ភ្នំពេញៈ លោកនាយករដ្ឋមន្ត្រី ហ៊ុន សែន សម្រេចឱ្យមន្ត្រីជំនាញប្រគល់រថយន្តធុនធ្ងន់ចំនួន ២២៩ គ្រឿងទៅដល់ម្ចាស់ក្រុមហ៊ុន ឬម្ចាស់រថយន្តវិញ ដើម្បីស្ដារសកម្មភាពធុរកិច្ច អាជីវកម្ម សេដ្ឋកិច្ច។ នេះបើយោងតាមការផ្សព្វផ្សាយនៅលើហ្វេសប៊ុករបស់លោកនាយករដ្ឋមន្ត្រីនៅថ្ងៃទី ៣០ ខែ កញ្ញា ឆ្នាំ ២០២១។
រថយន្តធុនធ្ងន់ទាំងនោះត្រូវបានឃាត់ និងរក្សាទុកនៅតាមស្ថានីយជញ្ជីង និងមន្ទីរសាធារណការ និងដឹកជញ្ជូនតាមបណ្តារាជធានី-ខេត្តមួយចំនួន អស់រយៈពេលប្រមាណ ១ ឆ្នាំដោយហេតុល្មើសច្បាប់ដឹកលើសទម្ងន់កំណត់នៃច្បាប់។
នៅលើហ្វេសប៊ុកដដែលនោះ លោកនាយករដ្ឋមន្ត្រីបានបញ្ជាក់ថា៖ «ដើម្បីស្ដារសេដ្ឋកិច្ចជាតិឡើងវិញ ជាពិសេសការគាំទ្រដល់ការរស់ឡើងវិញរបស់វិស័យឯកជន និងជាការលើកលែងបន្ធូរបន្ថយ និងផ្ដល់ឱកាសសាជាថ្មីនៅក្នុងឱកាសបុណ្យភ្ជុំបិណ្ឌប្រពៃណីជាតិខ្មែរខាងមុខនេះ ដល់ម្ចាស់ក្រុមហ៊ុន និងម្ចាស់យានយន្តដែលក្រសួងសាធារណការ និងដឹកជញ្ជូនបានផាកពិន័យ និងការឃាត់ទុកយានយន្តក្នុងបទល្មើសដឹកជញ្ជូនលើសទម្ងន់កម្រិតកំណត់ រាជរដ្ឋាភិបាលកម្ពុជានឹងអនុញ្ញាតឱ្យក្រសួងសាធារណការ និងដឹកជញ្ជូនដោះលែងយានយន្តទាំង ២២៩ គ្រឿងជូនទៅម្ចាស់យានយន្តដើម្បីប្រកបអាជីវកម្មឡើងវិញ»។
លោកនាយករដ្ឋមន្ត្រីបានបញ្ជាក់ថា យានយន្តទាំងឡាយណាដែលមិនទាន់បង់ប្រាក់ពិន័យ គឺត្រូវធ្វើការបង់ប្រាក់ពិន័យតាមច្បាប់កំណត់ជាមុនសិន ទើបអនុញ្ញាតឱ្យមានការដោះលែងយានយន្តទាំងនោះនឹងត្រូវជំរុញឱ្យម្ចាស់យានយន្ត ម្ចាស់អាជីវកម្មដឹកជញ្ជូនទាំងអស់ គោរព និងអនុវត្តតាមច្បាប់ស្តីពីផ្លូវថ្នល់ឱ្យបានម៉ឺងម៉ាត់ ចៀសវាងប្រព្រឹត្តកំហុសជាថ្មី។
លោក ហ៊ុន សែន បានថ្លែងថា នាពេលថ្មីៗនេះដោយស្ថានភាពនៃការរាតត្បាតជំងឺកូវីដ ១៩ មានសភាពធូរស្រាល ហើយរាជរដ្ឋាភិបាលបានរៀបចំកែសម្រួល និងដាក់ចេញនូវយុទ្ធសាស្ត្រ និងវិធានការដើម្បីជំរុញកំណើនសេដ្ឋកិច្ចជាតិក្នុងបរិបទ ក្រោយវិបត្តិនៃជំងឺកូវីដ ១៩ ដូចជា ការបើកឱ្យដំណើរការឡើងវិញ សាលារៀន ផ្សារទំនើប ផ្សារសាធារណៈ តំបន់ទេសចរណ៍ និងការស្ដារសកម្មភាពធុរកិច្ច អាជីវកម្ម សេដ្ឋកិច្ច និងសង្គមផ្សេងៗទៀត។
លោកថ្លែងថា៖ «ក្នុងនាមរាជរដ្ឋាភិបាលនៃព្រះរាជាណាចក្រកម្ពុជាសូមកោតសរសើរដល់ក្រសួងសាធារណការ និងដឹកជញ្ជូន និងសមត្ថកិច្ចពាក់ព័ន្ធគ្រប់លំដាប់ថ្នាក់ដែលបានអនុវត្តយ៉ាងម៉ឺងម៉ាត់ដោយឈរលើបទដ្ឋានច្បាប់នៃការដឹកជញ្ជូន លើការរឹតបន្តឹងការដឹកជញ្ជូនលើសទម្ងន់កម្រិតកំណត់»។
លោក ប៉ាល់ ច័ន្ទតារា អ្នកនាំពាក្យក្រសួងសាធារណការ និងដឹកជញ្ចូនបានលើកឡើងថា ក្រសួងនឹងយកអនុសាសន៍នេះទៅអនុវត្ត ដោយធ្វើការដោះលែងយានយន្តដែលល្មើសទាំងនេះឱ្យមានសេរីភាពមុនការកំណត់។
