.jpg)
ជនសង្ស័យរឿងបង្ករបួសស្នាម។ រូបថត សហការី
ក្រចេះៈ តុលាការខេត្តក្រចេះបានកោះហៅម្ចាស់ចម្ការស្វាយចន្ទីម្នាក់ឱ្យចូលខ្លួនកាលពីថ្ងៃទី ២៩ កញ្ញា ពាក់ព័ន្ធបណ្តឹងបង្ករបួសស្នាមលើបុរសម្នាក់ដែលម្ចាស់ចម្ការអះអាងថា ជាចោរចូលលួចគ្រាប់ស្វាយចន្ទីក្នុងចម្ការរបស់គាត់។
លោក សែត សុះពុស្តាន ជាជនជាតិខ្មែរអ៊ិស្លាមរស់នៅភូមិ-ឃុំក្រញូងសែនជ័យ ស្រុកស្នូលខេត្តក្រចេះបានប្រាប់នៅថ្ងៃទី ៣០ កញ្ញាថា តុលាការខេត្តក្រចេះបានកោះហៅគាត់ឱ្យចូលខ្លួនដើម្បីឱ្យផ្តិតមេដៃលើពាក្យបណ្តឹងរបស់គាត់ដែលប្តឹងតបទៅឈ្មោះ សុខ ទិត្យ វិញដោយគាត់អះអាងថាជាចោរពាក់ព័ន្ធការលួចគ្រាប់ស្វាយចន្ទីរបស់គាត់។
លោកសុះពុស្តារៀបរាប់ពីដំណើររឿងថា នៅអំឡុងខែមេសា ឆ្នាំ ២០២១ គាត់ និងបុរសអ្នកចម្ការម្នាក់ទៀតបានទៅមើលថែចម្ការស្វាយចន្ទី ពេលទៅដល់គាត់បានឃើញមនុស្សប្រុសស្រី ២ នាក់កំពុងប្រលេះគ្រាប់ស្វាយចន្ទី ពេលនោះគាត់បានថតសកម្មភាពពួកគេប្រលេះស្វាយចន្ទីតែត្រូវបុរសឈ្មោះសុខ ទិត្យយកកាំភ្លើងកែច្នៃភ្ជង់ក្បាលគាត់។
លោកបន្តថា ពេលនោះគាត់បានប្រតាយប្រតប់ជាមួយចោរ ខណៈដៃគាត់មានកាន់កាំបិតផងហើយបានដួលលើដីទាំង ២ នាក់ គ្រាកំពុងប្រតាយប្រតប់គ្នានោះមានអ្នកចម្ការម្នាក់ទៀតបានយកទូរស័ព្ទថតវីដេអូជាភ័ស្តុតាង។ បន្ទាប់មកត្រូវបានលោក កែវ វ៉ាត នាយនគរបាលប៉ុស្តិ៍ឃុំក្រញូងសែនជ័យហៅទៅប៉ុស្តិ៍នគរបាលទាំង ២ នាក់។
លោកបញ្ជាក់ថា ពេលនោះលោកនាយនគរបាលប៉ុស្តិ៍បានឱ្យគាត់បង់លុយឱ្យឈ្មោះ សុខ ទិត្យ ចំនួន ៦០ ម៉ឺនរៀល ព្រោះថា គាត់បង្ករបួសស្នាមលើឈ្មោះ សុខ ទិត្យ ដែលជាចោរលួចគ្រាប់ស្វាយចន្ទីរបស់គាត់ទៅវិញ។ ប៉ុន្តែគាត់ប្រកែកតែក្រោយមកក៏ប្រគល់លុយ ៦០ ម៉ឺន ឱ្យទៅឈ្មោះ សុខ ទិត្យ ខណៈឈ្មោះនេះត្រូវបានលោកមេប៉ុស្តិ៍ឱ្យជិះម៉ូតូទៅផ្ទះវិញ តែគាត់ត្រូវកសាងសំណុំរឿងបញ្ជូនទៅស្នងការដ្ឋាននគរបាលខេត្តក្រចេះ។
បើតាមដីកាបង្គាប់ឱ្យចូលខ្លួនដែលភ្នំពេញប៉ុស្តិ៍ទទួលបាននៅថ្ងៃទី ៣០ កញ្ញា ដែលមានចុះហត្ថលេខាដោយលោកចៅក្រមស៊ើបសួរ តុប ឈុនហេង បានសរសេរថា៖ «បង្គាប់ឱ្យជនត្រូវចោទឈ្មោះ សែត សុះពុស្តា ចូលបង្ហាញខ្លួននៅថ្ងៃទី ២៩ កញ្ញា ឆ្នាំ ២០២១ ពីបទចោទហិង្សាដោយចេតនា (មានស្ថានទម្ងន់ទោស) តាមបញ្ញត្តិមាត្រា ២១៨ នៃក្រមព្រហ្មទណ្ឌ៕
