.jpg)
ការចុះពិនិត្យទំនិញខូចគុណភាពពីថ្ងៃទី ២៧ កញ្ញា។ រូបថត ក.ប.ប.
ភ្នំពេញៈ អគ្គនាយកដ្ឋានការពារអ្នកប្រើប្រាស់កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប.) បានឱ្យដឹងថា នៅក្នុងខែកញ្ញា មន្ត្រីបានដកហូតផលិតផលម្ហូបអាហារខូចគុណភាពជាង ១ តោន ភេសជ្ជៈជាង ៧ ពាន់លីត្រ និងអាល់កុលក្លែងក្លាយជិត ៦ ម៉ឺនលីត្រ ខណៈការត្រួតពិនិត្យស្ថានីយ/ដេប៉ូប្រេងទូទាំងប្រទេសធ្វើបានជិត ៥០០ ទីតាំង។
លោក ផាន អូន អគ្គនាយកនៃអគ្គនាយកដ្ឋាន (ក.ប.ប.) បានប្រាប់ភ្នំពេញប៉ុស្តិ៍នៅថ្ងៃទី ២៩ កញ្ញាថា ជាលទ្ធផលបង្ក្រាបរបស់មន្ត្រីនៃ (ក.ប.ប.) នៅទូទាំងប្រទេសសម្រាប់ខែកញ្ញា២០២១ គឺបានដកហូតផលិតផលម្ហូបអាហារខូចគុណភាពចំនួន ១ ២៥០ គីឡូក្រាម ដែលបានដាក់លក់លើទីផ្សារទូទាំងប្រទេស។
លោកបានបន្តថា ជាមួយគ្នានេះ មន្ត្រីនៃ (ក.ប.ប.) ក៏បានដកហូតភេសជ្ជ:ចំនួន ៧ ៦៣០ លីត្រ និងអាល់កុលក្លែងក្លាយចំនួន ៥៩ ៧៥០ លីត្រផងដែរ នៅលើទីផ្សារទូទាំងប្រទេស ដើម្បីយកមកកម្ទេចចោលចៀសវាងប៉ះពាល់ដល់សុខភាពរបស់អ្នកប្រើប្រាស់។
ក្រៅពីនេះ លោក ផាន អូន បានឱ្យដឹងទៀតថា ចំពោះការចុះត្រួតពិនិត្យស្ថានីយ/ដេប៉ូប្រេងនៅទូទាំងប្រទេសវិញ គឺមន្ត្រីបានចុះត្រួតពិនិត្យចំនួន ៤៩០ ស្ថានីយ/ដេប៉ូ ក្នុងនោះបានរកឃើញស្ថានីយ ដេប៉ូប្រេងដែលមានភាពមិនអនុលោមទៅតាមច្បាប់ ដោយបានផាកពិន័យតាមគោលការណ៍ច្បាប់ចំនួន ២២៤ ស្ថានីយ/ដេប៉ូផងដែរ។
លោកបានបញ្ជាក់ថា៖ «ផ្អែកលើបរិមាណទំនិញមិនប្រក្រតីដែលត្រូវបានរកឃើញពីតាមបណ្តាទីផ្សារក្នុងរយៈពេលកន្លងមក យើងសង្កេតឃើញមិនទាន់មានការថយចុះនៅឡើយនោះទេ។ មូលហេតុសំខាន់ដែលទំនិញ ពុំមានសុវត្ថិភាពទាំងនោះនៅតែបន្តមានវត្តមានចរាចរនៅលើទីផ្សារ ដោយសារអាជីវករមួយចំនួនតូចនៅគិតពីផលប្រយោជន៍ផ្ទាល់ខ្លួនខ្ពស់ជាងសុខភាពរបស់អ្នកប្រើប្រាស់»។
ច្បាប់ស្តីពីកិច្ចការពារអ្នកប្រើប្រាស់ត្រូវបានបង្កើតឡើងក្នុងបំណងធានាឱ្យមានកិច្ចការពារអ្នកប្រើប្រាស់ និងចូលរួមលើកកម្ពស់ការប្រកួតប្រជែងដោយសុចរិត។ ច្បាប់នេះបានកំណត់អំពីសិទ្ធិ និងកាតព្វកិច្ចរបស់ធុរជន និងសិទ្ធិរបស់ប្រជាពលរដ្ឋដែលជាអ្នកប្រើប្រាស់ ហើយត្រូវបានប្រកាសឱ្យប្រើប្រាស់កាលពីថ្ងៃទី ២ ខែវិច្ឆិកា ឆ្នាំ ២០១៩។
ដើម្បីបញ្ចៀសនូវផលប៉ះពាល់ដល់សុខភាព និងធានាដល់ការប្រកួតប្រជែង លោក ផាន អូន រំពឹងថា គ្រប់ធុរជន និងពលរដ្ឋគ្រប់រូប ត្រូវរកស៊ីប្រកបដោយសុចរិត និងគិតគូរអំពីសុខុមាលភាពអ្នកប្រើប្រាស់ជាចម្បង ហើយការគោរពឱ្យបាននូវវិធានការទាំងនេះនឹងបញ្ចៀសពួកគេពីការខាតបង់ និងទោសទណ្ឌដែលមានជាធរមានទៀតផង៕
