កំពង់ឆ្នាំងៈ ក្នុងរយៈពេល ៩ ខែឆ្នាំនេះ ការបង្ក្រាបបទល្មើសជលផលក្នុងភូមិសាស្ត្រខេត្តកំពង់ឆ្នាំងសម្រេចបានចំនួន ១៦១ ករណី បើធៀបនឹងរយៈពេលដូចគ្នាកាលពីឆ្នាំមុនមានការថយចុះ ៤០ ភាគរយ។ នេះបើតាមរបាយការណ៍របស់មន្ទីរកសិកម្ម រុក្ខាប្រមាញ់ និងនេសាទខេត្តកំពង់ឆ្នាំង ដែលភ្នំពេញប៉ុស្តិ៍ទទួលបាននៅថ្ងៃទី ៣០ ខែកញ្ញា ឆ្នាំ ២០២១ ។
របាយការណ៍នេះបញ្ជាក់ថា ក្នុងចំណោមករណីទាំងនេះ សមត្ថកិច្ចបានបំផ្លាញចោលវត្ថុតាងចំនួន ១៣០ ករណី ពិន័យអន្តរការណ៍មានចំនួន ៦ ករណី និងបញ្ជូនទៅតុលាការចំនួន ២៥ ករណី ។ បទល្មើសនេសាទទាំងនេះ ត្រូវធ្វើឡើងដោយប្រើរបាំងរាំងភ្ជិតព្រែក របាំងស្បៃមុង របាំងសាច់អួន រួមផ្សំលូសាច់អួនប្រវែងលើសច្បាប់កំណត់លួចនេសាទក្នុងកន្លែងអភិរក្ស លបប្រឹស ១០០ ឧបករណ៍ឆក់ត្រីពិសេស ការលួចកាប់រាន និងឈូសឆាយដីព្រៃលិចទឹក ដើម្បីពង្រីកផ្ទៃដីកសិកម្មជាដើម។
របាយការណ៍ដដែលបញ្ជាក់ទៀតថា ប៉ុន្តែដោយសារការព្យាយាមរបស់សមត្ថកិច្ចជលផល សហការជាមួយគណៈបញ្ជាការឯកភាពរដ្ឋបាលខេត្ត-ស្រុក អាជ្ញាធរមូលដ្ឋាន អធិការដ្ឋាន រដ្ឋបាលជលផលខាងត្បូងបឹងទន្លេសាប កងកម្លាំងប្រដាប់អាវុធ និងសហគមន៍នេសាទបានធ្វើឱ្យសកម្មភាពបទល្មើសមានការថយចុះចំនួន ៤០ ភាគរយ ប្រើធៀបនឹងរយៈពេលដូចគ្នាកាលពីឆ្នាំមុន ។
លោក លី ឡា នាយខណ្ឌរដ្ឋបាលជលផលកំពង់ឆ្នាំង ប្រាប់ភ្នំពេញប៉ុស្តិ៍នៅថ្ងៃទី ៣០ ខែកញ្ញា ថាបទល្មើសនេសាទក្នុងមូលដ្ឋានរបស់លោកមានការលំបាកក្នុងការបង្ក្រាបដោយសារបង្ក្រាបខាងមុខលេចចេញនៅខាងក្រោយ។ ក៏ប៉ុន្តែសមត្ថកិច្ចក៏មានការយោគយល់ខ្លះដែរ ព្រោះជារបររបស់ប្រជាពលរដ្ឋរកចិញ្ចឹមជីវិត ។
លោកបានបន្តថា៖ «ករណីនេះសមត្ថកិច្ចមិនអាចប៉ះដៃ យកដៃ ឬប៉ះជើង យកជើងនោះទេគឺមានវិធីសាស្ត្រយកការអប់រំជាចម្បង។ ប៉ុន្តែលើកលែងតែបទល្មើសស្បៃមុង ឬបទល្មើសដែលនាំឱ្យអន្តរាយជលផល គឺកម្លាំងមានសមត្ថកិច្ច មិនអត់ឱននោះទេ។ កន្លងមកនេះក៏បានបញ្ជូនជនសង្ស័យទៅតុលាការដែលពាក់ព័ន្ធនឹងបទល្មើសការឈូសឆាយព្រៃលិចទឹក ឬបទល្មើសធ្ងន់ធ្ងរខ្លះដែរ»។
