ភ្នំពេញ៖ មន្ត្រីនៃក្រសួងធម្មការនិងសាសនា បានឱ្យដឹងថា គិតត្រឹមថ្ងៃទី ៣០ ខែកញ្ញា ព្រះសង្ឃជាង ១ ០០០ អង្គ នៅទូទាំងប្រទេសបានឆ្លងវីរុសកូវីដ ១៩ និងបានបណ្តាលឱ្យព្រះសង្ឃចំនួន ៧ អង្គសុគតផងដែរ ដោយសារជំងឺកូវីដ ១៩ នេះ ប៉ុន្តែព្រះសង្ឃទាំងនោះក៏បានជាសះស្បើយជាបន្តបន្ទាប់រហូតជាង ៣៥០ អង្គផងដែរ។
អ្នកនាំពាក្យក្រសួងធម្មការនិងសាសនា លោក សេង សុមុនី បានថ្លែងក្នុងកិច្ចសម្ភាសន៍មួយនាថ្ងៃទី ០១ ខែតុលានេះថា ព្រះសង្ឃបានឆ្លងវីរុសកូវីដ ១៩ ពីមូលហេតុផ្សេងៗគ្នា ដោយព្រះសង្ឃខ្លះឆ្លងពីកូនសិស្សលោកដែលបានចេញទៅខាងក្រៅវត្តអារាម ព្រះសង្ឃខ្លះបានឆ្លងនៅពេលចេញនិមន្តបិទបាត ឆ្លងពីពុទ្ធបរិស័ទ និងឆ្លងពីការចូលរួមពិធីបុណ្យផ្សេងៗ។
លោកមានប្រសាសន៍ថា៖ «ការដែលរាជរដ្ឋាភិបាលផ្អាកប្រារព្ធពិធីកាន់បិណ្ឌនិងភ្ជុំបិណ្ឌ គឺដើម្បីតែការពារសុខភាពនិងអាយុជីវិតរបស់ប្រជាពលរដ្ឋពីការឆ្លងរាលដាលមេរោគកូវីដ ១៩ តែប៉ុណ្ណោះ»។
លោក សេង សុមុនី បានអំពាវនាវកុំឱ្យប្រជាពលរដ្ឋ ឬពុទ្ធបរិស័ទសម្រុកនាំគ្នាទៅវត្ត ឬពញាក់ពពូនគ្នាច្រើន ប៉ុន្តែពួកគេអាចទៅវត្តផ្សេងៗគ្នាដែលមានវត្តជាង ៥ ០០០ វត្តឯណោះ នៅទូទាំងប្រទេស។
លោកនាយករដ្ឋមន្ត្រី ហ៊ុន សែន បានចេញសេចក្តីសម្រេចផ្អាកការរៀបចំពិធីបុណ្យកាន់បិណ្ឌ និងភ្ជុំបិណ្ឌចាប់ពីបិណ្ឌទី៤ រហូតដល់ថ្ងៃភ្ជុំបិណ្ឌ ដើម្បីទប់ស្កាត់ការឆ្លងរាលដាលនៃជំងឺកូវីដ ១៩ បន្ទាប់ពីមានការឆ្លងរាលដាលវីរុសកូវីដ ១៩ នេះ ទៅដល់ព្រះសង្ឃ តាជី ដូនជី និងកូនសិស្សលោកក្នុងពិធីបុណ្យកាន់បិណ្ឌក្នុងថ្ងៃទី១ និងទី២ នៅតាមបណ្តាវត្តអារាមក្នុងរាជធានីភ្នំពេញ៕