលមកទស្សនា និងការចាប់អារម្មណ៍របស់សិស្សានុសិស្ស និងយុវជនយុវជនកម្ពុជានៃសារមន្ទីរមីននេះ។
លោកបញ្ជាក់ថា៖ «អីចឹងហើយ បានជាយើងមានគោលដៅពង្រីកសំណង់មួយ ដែលគោលដៅរបស់យើង គឺធ្វើសំណង់នេះ តែកន្លងមកយើងអត់មានលទ្ធភាពក្នុងការធ្វើសំណង់អគារនេះ។ ឥឡូវនេះយើងសង្ឃឹមថាគេនឹងជួយយើង ក្នុងការសម្រេចគោលដៅនេះ។ យើងមិនចាំរហូតដល់ការបោសសម្អាតមីនអស់ទើបធ្វើសំណង់អគារនេះទេ»។
បើតាមលោក ហេង រតនា ជាទស្សនវិស័យរបស់ ស៊ីម៉ាក់ គឺកសាងសារមន្ទីរមីនជា «សារមន្ទីរសន្តិភាពសកម្មភាពមីន»។ លោកថា ស៊ីម៉ាក់ចង់ធ្វើយ៉ាងម៉េចឱ្យសារមន្ទីរនេះក្លាយទៅជាទីតាំងរក្សានូវឯកសារ ភ័ស្ថុតាង ប្រវត្ដិសាស្ដ្រ មួយចំនួនដែលបង្ហាញអំពីសោកនាដកម្មនៃសង្គ្រាមនៅកម្ពុជានៅក្នុងសម័យទំនើបចុងក្រោយនេះ ហើយយុវជនជំនាន់ក្រោយៗ អាចសិក្សាស្វែងយល់ អំពីវិបត្ដិនៃសង្គ្រាមនៅកម្ពុជា ដែលនេះគឺជាគោលដៅរបស់ ស៊ីម៉ាក់។
លោកបញ្ជាក់ចំណុចសំខាន់មួយទៀតថា សារមន្ទីរនេះ ក៏កសាងជាកន្លែងសម្រាប់អ្នកជំនាញផ្សេងៗនៅក្នុងសកលលោក ឱ្យមកសិក្សាស្រាវជ្រាវលើវិស័យមីន ការបោសសម្អាតមីន សម្អាតយុទ្ធភណ្ឌមិនទាន់ផ្ទុះ ក្រោយសង្គ្រាម ហើយសារមន្ទីរមីនេះ ជាកន្លែងមួយដែលគេអាចធ្វើការសិក្សារៀនសូត្របាន។
លោក រតនា បញ្ជាក់ថា៖«និយាយរួមទៅសារមន្ទីរដែលយើងគិតគូនេះ នឹងផ្ដល់ផលប្រយោជន៍ក្នុងកិច្ចសហប្រតិបត្ដិការ អន្តរជាតិជាមួយនឹងបណ្ដាប្រទេសមួយចំនួន។ដូចជានៅបណ្ដាប្រទេសដែលបានបញ្ចប់សង្គ្រាមហើយនៅតំបន់អាហ្វ្រិក តំបន់អាមេរិកឡាទិន និងនៅមជ្ឈិមបូព៌ាជាដើមគឺគេត្រូវការកន្លែងអាចសិក្សារៀនសូត្រពីជំនាញវិជ្ជាជីវៈលើវិស័យមីននេះផងដែរ»។
លោកបានឱ្យដឹងថា ផ្ទៃដីនៃការសាងសាង់អគារសារមន្ទីរមីនេះ គឺមានត្រៀមទុករួចអស់ហើយ។ កន្លងមកការសាងសង់ហេដ្ឋារចនាសម្ព័ន្ធនានាសម្រចបានប្រហែលជា ១ ភាគ ៤ នៃផ្ទៃដី ១២ ហិកតា នៃសារមន្ទីរនេះហើយ។នៅពេលការសាងសង់ដល់ដំណាក់កាលទី៣គឺប្រើទាំងអស់នៃផ្ទៃដីដែលបានត្រៀមទុកនេះទៅតាមប្លង់ គំរូ និងគំនិតដែលបានត្រៀមទុក៕
