.jpg)
ពុទ្ធបរិស័ទប្រគេនទេយ្យវត្ថុដល់ព្រះសង្ឃនៅវត្តចាក់អង្រែលើ ខណ្ឌមានជ័យ។ ហេង ជីវ័ន
ភ្នំពេញៈ ក្នុងអំឡុងពេលនៃការឈប់សម្រាកនៃពិធីបុណ្យភ្ជុំបិណ្ឌ ដែលនឹងចាប់ផ្តើមនៅសប្តាហ៍ក្រោយនេះ ក្រសួងសុខាភិបាល បានស្នើនិងអំពាវនាវដល់គ្រប់គណៈអភិបាលរាជធានី-ខេត្ត និងអាជ្ញាធរមូលដ្ឋានត្រូវតែចាត់ចែងរៀបចំនូវយន្តការមួយសម្រាប់តាមដានក្នុងរយៈពេលនៃពិធីបុណ្យនេះ ដើម្បីបង្ការនូវការរីករាលដាលការចម្លងវីរុសកូវីដ ១៩ កាន់តែខ្លាំងថែមទៀត។
អ្នកនាំពាក្យ និងជារដ្ឋលេខាធិការក្រសួងសុខាភិបាល លោកស្រី ឱ វណ្ណឌីន បានលើកឡើងក្នុងពេលបិទបញ្ចប់យុទ្ធនាការចាក់វ៉ាក់សាំងកូវីដ ១៩ ជុំទី១ ក្នុងខេត្តមណ្ឌលគិរី កាលពីថ្ងៃទី ២៩ កញ្ញាថា ទន្ទឹមនឹងការគិតគូរ និងការសម្រេចចិត្តរបស់លោកនាយករដ្ឋមន្ត្រី ហ៊ុន សែន ក្នុងការឱ្យឈប់សម្រាក រយៈពេល ៣ ថ្ងៃនៃពិធីបុណ្យភ្ជុំបិណ្ឌនេះ អាជ្ញាធរមូលដ្ឋានត្រូវតែមានយន្តការតាមដានរៀបចំឱ្យបានត្រឹមត្រូវ។
លោកស្រី ឱ វណ្ណឌីន ថ្លែងថា៖ «វាជាយន្តការមួយដែលយើងត្រូវតែរៀនសូត្រទាំងអស់គ្នា ហើយមិនមែនយើងរៀបចំរួចហើយមិនមានអ្នកចាំត្រួតពិនិត្យមើលនោះទេ ដោយសារនៅពេលដែលមានមនុស្សឈប់សម្រាកហើយ មានអ្នកមួយចំនួនមិនបានអនុវត្តនូវវិធានការការពារទេ»។
លោកស្រីបន្ថែមថា៖ «ប្រសិនបើយើងខ្វះនូវយន្តការតាមដាន អនុវត្តនូវវិធានការការពារនេះ មិនយូរមិនឆាប់ យើងនឹងជួបប្រទះនូវការផ្ទុះចេញនៃការចម្លង វីរុសកូវីដ ១៩ នៅក្នុងទីតាំងណាមួយទៀតជាក់ជាមិនខាន»។
លោកស្រីក៏បានអំពាវនាវដល់អាជ្ញាធរមូលដ្ឋានទាំងអស់ មុននឹងថ្ងៃឈប់សម្រាកចំនួន ៣ ថ្ងៃមកដល់ គឺត្រូវចាត់ចែងរៀបចំចាប់ពីពេលនេះទៅ ដែលការរៀបចំនេះមានច្រើន គឺចាប់ពីអ្នកដែលនឹងរៀបធ្វើដំណើរ និងទីកន្លែងដែលគាត់ត្រូវទៅដល់។
