.jpg)
អំណោយរបស់ប្រមុខរដ្ឋាភិបាលត្រូវបានក្រុមការងារប្រគល់ឱ្យអាជ្ញាធរខេត្តបន្ទាយមានជ័យកាលពីម្សិលមិញ ដើម្បីយកទៅចែកជូនពលរដ្ឋរងគ្រោះដោយទឹកជំនន់។ រូបថត សហការី
បន្ទាយមានជ័យ៖ អាជ្ញាធមូលដ្ឋានខេត្តបន្ទាយមានជ័យបាននិងកំពុងតែយកអំណោយប្រមុខរាជរដ្ឋាភិបាលចែកជូនប្រជាពលរដ្ឋរងគ្រោះ ដោយសារទឹកជំនន់ ខណៈពេលដែលស្ថានភាពទឹកជំនន់បានស្រកបន្តិច។
ប្រមុខរដ្ឋាភិបាលលោក ហ៊ុន សែន និងភរិយា ប៊ុន រ៉ានី ហ៊ុន សែន បានឧបត្ថម្ភមីចំនួន ២០ ៣០០ កេស និងថវិកា ១០០ លានរៀលជូនទៅរដ្ឋបាលខេត្តបន្ទាយមានជ័យ ដើម្បីចែកជូនដល់ប្រជាពលរដ្ឋរងគ្រោះ ដោយទឹកជំនន់។ មី និងថវិកានេះត្រូវបានដឹកជញ្ជូន និងប្រគល់ជូនលោកទេសរដ្ឋមន្ត្រី គន់ គីម អនុប្រធានទី ១ គណៈកម្មាធិការជាតិគ្រប់គ្រងគ្រោះមហន្តរាយនៅសាលាខេត្តបន្ទាយមានជ័យនាព្រឹកថ្ងៃទី ៣០ ខែកញ្ញា ឆ្នាំ ២០២១ នេះ។
លោក សៀក វិចិត្រអ្នកនាំពាក្យរបស់គណៈកម្មាធិការជាតិគ្រប់គ្រងគ្រោះមហន្តរាយបានថ្លែងប្រាប់ភ្នំពេញប៉ុស្តិ៍នៅថ្ងៃសុក្រនេះថា៖ «មកដល់ម៉ោងនេះ ខាងខេត្តក៏ដូចជាខាងស្រុក គាត់កំពុងតែដើរចែកជូនពលរដ្ឋហើយ»។ លោកបានបន្ថែមថាស្ថានភាពទឹកនៅក្នុងខេត្តនេះគឺបាននិងកំពុងតែស្រកចុះវិញជាបណ្តើរៗហើយ ដោយសារតែភ្លៀងមិនសូវធ្លាក់កាលពីថ្ងៃទី ៣០ ខែកញ្ញា និងទី ០១ ខែតុលាឆ្នាំ ២០២១ នេះ ហើយទឹកផ្នែកខាងលើក៏មិនសូវហូរខ្លាំងមកដែរ។
គណៈកម្មាធិការជាតិគ្រប់គ្រងគ្រោះមហន្តរាយបានឱ្យដឹងថា ទឹកជំនន់នេះបានធ្វើឱ្យប៉ះពាល់ ៦ ក្រុង-ស្រុក ស្មើ ៣៨ ឃុំ-សង្កាត់ និងប៉ះពាល់ប្រជាជនប្រមាណ ១៨ ៧១៥ គ្រួសារ និងជម្លៀសទៅទួលសុវត្ថិភាពប្រមាណ ១ ១៥០ គ្រួសារ។
លោក សេក សុខុម ប្រធានមន្ទីរព័ត៌មានខេត្តបានឱ្យដឹងថា ក្នុងចំណោមពលរដ្ឋដែលជម្លៀសទាំងនោះ មានប្រមាណជា ៤០០ គ្រួសារនៅក្រុងសិរីសុភណ្ឌ និងប្រមាណជា ៥០០ គ្រួសារនៅស្រុកមង្គលបុរី។
លោកបញ្ជាក់ថា៖ «មានលិចច្រើនកន្លែង អ៊ីចឹងទីទួលសុវត្ថិភាពមាននៅផ្សេងៗគ្នាដែរ។ ដោយសារតែការរីករាលដាលជំងឺកូវីដ ១៩ អាជ្ញាធរលោកមិនចង់ឱ្យមានការប្រមូលផ្តុំគ្នាច្រើនទេ ព្រោះខ្លាចមានការឆ្លង។ អ៊ីចឹងលិចធ្ងន់ធ្ងរខ្លាំងបានឱ្យគាត់មក [ទីទួលសុវត្ថិភាព]»៕
