.jpg)
រថយន្តដឹកលើសទម្ងន់កម្រិតកំណត់ ដែលមន្រ្តីក្រសួងសាធារណការ និងដឹកជញ្ជូន ឃាត់ទុក និងធ្វើការផាកពិន័យ។ រូបថត ក្រសួងសាធារណការ និងដឹកជញ្ជូន
លោក ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន បានឱ្យដឹងថា នេះជាលើកទី១ ហើយដែលរថយន្តដឹកលើសទម្ងន់ចំនួន ២២៩ គ្រឿង ត្រូវបានដោះលែងតាមការបញ្ជារបស់លោកនាយករដ្ឋមន្រ្តី ហ៊ុន សែន ប៉ុន្តែ ម្ចាស់រថយន្ត ឬក្រុមហ៊ុនដឹកជញ្ជូនត្រូវតែបញ្ឈប់ការដឹកជញ្ជូនលើសទម្ងន់ ដោយសារនឹងគ្មានការលើកលែងជាលើកទី២ ទេ។
លោកថ្លែងដូចនេះនាព្រឹកថ្ងៃទី ០១ ខែ តុលា ឆ្នាំ ២០២១ នេះ ក្នុងសន្និសីទសារព័ត៌មានស្តីពី «វឌ្ឍនភាពនៃការអនុវត្តវិធានការគ្រប់គ្រងទប់ស្កាត់យានយន្តដឹកជញ្ជូនលើសទម្ងន់កម្រិតកំណត់ក្នុងប្រទេសកម្ពុជា» នៅក្រសួងសាធារណការ និងដឹកជញ្ជូន។
លោកមានប្រសាសន៍ថា៖ «នេះជាការពង្រឹងច្បាប់របស់យើង ហើយផ្សព្វផ្សាយពីច្បាប់នេះ ទូលំទូលាយថែមទៀតទៅដល់ក្រុមហ៊ុនដឹកជញ្ជូនក៏ដូចជាអ្នកបើកបររថយន្តធន់ធ្ងន់ដែលដឹកទំនិញលើសទម្ងន់កំណត់ខុសនឹងច្បាប់ គឺត្រូវតែបញ្ឈប់ ហើយសម្តេចតេជោ ហ៊ុន សែន ក៏បានណែនាំត្រូវតែបញ្ឈប់ដោយគ្មានការលើកលែងជាលើកទី ២ ទេ»។
លោក ស៊ុន ចាន់ថុល បានបន្តថាការដឹកលើសទម្ងន់នឹងធ្វើឱ្យផ្លូវឆាប់ខូច បង្កឱ្យគ្រោះថ្នាក់ចរាចរណ៍ជាដើម។ ដូចនេះត្រូវតែចូលរួមជាមួយនឹងរាជរដ្ឋាភិបាល ថែរក្សាផ្លូវថ្នល់ដើម្បីងាយស្រួលក្នុងការធ្វើដំណើរ និងដឹកទំនិញដែលមិនលើសទម្ងន់។
លោកក៏បានអំពាវនាវទៅដល់ប្រជាពលរដ្ឋទាំងអស់ត្រូវតែគោរពច្បាប់ឱ្យបានគ្រប់ៗគ្នា ដើម្បីចូលរួមជាមួយនឹងរាជរដ្ឋាភិបាលក្នុងការថែរក្សាទ្រព្យសម្បតិ្តជាតិ ហើយក្រសួងសាធារណការ និងដឹកជញ្ជូន រួមនឹងស្ថាប័នពាក់ព័ន្ធទាក់ទងនឹងការពិនិត្យយានយន្តដឹកលើសទម្ងន់នេះ ត្រូវតែបន្តធ្វើការរឹតបន្តឹងច្បាប់ឱ្យបានរឹងមាំថែមទៀត បន្ទាប់ពីរថយន្តដឹកលើសទម្ងន់ចំនួន ២២៩គ្រឿងនេះ ត្រូវបានដោះលែងចាប់ពីថ្ងៃទី ០១ រហូតដល់ថ្ងៃទី ១៨ ខែតុលា ចំពោះយានយន្តណាដែលបានបង់ប្រាក់ផាកពិន័យហើយ។
លោក ស៊ុន ចាន់ថុល បានបញ្ជាក់ថា ៖ «ចំពោះយានយន្តដែលបានឃាត់ទុក ហើយមិនទាន់បានបង់ប្រាក់ផាកពិន័យទេ ត្រូវមកបង់ប្រាក់ផាកពិន័យឱ្យបានមុនថ្ងៃទី ១៨ ខែតុលានេះ ហើយប្រសិនបើការបង់ប្រាក់នេះនៅក្រោយថ្ងៃទី ១៨ នេះ រថយន្តនឹងត្រូវបន្តធ្វើការឃាត់ទុកបន្តទៀត»។
