.jpg)
រោងបន្លែក្នុងសហគមន៍កសិកម្មសំបូរមានជ័យ។ រូបថត ក្រសួងកសិកម្ម
ភ្នំពេញៈ សហគមន៍កសិកម្មចំនួន ១ ២០០ ដែលត្រូវបានបង្កើតនៅទូទាំងប្រទេស បានកំពុងធ្វើការយ៉ាងសកម្ម និងទទួលបានជោគជ័យលើវិស័យកសិកម្ម ដូចជា ទីផ្សារបន្លែ និងឈើហូបផ្លែ នៅចន្លោះឆ្នាំ ២០០៣ និងចុងឆ្នាំ ២០២១។ យោងតាម ទំព័រហ្វេសប៊ុករបស់លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ដែលបានបង្ហាញឱ្យដឹងនៅថ្ងៃទី ២៩ កញ្ញា។
ទំព័រហ្វេសប៊ុកដដែលនេះបានឱ្យដឹងថា នៅក្នុងសហគមន៍ទាំងអស់នោះមានសមាជិកសរុបចំនួន ១៣ ម៉ឺនគ្រួសារ ដែលបង្កើតជាដើមទុនសរុបប្រមាណ ២៤,៨៧ លានដុល្លារ ក្រោយពីបានចុះបញ្ជីទទួលស្គាល់ដោយមន្ទីរកសិកម្ម រុក្ខាប្រមាញ់ និងនេសាទខេត្តសាមី។
លោក វេង សាខុន បានអះអាងថា៖ «បច្ចុប្បន្ន សហគមន៍កសិកម្ម បាននិងកំពុងបំពេញតួនាទីយ៉ាងសំខាន់ក្នុងការចូលរួមចំណែកយ៉ាងសកម្មអនុវត្តគោលនយោបាយ និងផែនការអភិវឌ្ឍវិស័យកសិកម្ម។ ជាពិសេសនោះ គឺបានចូលរួមជាមួយគោលនយោបាយរបស់រាជរដ្ឋាភិបាលស្តីពីការជំរុញផលិតកម្មស្រូវ និងការបង្កើនការនាំចេញអង្ករ ការជំរុញផលិតកម្មសាកវប្បកម្ម ការលើកកម្ពស់ផលិតភាព ពិពិធភាវូបនីយកម្មកសិកម្ម និងពាណិជ្ជបនីយកម្មកសិកម្មក្នុងទិសដៅដ៏ចម្បងមួយគឺការធានាសន្តិសុខស្បៀង ជំរុញការអភិវឌ្ឍសេដ្ឋកិច្ចគ្រួសារ កសាងសុខដុមនីយកម្មក្នុងរង្វង់សមាជិកសហគមន៍ និងរួមចំណែកទ្រទ្រង់ខឿនសេដ្ឋកិច្ចជាតិ»។
លោកអះអាងថា ក្រសួងកសិកម្មបានបន្តគាំទ្រ និងលើកទឹកចិត្តឱ្យប្រជាកសិករនៅទូទាំងប្រទេស ធ្វើការចងក្រងសមាជិក ដើម្បីបង្កើតបានជាកម្លាំងផលិតកម្មបន្លែ ដោយមានបន្លែសុវត្ថិភាព និងបន្លែសរីរាង្គ ព្រមទាំងដំណាំឈើហូបផ្លែ ស្រូវ និងដំណាំកសិឧស្សាហកម្មមួយចំនួនទៀត។
លោក ជា សាំងដូណា ប្រធាននាយកដ្ឋានអភិវឌ្ឍន៍សហគមន៍ ក្រសួងកសិកម្ម រុក្ខាប្រមាញ់ និងនេសាទបានប្រាប់ភ្នំពេញ-ប៉ុស្តិ៍នៅថ្ងៃទី ២៩ ខែកញ្ញាថា ការបង្កើតសហគមន៍កសិកម្ម គឺមានការកើនឡើងពី ១ ឆ្នាំទៅ ១ ឆ្នាំ ចាប់តាំងពីមានតែ ១ សហគមន៍ នៅទូទាំងប្រទេស កាលពីឆ្នាំ ២០០៣ រហូតកើនជាង ១ ០០០ សហគមន៍។ ការកើនឡើងជាបន្តបន្ទាប់នេះ ក៏ដោយសារតែនៅពេលដែលប្រជាកសិករ បានរួមគ្នាបង្កើតជាសហគមន៍កសិកម្មហើយ គឺពួកគេទទួលបាននូវអត្ថប្រយោជន៍ជាច្រើន និងធ្វើឱ្យការដាំដុះរបស់ពួកគេ មានស្ថិរភាពនៅលើទីផ្សារ។
