.jpg)
ដំំណើរការចាក់វ៉ាក់សាំងដល់ពលរដ្ឋកាលពីខែសីហា ឆ្នាំនេះ ។ ហុង មិនា
ភ្នំពេញៈ យោងតាមផែនការសកម្មភាពសម្រាប់អនុវត្តគោលនយោបាយចាក់វ៉ាក់សាំងកូវីដ ១៩ ដូសជំរុញ ដើម្បីបង្កើនភាពសុំាប្រឆាំងនឹងមេរោគកូវីដ ១៩ បានឱ្យដឹងថា រាជរដ្ឋាភិបាលកម្ពុជាបានត្រៀមបម្រុងរួចជាស្រេចនូវបរិមាណវ៉ាក់សាំងសម្រាប់ដល់ក្រុមពលរដ្ឋជាគោលដៅអាទិភាពដែលបានកំណត់សរុបប្រមាណជិត ១៣ លាននាក់ ដែលមានអាយុពី ១២ ឆ្នាំឡើង និងត្រូវចាក់ឱ្យបានយ៉ាងតិច ៩០ ភាគរយនៅដំណាច់ខែមិថុនា ឆ្នាំ ២០២២។
ជាមួយគ្នានេះដែររដ្ឋាភិបាលក៏៏អនុញ្ញាតឱ្យវិស័យឯកជននាំចូលនិងចែកចាយវ៉ាក់សាំងកូវីដ ១៩ និងផ្តល់សេវាចាក់វ៉ាក់សាំងអាចជួយពន្លឿនការគ្របដណ្តប់នៃការចាក់វ៉ាក់សាំងដូសជំរុញបានលឿន និងជួយកាត់បន្ថយបន្ទុកការងារចាក់វ៉ាក់សាំងមួយផ្នែកនៃប្រព័ន្ធសុខាភិបាល។
គោលបំណងនិងគោលដៅនៃការចាក់វ៉ាក់សាំងកូវីដ ១៩ ដូសជំរុញនេះ គឺដើម្បីការពារអាយុជីវិតពលរដ្ឋកម្ពុជា ការពារប្រព័ន្ធសុខាភិបាលនិងកាត់បន្ថយផលប៉ះពាល់សង្គម-សេដ្ឋកិច្ចដែលបណ្តាលមកពីជំងឺកូវីដ ១៩។ កាត់បន្ថយការឆ្លងភាពធ្ងន់ធ្ងរនៃជំងឺអ្នកជំងឺសម្រាកពេទ្យនិងស្លាប់ដែលបណ្តាលមកពីជំងឺកូវីដ ១៩ និងទប់ទល់នឹងការគំរាមកំហែងនៃមេរោគបំប្លែងខ្លួនប្រភេទថ្មីៗទៀត។
ផែនការសកម្មភាពនេះបានបញ្ជាក់ថា«ក្រុង-ស្រុក-ខណ្ឌ ដែលត្រូវបានវាយតម្លៃថាមានហានិភ័យខ្ពស់នៃការចម្លងជំងឺកូវីដ ១៩ និងបានរកឃើញមេរោគបំប្លែងខ្លួនប្រភេទដែលតា ត្រូវបានផ្តល់អាទិភាពខ្ពស់សម្រាប់ការចាក់ដូសជំរុញលើពលរដ្ឋគោលដៅឱ្យបានឆាប់បំផុតតាមដែលអាចធ្វើទៅបាន ដើម្បីឆ្លើយតបនឹងស្ថានភាពចំពោះមុខនៃការឆ្លងជំងឺកូវីដ ១៩ ផង និងទប់ទល់នឹងមេរោគបំប្លែងខ្លួនប្រភេទថ្មីនេះផង»។
ផែនការដដែលនេះបានលើកឡើងទៀតថា ការចាក់វ៉ាក់សាំងដូសជំរុញ ដល់ក្រុមកុមារ-យុវវ័យអាយុពី ១២ ឆ្នាំ ដល់ក្រោម ១៨ ឆ្នាំ ដែលបានចាក់វ៉ាក់សាំងដូសទី២ រួចរាល់នៅដំណាច់ខែសីហា ឆ្នាំ ២០២១ អាចចាប់ផ្តើមចាក់ វ៉ាក់សាំងដូសជំរុញបាននៅក្នុងខែកុម្ភៈ ឆ្នាំ ២០២២ និងខែបន្តបន្ទាប់នៅក្រោមលក្ខខណ្ឌនៃគម្លាតពេលវេលា៦ ខែ រវាងការចាក់ដូសទី២ រួចនិងការចាក់ដូសជំរុញ។
គួរបញ្ជាក់ផងដែរថា កាលពីខែសីហាកន្លងមកនេះ នៅក្នុងជំហានទី១ ការចាក់វ៉ាក់សាំងដូសជំរុញ បានចាប់ផ្តើមលើក្រុមពលរដ្ឋគោលដៅជាអាទិភាពដែលបានចាក់វ៉ាក់សាំងដូសទី២ ប្រភេទ Sinopharm និង Sinovac រួចរាល់ចាប់ពី ៤ ខែឡើង ក្នុងខេត្ត៧ នៅជាប់ព្រំដែនភាគខាងលិចប្រទេស។ ខេត្តទាំងនោះមាន ខេត្តបន្ទាយមានជ័យ បាត់ដំបង ប៉ៃលិន ពោធិ៍សាត់ កោះកុង ឧត្តរមានជ័យ និងខេត្តព្រះវិហារ។ បន្ទាប់មកបន្តលើក្រុមគោលដៅជាអាទិភាព នៅក្នុងរាជធានីខេត្ត ទាំងអស់ទូទាំងប្រទេស ។