យោងតាមមាត្រា ២៦ និងមាត្រា ៦០ ស្តីពីការដកបណ្ណបើកបរបណ្តោះអាសន្នឬក្នុងករណីមិនរាងចាល មានប្រព្រឹត្តអំពើល្មើសដឹកទំនិញលើសទម្ងន់កំណត់នឹងត្រូវធ្វើការឃាត់ផាកពិន័យទ្វេដង។
លោក ស៊ុន ចាន់ថុល បានបន្ថែមថា ដោយសារតែក្រសួងមិនទាន់មានប្រព័ន្ធស្វ័យប្រវត្តិតាមដានអ្នកដែលធ្វើខុសល្មើសច្បាប់ម្តងហើយម្តងទៀតក្នុងការដកឬព្យួរបណ្ណបើកបរគ្រប់ជ្រុងជ្រោយនៅឡើយទេ ប៉ុន្តែក្រសួងកំពុងតែធ្វើ App មួយទៀត ដើម្បីផ្តល់ទៅក្រុមការងារត្រួតពិនិត្យរថយន្តដឹកទំនិញល្មើសច្បាប់។
ជាមួយគ្នានេះដែរ គណៈកម្មាធិការដឹកនាំការត្រួតពិនិត្យយានយន្ត ដឹកជញ្ជូនលើសទម្ងន់កម្រិតកំណត់នៃក្រសួងសាធារណការ និងដឹកជញ្ជូន បានជូនដំណឹងទៅម្ចាស់ក្រុមហ៊ុន និងម្ចាស់យានយន្តទាំងអស់ដែលត្រូវបានឃាត់ទុក ហើយបានបង់ប្រាក់ពិន័យរួចរាល់ហើយនោះ អាចមកទទួលយានយន្តនៅតាមទីតាំងរក្សាទុកយានយន្តពីថ្ងៃទី ០១ នេះ ដល់ថ្ងៃទី ១៨ ខែតុលា។
គណៈកម្មាធិការដឹកនាំការត្រួតពិនិត្យយានយន្ត ដឹកជញ្ជូនលើសទម្ងន់កម្រិតកំណត់បានបញ្ជាក់ថា៖ «ម្ចាស់យានយន្តឬម្ចាស់ក្រុមហ៊ុន ត្រូវធ្វើកិច្ចសន្យាលែងប្រព្រឹត្តបទល្មើស ដឹកជញ្ជូនលើសទម្ងន់កម្រិតកំណត់ជាលើកទី២ បន្តទៀតផងដែរ»។
គណៈកម្មាធិការដដែលនេះបានបញ្ជាក់ថា រាល់ការប្រគល់-ទទួលយានយន្ត ម្ចាស់យានយន្ត ត្រូវមកទទួលយានយន្តនៅតាមទីតាំងដែលបានឃាត់ទុក ពីពេលនេះ រហូតដល់ថ្ងៃទី ១៨ ខែតុលា ឆ្នាំ២០២១ លើកលែងតែថ្ងៃទី ០៥-០៦-០៧ ខែ តុលា ឆ្នាំ ២០២១ ដែលជាថ្ងៃឈប់សម្រាកក្នុងឱកាសពិធីបុណ្យភ្ជុំបិណ្ឌ។ ម្ចាស់យានយន្តត្រូវភ្ជាប់មកជាមួយនូវសំណុំឯកសារ ឬលិខិតស្នាមពាក់ព័ន្ធនឹងយានយន្ត ដែលបានឃាត់ទុកនាពេលកន្លងមក ដែលចេញដោយមន្ត្រីមានសមត្ថកិច្ចប្រចាំស្ថានីយជញ្ជីងអចល័ត និងជញ្ជីងចល័ត នៃក្រសួងសាធារណការ និងដឹកជញ្ជូន។
គួរបញ្ជាក់ផងដែរថា លោកនាយករដ្ឋមន្ត្រី ហ៊ុន សែន នាថ្ងៃទី ២៨ ខែ កញ្ញា ឆ្នាំ ២០២១ បានប្រកាសលើកលែងបន្ធូរបន្ថយក៏ដូចជាផ្តល់ឱកាសសាជាថ្មីនៅក្នុងឱកាសបុណ្យភ្ជុំបិណ្ឌប្រពៃណីជាតិខ្មែរខាងមុខនេះ ដល់ម្ចាស់ក្រុមហ៊ុន និងម្ចាស់យានយន្តដឹកជញ្ជូនលើសទម្ងន់កម្រិតកំណត់ ដែលមន្ត្រីមានសមត្ថកិច្ចប្រចាំស្ថានីយជញ្ចឹងអចល័ត និងជញ្ជីងចល័តរយៈពេលប្រមាណជា ១ ឆ្នាំ កន្លងមកនេះ៕
វីដេអូ៖