លោកថ្លែងថា៖ «ដោយសារឃើញការលំបាករបស់ប្រជាកសិករក្នុងពេលបច្ចុប្បន្ននេះ ដែលជួបប្រទះក្នុងការងារផលិតកម្ម ការងារស្រែចម្ការ ដូច្នេះបានយើងជំរុញលើកទឹកចិត្តគាត់ ឱ្យចងក្រងជាសហគមន៍កសិកម្ម។ ការបង្កើតសហគមន៍កសិកម្មនេះ គឺកសិករស្ម័គ្រចិត្តចូលរួមដោយខ្លួនឯង។ អ៊ីចឹងខាងក្រសួងយើង ក៏ជួយគាំទ្រផ្នែកបច្ចេកទេស និងសម្របសម្រួលក្នុងការចុះបញ្ចីស្របច្បាប់»។
តាមលោក ជា សាំងដូណា នៅពេលប្រជាកសិកររួមបង្កើតសហគមន៍ គឺពួកគេនឹងទទួលបានអត្ថប្រយោជន៍ជាច្រើន ដូចជា ទទួលបានអំណាចរួមមួយក្នុងការចរចារាល់តម្លៃកសិផលនៅលើទីផ្សារ ការបញ្ជាទិញវត្ថុធាតុដើម ឬផលិតផលកសិផលក្នុងតម្លៃថោកពីទីផ្សារ ការទទួលបានឱកាសក្នុងការពង្រីកទីផ្សារលក់កសិផលកាន់តែធំ។លោក ថ្លែងថា សារៈសំខាន់ខ្លាំងបំផុតនោះ គឺបានផ្តល់ឱ្យប្រជាសហគមន៍ទទួលបានប្រាក់ចំណូលកាន់តែខ្ពស់ និងការពង្រីកអាជីវកម្មដាំដុះកាន់តែធំ បើប្រៀបធៀបនឹងប្រជាកសិករធ្វើទីផ្សារដោយខ្លួនឯង ដែលនាំឱ្យមានការបន្ទាបតម្លៃតាមតែឈ្មួញកណ្តាល។
លោក ឆេង ថុង ប្រធានក្រុមប្រឹក្សាភិបាលនៃសហគមន៍កសិកម្មសំបូរមានជ័យ ខេត្តកំពង់ចាម ដែលជាសហគមន៍មួយក្នុងចំណោមសហគមន៍ដទៃទៀត ដែលទទួលបានភាពជោគជ័យក្នុងការប្រកបរបរទីផ្សារបន្លែ និងឈើហូបផ្លែលើទីផ្សារ បាននិយាយថា ភាពរីកចម្រើនរបស់សហគមន៍បានមកដោយសារមានការជំរុញ គាំទ្រ និងលើកទឹកចិត្តពីក្រសួងកសិកម្ម រុក្ខាប្រមាញ់ និងនេសាទ ក្នុងការរៀបចំផែនការ ការគ្រប់គ្រងទីផ្សារ ការកត់ត្រាបញ្ជីស្នាមនានា។
លោក ឆេង ថុង បានថ្លែងឱ្យដឹងថា ការចងក្រងក្រុមផលិត និងការរៀបចំកិច្ចសន្យាផលិតកម្ម ក៏ជាភាពជោគជ័យមួយទៀត ដែលជាទុនទាំងកម្លាំងកាយ ចិត្ត និងធនធាន ជំរុញឱ្យសហគមន៍ពង្រីកសក្តានុពលផលិតកម្មកសិកម្មរបស់ខ្លួនតាមរយៈទិញដីជិត ១០ ហិកតា សម្រាប់ពង្រីកផលិតកម្មបន្ថែមទៀតឆ្លើយតបតាមតម្រូវការទីផ្សារ៕
