អភិបាលខេត្តកំពង់ចាម លោក អ៊ុន ចាន់ដា បានសម្រេចបន្តអនុវត្តយុទ្ធនាការពង្រឹងវិធានការរដ្ឋបាល ដើម្បីទប់ស្កាត់ការឆ្លងរាលដាលនៃជំងឺកូវីដ ១៩ នៅទូទាំងខេត្តរយៈពេល ០២សប្តាហ៍ ដែលនឹងចាប់អនុវត្តពីថ្ងៃទី ០១ រហូតដល់ថ្ងៃទី ១៤ ខែ តុលា ឆ្នាំ ២០២១ ដើម្បីធានាប្រសិទ្ធភាពនៃការអនុវត្តវិធានការប្រយុទ្ធ និងទប់ស្កាត់ការឆ្លងរាលដាលនៃជំងឺកូវី ១៩ ជាពិសេសក្នុងបរិបទដែលកម្ពុជាកំពុងប្រឈមនឹងការមកដល់នៃរលកទី ៣ នៃការឆ្លងរីករាលដាលទ្រង់ទ្រាយធំ បណ្តាលមកពីមេរោគបំប្លែងខ្លួនថ្មីប្រភេទដែលតា(Delta)។
លោកបានលើកឡើងថា អភិបាលក្រុង-ស្រុក ត្រូវហាមឃាត់នូវរាល់សកម្មភាពមុខរបរ និងអាជីវកម្មក្លិបកម្សាន្តគ្រប់ប្រភេទជាអាទិ៍ ខារ៉ាអូខេ រង្គសាល ឌីស្កូតែក និងបៀហ្គាឌីន រមណីយដ្ឋានធម្មជាតិ និងកែច្នៃ សួនកម្សាន្តនានាអាជីវកម្ម ម៉ាស្សា ហាងលក់ និងសេពគ្រឿងស្រវឹងគ្រប់ប្រភេទ រោងភាពយន្ត រោងសម្តែងសិល្បៈ សារមន្ទីរ បណ្ណាល័យ ក្លិបហាត់ប្រាណ និងមជ្ឈមណ្ឌលកីឡា ការប្រគំតន្ត្រី។
លោក អ៊ុន ចាន់ដា បានឱ្យដឹងថា ៖ «រាល់សកម្មភាពនៃការជួបជុំឬការប្រមូលផ្តុំមនុស្សជាលក្ខណៈឯកជនដែលមានមនុស្សចូលរួមលើសពី ១០ នាក់ ត្រូវមានការអនុញ្ញាតពីអាជ្ញាធរមានសមត្ថកិច្ច។ រាល់ការជួបជុំ ឬប្រមូលផ្តុំមនុស្ស ដើម្បីសេពគ្រឿងស្រវឹង និងការលក់ដូរគ្រឿងស្រវឹងគ្រប់ប្រភេទមិនត្រូវអនុញ្ញាតជាដាច់ខាត»។
អភិបាលខេត្តរូបនេះបានបន្ថែមថា តូបលក់ចល័ត ផ្សាររាត្រី ផ្សារទំនើប ម៉ាត ហាងលក់ទំនិញគ្រប់ប្រភេទ ការជួបជុំនៅតាមទីសាធារណៈនានា ដែលមានសភាពអ៊ូអរ និងការជួបជុំមនុស្សច្រើន ត្រូវហាមឃាត់ចាប់ពីម៉ោង ១០យប់ ដល់ម៉ោង ៣:០០នាទីព្រឹកជាកំហិត។
លោក អ៊ុន ចាន់ដា ថា ៖ «អភិបាលក្រុង-ស្រុក ត្រូវយកចិត្តទុកដាក់រឹតបន្តឹងការត្រួតពិនិត្យ និងការរៀបចំ របៀបរៀបរយ និងសណ្តាប់ធ្នាប់នៅតាមទីកន្លែងដែលជាប្រភព ឬអាចមានហានិភ័យខ្ពស់នៃការឆ្លងរាលដាល នៃជំងឺកូវីដ ១៩ ជាពិសេសតាមទីផ្សារ និងកន្លែងលក់ដូរគ្រឿងឧបភោគបរិភោគ និងទីតាំងអាជីវកម្មផ្សេងទៀត ព្រមទាំងការរៀបចំកម្មវិធីសាសនាផ្សេងៗ»។
ជាមួយគ្នានេះ លោកក៏បានស្នើឱ្យអាជ្ញាធរត្រូវបង្កើនការយកចិត្តទុកដាក់ក្នុងការចាត់វិធានការចាំបាច់នានា ដើម្បីធានាឱ្យបាននូវការគោរព និងអនុវត្តនូវវិធានការសុខាភិបាលនានា សំដៅប្រយុទ្ធ និងទប់ស្កាត់ការឆ្លងរាលដាលនៃជំងឺកូវីដ ១៩ ជាពិសេសការអនុវត្តនូវកាតព្វកិច្ចពាក់ម៉ាស់ និងកាតព្វកិច្ចរក្សាគម្លាតសុវត្ថិភាព ព្រមទាំងការប្រកាន់ខ្ជាប់នូវវិធានការ «៣ការពារ និង៣កុំ» នៅតាមទីសាធារណៈ៕