ប្រមុខរាជរដ្ឋាភិបាល បានសម្រេចដាក់ឈ្មោះ អគារពិនិត្យ និងព្យាបាលជំងឺទូទៅនៅក្នុងមន្ទីរពេទ្យបង្អែកស្រុកតំបែរ ខេត្តត្បូងឃ្មុំជា «អគារពិនិត្យព្យាបាលជំងឺទូទៅ តេជោសែន តំបែរ» ដើម្បីជាការចងចាំនិងរំឭកនូវគុណូបការៈដ៏ថ្លៃថ្លាក្រោមការដឹកនាំប្រកបដោយគតិបណ្ឌិត និងឈ្លាសវៃបំផុតរបស់លោកនាយករដ្ឋមន្រ្តី ហ៊ុន សែន។
លោក វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងាររាជរដ្ឋាភិបាល ចុះមូលដ្ឋានស្រុកតំបែរ ខេត្តត្បូងឃ្មុំ បានសរសេរលើបណ្តាញសង្គមហ្វេសប៊ុករបស់លោកនៅថ្ងៃទី ០១ ខែតុលា នេះថា លោកនាយករដ្ឋមន្រ្តីហ៊ុន សែន បានសម្រេចយល់ព្រម ដាក់ឈ្មោះអគារពិនិត្យ និងព្យាបាលជំងឺទូទៅនេះ ដែលមានទំហំ ១ ៥៨៦,២០ ម៉ែត្រក្រឡា កម្ពស់ ៣ ជាន់ ជា «អគារពិនិត្យព្យាបាលជំងឺទូទៅ តេជោសែន តំបែរ»។
លោកបានបន្តថា៖ «ការដាក់ឈ្មោះនេះគឺ ដើម្បីទុកជាការចងចាំ និងរំឭកនូវគុណូបការៈដ៏ថ្លៃថ្លាក្រោមការដឹកនាំប្រកបដោយ គតិបណ្ឌិត និងឈ្លាសវៃបំផុតរបស់សម្ដេចតេជោ ឱ្យប្រទេសជាតិមាតុភូមិ មានការអភិវឌ្ឍរីកចម្រើនលើគ្រប់វិស័យ ព្រមទាំងទទួលបាននូវសុខសន្តិភាព ស្ថិរភាព ឯករាជ្យជាតិ និងអធិបតេយ្យភាពដ៏ត្រចះត្រចង់ពុំអាចបំភ្លេចបាន»៕