កំពង់ធំៈ ជនសង្ស័យ​ ៤ ​នាក់​ពាក់ព័ន្ធ​នឹង​ករណី​ដាក់កុង​ត្រូល​ជជុះ​ជំរិត​ទារប្រាក់ និង​ប្រើ​អំពើហិង្សា​លើ​អ្នកដឹកឈើ ត្រូវ​បាន​សមត្ថកិច្ច​កសាង​សំណុំរឿង​បញ្ជូនទៅ​តុលាការខេត្ត​កំពងធំ​នៅ​រសៀល​ថ្ងៃទី​ ៣០ កញ្ញា​។

លោក​ ម៉ែន លី ស្នងការ​នគរបាល​ខេត្តកំពង់ធំ​ថ្លែង​នៅ​ថ្ងៃទី​ ៣០ កញ្ញា​ថា មាន​មនុស្ស​ ៤ ​នាក់​ បាន​ដាក់​កុងត្រូលជជុះ និង​ឃាត់​គោយន្ត​ប្រជាពលរដ្ឋ​ដឹកឈើ​ប្រមាណ​ ៨ ​សន្លឹក ដើម្បី​យកទៅ​ធ្វើ​ផ្ទះ ហើយ​បាន​ជំរិត​ទារប្រាក់ និង​ប្រើ​អំពើហិង្សា​ទៅលើ​អ្នកដឹកឈើ​នោះ​។ ក្រោយពី​ទទួលបាន​ដំណឹង​ពី​ករណីនេះ កម្លាំង​សមត្ថកិច្ច​ជំនាញ​បាន​ចុះទៅ​បង្ក្រាប​បទល្មើស​ជាក់ស្តែង​នោះ​កាលពី​យប់​ថ្ងៃទី​ ២៩ កញ្ញា នៅ​តំបន់​អូរជ្រៅ ក្នុង​ភូមិ​គន្លងខ្ទីង ឃុំ​ឈើទាល ស្រុក​សណ្តាន់ ខេត្ត​កំពង់ធំ​។

លោក​ថ្លែងថា​៖ «​យើង​មិនដឹងថា​ [​ពួកគេ​] ​ប៉ូលិស​ ឬ​មិន​ប៉ូលិស​អី​ទេ​គ្រាន់តែ​ថា មាន​ជន​ ៤ ​នាក់​អ៊ីចឹង​ទៅណា​។ យើង​អត់​ស្គាល់​អត្តសញ្ញាណ​ទេ​។ គាត់​បាន​ទៅ​ឃាត់​គោយន្ត​ដឹកឈើ​ ៨ ​សន្លឹក​ដែល​ប្រជាពលរដ្ឋ​យក​ទៅ​ធ្វើ​ផ្ទះ ហើយក៏​ប្រព្រឹត្ត​អំពើហិង្សា​អ៊ីចឹងទៅ​។ សមត្ថកិច្ច​យើង​ក៏​ឃាត់​រឿង​បទល្មើស​ជាក់ស្តែង​»​។

មន្ត្រីនគរបាល​ខេត្តកំពង់ធំ​ម្នាក់​ប្រាប់​ក្នុង​លក្ខខណ្ឌ​សុំ​មិន​បញ្ចេញ​ឈ្មោះ​ថា នៅ​រសៀល​ថ្ងៃទី​ ៣០ កញ្ញា កម្លាំង​សមត្ថកិច្ច​ជំនាញ​កំពុង​រៀបចំ​នីតិវិធី​បញ្ជូន​ជន​ទាំង​ ៤ ​នាក់​នោះ​ទៅ​តុលាការ​។

មន្ត្រី​នោះ​បញ្ជាក់ថា ជនសង្ស័យ​ទាំង​ ៤ ​នាក់​មាន​ជនដៃដល់​ ២ ​នាក់ ឈ្មោះ​ អ៊ុច សុខរិទ្ធី នៅ​សង្កាត់​ទឹកថ្លា ខណ្ឌ​សែនសុខ រាជធានី​ភ្នំពេញ និង​ម្នាក់ទៀត​ឈ្មោះ កែវ រីណា រស់នៅ​សង្កាត់​បឹងកក់​ ២ ខណ្ឌទួលគោក រាជធានី​ភ្នំពេញ​។ ជនសង្ស័យ​ ២ ​នាក់​ទៀត​ឈ្មោះ​ វ៉ាន់ លាងហេង នៅ​ឃុំ​ឈើទាល ស្រុក​សណ្តាន់ ជា​ប្រជាការពារ និង​ម្នាក់ទៀត​ជា​អ្នកសារព័ត៌មាន ឈ្មោះ​ លេង ថេត នៅ​ឃុំ​ឈើទាល ស្រុក​សណ្តាន់ ខេត្តកំពង់ធំ​។

អ្នកនាំពាក្យ​អយ្យការ​អម​សាលា​ដំបូង​ខេត្តកំពង់ធំ លោក​ សាយ វាសនា ថ្លែងថា​៖ «​នៅ​មិនទាន់​មាន​ការសម្រេច​យ៉ាងណាទេ ព្រោះ​ពេលនេះ​កំពុងស្ថិត​ក្នុងការ​ស៊ើបអង្កេត​សួរនាំ​»៕