ទាក់ទងនឹងការប្រើប្រាស់មធ្យោបាយក្នុងការធ្វើដំណើរ សម្រាប់ប្រជាពលរដ្ឋ ដែលមិនមានយានជំនិះផ្ទាល់ខ្លួន លោកស្រី ឱ វណ្ណឌីន ក៏បានណែនាំទៅដល់អាជ្ញាធររៀបចំនូវមធ្យោបាយសាធារណៈនេះឱ្យបានត្រឹមត្រូវ ដោយតម្រូវឱ្យអ្នកបើកបររថយន្ត ឬតាក់ស៊ីត្រូវតែអនុវត្តវិធានការសុខាភិបាលត្រឹមត្រូវជាទីបំផុត។
លោក ស្វាយ សំអ៊ាង អភិបាលខេត្តមណ្ឌលគិរី បានលើកឡើងកាលពីថ្ងៃទី ២៩ ខែកញ្ញា ដែរថា ក្នុងអំឡុងពេលនៃការឈប់សម្រាក ៣ ថ្ងៃនៃពិធីបុណ្យភ្ជុំបិណ្ឌខាងមុខនេះ លោកក៏បានធ្វើការប្រជុំសម្រាប់ត្រៀមលក្ខណៈការពារពីការឆ្លងរាលដាលនៃមេរោគកូវីដ ១៩ នេះរួចហើយផងដែរ។
លោកបញ្ជាក់ថា៖ «រដ្ឋបាលខេត្តក៏បានប្រជុំរៀបចំជាផែនការរួចហើយ គឺទី ១ យើងនឹងធ្វើការត្រួតពិនិត្យឡើងវិញពីតំបន់រមណីយដ្ឋានមួយចំនួន ដែលមិនបង្កផលប៉ះពាល់ ឬបង្កហានិភ័យអី្វទេ យើងនឹងរៀបចំឱ្យដំណើរការឡើងវិញ។ ប៉ុន្តែការរៀបចំនេះគឺត្រូវតែមានវិធានការសុខភាពត្រឹមត្រូវ ដោយដាក់ការវាស់កម្ដៅ កន្លែងបាញ់អាល់កុលផងដែរ»។
ពិធីបុណ្យភ្ជុំបិណ្ឌសម្រាប់ឆ្នាំ ២០២១ នេះ ប្រព្រឹត្តទៅចាប់ពីថ្ងៃទី ៥-៦-៧ ខែ តុលា ឆ្នាំ ២០២១ នេះ ហើយសម្រាប់ឆ្នាំនេះផងដែរ បើទោះបីជាប្រមុខរាជរដ្ឋាភិបាល លោកនាយករដ្ឋមន្ត្រី ហ៊ុន សែន បានសម្រេចផ្អាកការរៀបចំពិធីបុណ្យកាន់បិណ្ឌ និងភ្ជុំបិណ្ឌ ក៏ដោយ ប៉ុន្តែលោកបានអនុញ្ញាតឱ្យមន្ត្រីរាជការ ក៏ដូចជា កម្មករ-កម្មការិនី និងបុគ្គលិកក្រុមហ៊ុននានា អាចឈប់សម្រាកដូចធម្មតាបាន។
លោក ហ៊ុន សែន បានលើកឡើងកាលពីថ្ងៃទី ២៥ ខែកញ្ញា ថា ប្រជាពលរដ្ឋអាចធ្វើដំណើរទៅកម្សាន្ត នៅតាមទីកន្លែងនានា ដោយមានការអនុវត្តវិធានការសុខាភិបាលឱ្យបានត្រឹមត្រូវផងដែរ។
លោកនាយករដ្ឋមន្ត្រីថ្លែងថា៖ «រាជរដ្ឋាភិបាលមិនហាមឃាត់ការឈប់សម្រាក ៣ ថ្ងៃរបស់មន្ត្រីរាជការ ក៏ដូចជាកម្មករ កម្មការិនី បុគ្គលិកនៅតាមក្រុមហ៊ុន ដែលត្រូវទទួលបានការអនុញ្ញាតឱ្យឈប់សម្រាកដោយមានប្រាក់បៀវត្សរ៍នោះទេ»៕
វីដេអូ៖
