កងកម្លាំងមួកខៀវកម្ពុជា ជិត ៣០០ នាក់ បានចាកចេញទៅបំពេញបេសកកម្មរបស់អង្គការសហប្រជាជាតិនៅសាធារណរដ្ឋម៉ាលីនារសៀលថ្ងៃទី ០១ ខែតុលា ដែលមកដល់ពេលនេះកម្ពុជាបានបញ្ជូនកងកម្លាំងមួកខៀវសរុបចំនួន ៧ ៨២១ នាក់ហើយ ចាប់ពីឆ្នាំ ២០០៦ មកដល់ឆ្នាំ ២០២១ នេះ។
លោក សែម សុវណ្ណី អគ្គនាយកមជ្ឈមណ្ឌលជាតិគ្រប់គ្រងកងកម្លាំងរក្សាសន្តិភាព បោសសម្អាតមីន និងកាកសំណល់សង្គ្រាម បានថ្លែងក្នុងពេលជូនដំណើរកងកម្លាំងមួកខៀវកម្ពុជានាព្រលានយន្តហោះអន្តរជាតិភ្នំពេញថា សម្រាប់កងកម្លាំងមួកខៀវ ដែលត្រូវចេញទៅបំពេញបេសកកម្មមនុស្សធម៌ក្រោមឆត្ររបស់អង្គការសហប្រជាជាតិ គឺជាកងទី៨ ហើយដែលកម្ពុជាបានបញ្ជូនទៅសាធារណរដ្ឋម៉ាលី ដែលកងកម្លាំងលើកទី៨ នេះមានចំនួន ២៩៨ នាក់។
លោកបានឱ្យដឹងទៀតថា កម្លាំងកងទ័ពមួកខៀវ ដែលបញ្ជូនទៅប្តូរវេនលើកនេះ មាន ២ កង ដែលបម្រើបេសកកម្មផ្សេងពីគ្នា ដែលមួយកងជាកងអនុសេនាធំកម្ទេចគ្រាប់មិនទាន់ផ្ទុះ EOD និងមួយកងទៀត ជាកងអនុសេនាធំវិស្វកម្មថែទាំព្រលានយន្តហោះ។
លោក សែម សុវណ្ណី បានមានប្រសាសន៍ថា៖ «មកដល់ពេលនេះ កងទ័ពយើងទាំងអស់ត្រូវបានចាក់វ៉ាក់សាំងបានគ្រប់ៗគ្នារួចហើយចំនួន៣ដូស ហើយក៏បានធ្វើការពិនិត្យសុខភាពដោយមានលិខិតបញ្ជាក់សុខភាពចំនួន ៧២ ម៉ោង ហើយនៅពេលទៅដល់ពួកគាត់នឹងត្រូវធ្វើចត្តាឡីស័កតាមការណែនាំរបស់សុខាភិបាលរបស់ប្រទេសម៉ាលី និងអង្គការសហប្រជាជាតិផងដែរ»។
ជាមួយគ្នានេះដែរ លោកបានបញ្ជាក់ថា កម្ពុជាក៏នៅបន្តត្រៀមកម្លាំងដើម្បីចូលរួមបេសកកម្មរបស់អង្គការសហប្រជាជាតិមាន កងរាជអាវុធហត្ថ កងវិស្វកម្ម កងបោសសំអាតមីន និងមួយកងទៀតជាស្ពានចល័ត ដែលកំពុងតែរៀបចំដាក់ចូលក្នុងក្រុមប្រព័ន្ធត្រៀមបម្រុងរហ័សរបស់អង្គការសហប្រជាជាតិ។
លោកថា៖ «នៅពេលដែលមានការសំណូមពររបស់អង្គការសហប្រជាជាតិនិងមានការសម្រេចរបស់រាជរដ្ឋាភិបាលកម្ពុជា យើងនឹងចាត់បញ្ជូនកម្លាំងទៅភ្លាម ដោយសារយើងបានត្រៀមនិងហ្វឹកហាត់រួចរាល់ហើយ។ ក្នុងឆ្នាំនេះ យើងនឹងមានបញ្ជូនកងកម្លាំងជាបន្តបន្ទាប់ទៀតក្នុងការប្តូរវេននៅពេលក្រោយៗទៀត»៕
វីដេអូ៖