ទោះជាយ៉ាងណា លោកថា ការចុះបង្ក្រាបបទល្មើសជលផលនេះ មន្ត្រីមានសមត្ថកិច្ចបានយកចិត្តទុកដាក់ចុះទៅបង្ក្រាបជាពិសេសនៅរដូវបិទនេសាទ ប៉ុន្តែនៅពេលដែលរដូវបើកនេសាទចូលមកដល់នៅថ្ងៃទី ១ ខែតុលា សមត្ថកិច្ចរាងធូរស្បើយក្នុងការចុះទៅបង្ក្រាប។
លោកបានបញ្ជាក់ថា៖ «យើងយកចិត្តទុកដាក់នៅខែបិទនេសាទ ដោយបង្ក្រាបលើស្បៃមុងដែលនាំឱ្យមាន ការចាប់ត្រីល្អិត និងធ្វើឱ្យប៉ះពាល់ដល់កំណើនត្រី ប៉ុន្តែដល់ខែបើកវិញកម្លាំងរបស់យើងបន្ធូរដៃបន្តិចហើយយើងគ្រាន់តែណែនាំឱ្យពួកគាត់គោរពច្បាប់ជលផល »។
លោក លី ឡា បានសន្និដ្ឋានថា នៅក្នុងឆ្នាំនេះត្រីនឹងសម្បូរជាងឆ្នាំមុន ដោយសារឆ្នាំនេះទឹកទន្លេមេគង្គឡើងលឿនដែលមកទល់ពេលនេះទឹកនៅខ្ពស់ជាង ១ ម៉ែត្រ បើធៀបនឹងឆ្នាំ ២០២០ ។ ម្យ៉ាងទៀត វាគួបផ្សំជាមួយនឹងការបង្ក្រាបរបស់សមត្ថកិច្ចផងដែរ។
លោកបានថ្លែងថា៖ «បើយើងខំតែបង្ក្រាប ប៉ុន្តែរបបទឹកទន្លេ មិនអំណោយផល យើងប្រឹងទាល់តែងាប់ទៀត ក៏ទៅវាមិនរួចដែរ អាហ្នឹង យើងត្រូវតែរួមផ្សំគ្នា។ ដូច្នេះ ឆ្នាំនេះ តាមខ្ញុំសន្និដ្ឋាន គឺមានត្រីច្រើនជាងឆ្នាំមុន»។
ទោះជាយ៉ាងណា លោក ឃីម ឡុង នាយផ្នែករដ្ឋបាលជលផលកំពង់ប្រាសាទឱ្យដឹងថា ក្នុងរយៈពេល ២ ថ្ងៃ គឺថ្ងៃទី ២៦ និងទី ២៨ ខែកញ្ញា ឆ្នាំ ២០២១ សមត្ថកិច្ចបានរុះរើរបាំងស្បៃមុង និងរបាំងសាច់អួនចំនួន ៦៨ កន្លែងស្មើនឹងប្រវែង ៥ ៣០០ ម៉ែត្រ, លូស្បៃមុង ៥៨ គ្រឿង,បង្គោល ២ ៧០០ ដើម និងចាក់លែងកូនត្រីចម្រុះប្រមាណ ៣៨០ គីឡូក្រាម។
លោកបន្តថា នៅថ្ងៃទី ២៩ ខែកញ្ញា ឆ្នាំ ២០២១ បានរុះរើរបាំងស្បៃមុងចំនួន ៣៩ កន្លែងស្មើនឹងប្រវែង ១ ៤៥០ ម៉ែត្រ,លូស្បៃមុង ៤១ គ្រឿង,បង្គោល ៥០០ ដើម និងចាក់លែងកូនត្រីចម្រុះ ១៧០ គីឡូក្រាម៕