សម្រាប់ជំហានទី២ ចាប់ផ្តើមពីខែកញ្ញា ឆ្នាំ២០២១ដល់ខែមិថុនា ឆ្នាំ២០២២ ដោយអនុវត្តតាមអភិក្រម «ផ្ការីក» ដោយចាប់ផ្តើមចេញពីរាជធានីភ្នំពេញ ខេត្តកណ្តាល ព្រះសីហនុ និងខេត្តកោះកុង និងតាមក្រុង-ស្រុក-ខណ្ឌនៃខេត្តផ្សេងៗទៀតជាបន្តបន្ទាប់។
ផែនការសកម្មភាពនៃការចាក់វ៉ាក់សាំងដូសជំរុញនេះបានបញ្ជាក់ថា៖ «វ៉ាក់សាំងដែលត្រូវការសម្រាប់ដូសជំរុញមានចំនួន ១២ ៧៦៣ ៣៨១ ដូស ពោលគឺស្មើនឹងចំនួនប្រជាពលរដ្ឋគោលដៅអាយុពី ១២ ឆ្នាំឡើង ហើយចំនួនវ៉ាក់សាំងដែលត្រូវការនេះទៀតសោតក៏អាស្រ័យជាចម្បងចំនួនជាក់ស្តែងនៃប្រជាពលរដ្ឋគោលដៅ ដែលបានចាក់វ៉ាក់សាំងពេញ លេញតាមរបបចាក់វ៉ាក់សាំងមូលដ្ឋាន ដែលបានកំណត់»។
ប្រទេសកម្ពុជាប្រើប្រាស់ភាគច្រើនលើសលប់នូវប្រភេទវ៉ាក់សាំងស៊ីណូហ្វាម (Sinopharm) និងស៊ីណូវ៉ាក់ (Sinovac) ជា វ៉ាក់សាំងមូលដ្ឋាន ហើយវ៉ាក់សាំងប្រភេទនេះក៏មានប្រសិទ្ធភាពសម្រាប់ជាដូសជំរុញដែរ។
លោកស្រី ឱ វណ្ណឌីន អ្នកនាំពាក្យក្រសួងសុខាភិបាលនិងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេសបានលើកឡើងឱ្យដឹងផងដែរថាក្នុងការប្រយុទ្ធនឹងជំងឺកូវីដ ១៩ រាជរដ្ឋាភិបាលកម្ពុជា បានដាក់ចេញនូវយុទ្ធសាស្ត្រឆ្លើយតបបន្ទាន់ជាបន្តបន្ទាប់ ដើម្បីការពារអាយុជីវិតពលរដ្ឋកម្ពុជា ការពារប្រព័ន្ធសុខាភិបាលនិងកាត់បន្ថយផលប៉ះពាល់លើជីវភាពរស់នៅប្រចាំថ្ងៃរបស់ប្រជាពលរដ្ឋនិងលើ សកម្មភាពសង្គម-សេដ្ឋកិច្ច។
លោកស្រីថា៖ «ក្នុងនោះយុទ្ធសាស្ត្រចាក់វ៉ាក់សាំងបង្ការជំងឺកូវីដ ១៩ ត្រូវបានរាជរដ្ឋាភិបាលចាត់ទុកថាជាយុទ្ធសាស្ត្រគន្លឹះមួយក្នុងការបង្ការ កាត់បន្ថយនិងទប់ស្កាត់ការរាតត្បាតនៃជំងឺកូវីដ ១៩ ដើម្បីបង្កើតឱ្យបាននូវភាពស៊ាំក្នុងសហគមន៍សំដៅឈានឆ្ពោះទៅបើកដំណើរការពេញលេញឡើងវិញលើគ្រប់វិស័យនិងការរស់នៅតាមគន្លងប្រក្រតីភាពថ្មី»។
លោកស្រី ឱ វណ្ណឌីន បានបន្ថែមថា អ្នកវិទ្យាសាស្ត្រជាច្រើនបានស្រាវជ្រាវនិងបានបង្ហាញទឡ្ហីករណ៍បែបវិទ្យាសាស្ត្រអំពីប្រសិទ្ធភាពនៃវ៉ាក់សាំងបង្ការជំងឺកូវីដ១៩ ដូសជំរុញ ដែលបង្កើនភាពឆ្លើយតបនៃអង្គបដិបក្ខក្នុងខ្លួនឱ្យកាន់តែប្រសើរឡើងថែមទៀត ដើម្បីប្រឆាំងនឹងមេរោគកូវីដ ១៩ បំប្លែងខ្លួនប្រភេទថ្មីៗ ជាពិសេសមេរោគកូវីដ ១៩ បំប្លែងខ្លួនប្រភេទដែលតា ហើយប្រទេសមួយចំនួនក៏បានដាក់ចេញនូវយុទ្ធនាការចាក់វ៉ាក់សាំងដូសជំរុញនេះផងដែរ៕
