.jpg)
គ្រឿងញៀនចំនួន ១១៥ គ្រាប់ ដែលសមត្ថកិច្ចចាប់បាននៅខណ្ឌឫស្សីកែវ កាលពីថ្ងៃទី ២៩ កញ្ញា។ រូបថត ប៉ូលិស
ភ្នំពេញៈ នគរបាលខណ្ឌឫស្សីកែវ កំពុងស៊ើបរកជនសង្ស័យករណីជួញដូរគ្រឿងញៀនទម្ងន់ ៥៣២ ក្រាម ដែលសមត្ថកិច្ចរឹបអូសបានក្នុងបន្ទប់១កាលពីថ្ងៃទី ២៩ កញ្ញា នៅភូមិក្រោលគោ សង្កាត់គីឡូមែត្រលេខ ៦ ខណ្ឌឫស្សីកែវ រាជធានីភ្នំពេញ។
លោក ហ៊ាង ថារ៉េត អធិការនគរបាលខណ្ឌឫស្សីកែវ ឱ្យដឹងនៅថ្ងៃទី ៣០ កញ្ញាថា កម្លាំងនគរបាលខណ្ឌឫស្សីកែវ កំពុងស្រាវជ្រាវ ដើម្បីកំណត់អត្តសញ្ញាណជនសង្ស័យ។ លោកប្រាប់ថា៖ «ករណីនេះយើងឆែកបានតែគ្រឿងញៀនទេ ឯមនុស្សគេចខ្លួន។ យើងកំពុងធ្វើការងារនេះហើយ»។
ទោះយ៉ាងណាលោក ថារ៉េត មិនបានអធិប្បាយលម្អិតជុំវិញការបង្ក្រាបបទល្មើសនេះទេ ដោយលោកបញ្ជាក់ថា ជាប់ប្រជុំ។
មន្រ្តីនគរបាលខណ្ឌឫស្សីកែវ ១ រូប សុំមិនឱ្យបញ្ចេញឈ្មោះបានប្រាប់នៅរសៀលថ្ងៃទី ៣០ កញ្ញាថា ជនសង្ស័យបានគេចខ្លួនមុនពេលសមត្ថកិច្ចទៅដល់។ ទោះយ៉ាងណាសមត្ថកិច្ចក៏នៅតែតាមស្រាវជ្រាវរកជនសង្ស័យដែរ។ ប៉ុន្តែបើតាមការចុះផ្សាយរបស់គេហទំព័រអគ្គស្នងការដ្ឋាននគរបាលជាតិ កាលពីថ្ងៃទី ២៩ កញ្ញា បានសរសេរថា កាលពីថ្ងៃទី ២៩ កញ្ញា នគរបាលប៉ុស្តិ៍រដ្ឋបាល សង្កាត់គីឡូម៉ែត្រលេខ ៦ ខណ្ឌឫស្សីកែវត្រូវបានប្រជាពលរដ្ឋរាយការណ៍ថា ឃើញកញ្ចប់គ្រឿងញៀនត្រូវបានជនសង្ស័យផ្លុងចោល នៅចំណុចដីឡូត៍ ១ កន្លែងក្នុងក្រុមទី១៣ ភូមិ ក្រោលគោ សង្កាត់គីឡូម៉ែត្រ លេខ ៦ ខណ្ឌឫស្សីកែវ។
គេហទំព័រសរសេរបន្តថាក្រោយ ទទួលបានសេចក្តីរាយការណ៍ភ្លាម កម្លាំងជំនាញខណ្ឌ សហការជាមួយកម្លាំងនគរបាលប៉ុស្តិ៍សង្កាត់គីឡូម៉ែត្រលេខ ៦ ចុះដល់ទីតាំងតាមការរាយការណ៍របស់ប្រជាពលរដ្ឋ។ ចំពោះវត្ថុតាងមានថ្នាំគ្រាប់ប្រភេទផ្កាឈូក (MDMA) ចំនួន ៧២ ក្រាម ថ្នាំគ្រាប់ពណ៌ប្រផេះប្រភេទ (MDMA) ទម្ងន់ ៣០០ ក្រាម។ ថ្នាំញៀនពណ៌សប្រភេទកេតាមីនទម្ងន់ ១៦០ ក្រាម។ សរុបថ្នាំញៀនទាំង ៣ ប្រភេទ មានទម្ងន់ ៥៣២ ក្រាម។ ដោយឡែកថ្នាំញៀន ១ ប្រភេទទៀតឈ្មោះយ៉ាសាប៉ាមចំនួន ១១៥ គ្រាប់៕