យ៉ាងណា លោក អះអាងថា ក្រសួងនឹងបន្តចាត់វិធានការយ៉ាងតឹងរ៉ឹងបន្ថែមចំពោះយានយន្តដឹកជញ្ជូនធុនធ្ងន់ ដែលបើកបរលើបណ្តាញផ្លូវថ្នល់បន្តទៀត។ ហើយលោកស្នើឱ្យយានយន្តដែលមានសេរីភាពទាំងនេះ ចូលរួមគោរពច្បាប់ឱ្យបានត្រឹមត្រូវ និងចៀសវាងប្រព្រឹត្តកំហុសជាថ្មី។
លោកថា៖ «ក្រសួងសាធារណការ និងដឹកជញ្ជូននៅតែបន្តអនុវត្តយ៉ាងតឹងរ៉ឹងចំពោះយានយន្តដឹកជញ្ជូនលើសទម្ងន់កម្រិតកំណត់ដោយច្បាប់ ដោយមិនមានការលើកលែងជាលើកទី ២ ទៀតទេ។ ជាងនេះទៀត ក្រសួងនឹងខិតខំធ្វើការផ្សព្វផ្សាយជូនដំណឹងឱ្យបានទូលំទូលាយបន្ថែមទៀតអំពីច្បាប់ និងលិខិតបទដ្ឋានគតិយុត្តនានាដល់សាធារណជនទូទៅឱ្យបានយល់ដឹង និងជ្រួតជ្រាបកាន់តែច្បាស់»។
លោក លឹម មុនី ជាម្ចាស់ឡានធំដែលធ្លាប់សុំឱ្យក្រសួងដោះលែងឡានរបស់ខ្លួន កាលពីថ្មីៗនេះបានបង្ហាញក្តីសប្បាយរីករាយ និងសន្យាថា ឈប់ប្រព្រឹត្តនូវទង្វើល្មើសច្បាប់ និងច្បាប់ផ្លូវចរាចរណ៍តទៅទៀតហើយ។ លោកបន្តថា ការដោះលែងយានយន្តរបស់លោកមកវិញ គឺបានជួយឱ្យគ្រួសារលោក អាចស្តារជីវភាពឡើងវិញ ព្រោះមានយានយន្តអាចបន្តអាជីវកម្មបាន។
លោកបានបញ្ជាក់ទៀតថា៖ «ការរកស៊ីបន្តនេះ ពួកខ្ញុំនឹងព្យាយាមធ្វើយ៉ាងណាកុំឱ្យមានទោសទណ្ឌនឹងច្បាប់ចរាចរណ៍ហ្នឹងទៀត។ ចំពោះឡានរបស់ពួកយើង គឺព្យាយាមដាច់ខាតកែតម្រូវកុំឱ្យល្មើសនឹងច្បាប់ទៀត។ ក្នុងចិត្តរបស់ពួកខ្ញុំម្នាក់ៗ គឺសប្បាយពន់ពេក ហើយណាមួយទៀត ពួកខ្ញុំនឹងរួមគ្នាធ្វើញត្តិសម្ដែងការអរគុណដល់សម្តេច ចំពោះការលើកលែងនេះ»។
លោក គង់ សុវណ្ណ អ្នកជំនាញសុខភាពសាធារណៈ និងជានាយកកម្មវិធីមូលនិធិសុវត្ថិភាពអន្តរជាតិបាននិយាយថា ការសម្រេចយ៉ាងដូច្នេះ គឺអាស្រ័យទៅលើគោលការណ៍របស់ក្រសួង និងថ្នាក់ដឹកនាំ ដែលនឹងផ្តល់ការអនុគ្រោះ ឬក៏វិធានការធ្វើកិច្ចសន្យាបែបណាមួយ ដោយផ្អែកលើបរិបទនៃវិបត្តិកូវីដ ១៩។ ប៉ុន្តែលោកយល់ថា មិនមែនព្រោះតែបែបនេះ រដ្ឋាភិបាល បណ្ដោយឱ្យក្រុមហ៊ុនទាំងនោះបន្តធ្វើឱ្យខូចខាតប្រយោជន៍រួមនោះដែរ ព្រោះផ្លូវថ្នល់គឺជាទ្រព្យរួម ដែលត្រូវការការពារ និងចូលរួមគោរព អនុវត្តឱ្យបានគ្រប់គ្នា។
លោក សុវណ្ណ លើកទឹកចិត្តឱ្យក្រសួងមានវិធានការយ៉ាងតឹងរ៉ឹងចំពោះយានយន្តទាំងនោះ និងត្រូវធានាឱ្យបានថា ពួកគេនឹងមិនបន្តប្រព្រឹត្តបទល្មើសជាថ្មីទៀតនោះទេ ហើយបើមានបទល្មើសជាថ្មីទៀត គឺត្រូវតែអនុវត្តដោយគ្មានការលើកលែង។
លោកបានបញ្ជាក់ថា៖ «ចន្លោះពេលនេះ គឺត្រូវមានវិធានការត្រឹមត្រូវណាស់ បើសិនជាដោះលែងត្រូវធ្វើកិច្ចសន្យាបែបម៉េច? ហើយបើសិនជាមានការកើតឡើងបញ្ហាអស់នេះទៀត មុខសញ្ញាដដែលក្រុមហ៊ុនដដែលហ្នឹង តើនៅតែដោះលែងដដែលឬយ៉ាងណា? ខ្ញុំជឿជាក់ថា សាមីក្រសួង លោកនឹងមានវិធានការហើយ ព្រោះមិនអាចយកបញ្ហាកូវីដមកលេសដដែលៗទេ»៕
វីដេអូ៖